Powołanska orientacija je za šulerjow, kiž bórze šulu zakónča, njesměrnje wažna. Tuž je derje, zo so wysokošulski dźeń ­wotměwa. Přiwšěm mam zaćišć, zo je dźeń a wjace młodostnych hladajo na swój přichod přežadanych. Maja prosće přewjele móžnosćow. Wažne tuž je, telko poskitkow za powołansku orientaciju wužiwać, kaž móžno. To su prózdninske dźěło we wšelakich předewzaćach abo praktikumy, při kotrychž dóstawaja šulerjo dohlad do powołanskeho swěta. Tež w redakciji Serbskich Nowin rady młodych ludźi witamy. Toho abo tamneho smy mjeztym hižo z redakciskim wirusom natyknyli, tak zo móhł sej předstajić pozdźišo pola nas dźěłać. A tež Ludowe nakładnistwo Domowina so z akciju „Naša serbska kniha“ lěto wob lěto prócuje młodych ludźi docpěć a jim wšelake powołanja w nakładnistwje spřistupnić. Tajkich praktiskich a informaciskich zarjadowanjow njemóže dosć być. Šulerjo pak měli kóždu składnosć wužiwać. Bianka Šeferowa

Berlin (dpa/SN). Zwjazkowy kriminalny zarjad chce zhromadnje z nutřkownym ministerstwom hač k wurjadnemu posedźenju nutřkowneho wuběrka přichodnu póndźelu „chronologiju podawka“ nastupajo nadpad na Magdeburgske adwentne wiki předpołožić. Tole rozprawja powěsćernja dpa po informacijach nutřkownych politikarjow zwjazkoweho sejma. Zwjazkowa ministerka za nutřkowne naležnosće Nancy Faeser (SPD) a nawoda zwjazkoweho kriminalneho zarjada Holger Münch běštaj zapósłancam přehlad připowědźiłoj. Při tym chcedźa wujasnić, kotre zarjady su pokiwy na skućićela Taleba A. měli a kak su z nimi wobchadźeli. Pječa bě skućićel zamołwitym w šěsć zwjazkowych krajach derje znaty. Wšitke informacije chcedźa nětko znosyć, zo móhli sej cyłkowny wobraz stworić.

W běhu hodźinu trajaceho přednoška je Münch zapósłancam najnowše dopó­znaća kriminalistow předstajił. Tež zastupnicy zwjazkoweho zarjada za škit wustawy a zarjada za migraciju a ćěkancy su swoje dopóznaća přinošowali. Taleb A. bě loni 20. decembra ze swojim awtom šěsć ludźi morił a něhdźe 300 zranił.

Choćebuski wobchadny zawod je tele dny nowu tramwajku dóstał. Najebać to je ­połoženje napjate. Po informacijach nawodnistwa maja cyłkownje 16 tramwajkow. 14 z nich je stajnje po puću. Jako rezerwu maja jeničce dwě jězdźidle. Tež jězbnu šulu za nowych wodźerjow dyrbja z tutym kontingentom zarjadować. Hłowna přičina za napjatu situaciju je wobćežny proces přizjewjenja nowych jězdźidłow. Zamołwići Choćebuskeho zawoda su nowe tramwajki zhromadnje z Frankfurtom nad Wódru a Brandenburgom nad Habolu w Čěskej skazali. Wuměnjenja w městach pak su rozdźělne. Tuž dyrbja kóždu tramwajku pruwować, štož dołho traje. W nalěću ­chcedźa z tym hotowi być. Foto: Michael Helbig

Drježdźany (dpa/SN). Sakska ratarska a žiwidłowa branša prezentuje so lětsa z 39 předewzaćemi a towarstwami na Zelenym tydźenju w Berlinje, kotryž wotměje so wot 17. hač do 26. januara. Na po wšěm swěće najwjetšich fachowych wikach za zežiwjenje, ratarstwo a zahrodnistwo předstaji 14 dospołnje abo dźělnje certifikowanych bio-zawodow swoje wudźěłki, nowostki a wosebitosće šěrokemu wopytowarstwu, kaž sakske ratarske ministerstwo zdźěla. Dwanaće wustajerjow wobdźěli so prěni króć na Zelenym tydźenju.

„Wjeselu so jara, zo mnohostronske kulinariske chłóšćenki ze Sakskeje na Zelenym tydźenju zaso prominentnje prezentujemy“, rjekny nowy sakski ratarski minister Georg-Ludwig von Breitenbuch (CDU) wčera w Drježdźanach. Ratarske wudźěłki Sakskeje symbolizuja kwalitu, regionalne hospodarstwo a wuběrny słód. Organizaciju a podpěru sakskeho wustupa w Berlinje přewozmje znowa Hospodarske spěchowanje Sakskeje. Jednaćel towaršnosće Thomas Horn wočakuje statysacy wopytowarjow a tójšto zajimawych a napjatych rozmołwow. Zeleny tydźeń zarjaduja wot lěta 1926.