Dowolnicy rady z ćahom po puću
Ze zhromadnym projektom ,,Management turistiskeje mobility“ chcetej Zaměrowy wobchadny zwjazk Hornja Łužica-Delnja Šleska (ZVON) a Marketingowa towaršnosć Hornja Łužica-Delnja Šleska (MGO) zjawny bliskowobchad a turistiske poskitki wušo mjez sobu splesć.
Budyšin (SN). Wažny zakład projekta, kotryž Swobodny stat Sakska po 80 procentach spěchuje, je naprašowanje mjez wužiwarjemi zjawnych wobchadnych srědkow. Něhdźe 800 ludźi běše so wobdźěliło. Wuslědki podawaja wažne dopóznaća hladajo na zaměr projekta.
Na kubłanskich wikach swój horicont rozšěriłoj
Stuttgart. Pod hesłom „Demokratija trjeba kubłanje – kubłanje trjeba demokratiju“ su so kubłanske wiki „Didacta“ minjeny tydźeń w Stuttgarće wotměli. W pjeć halach předstajichu so tři hłowne wobłuki wikow: zažne kubłanje, šula a powołanske kubłanje. Akterojo prezentowachu šěroki spektrum temow kołowokoło kubłanja, na přikład móžnosće wuhotowanja rjadowniskich rumnosćow, spěchowanja heterogenity mjez šulerjemi abo podpěry studentow při studiju a referendariaće hladajo na zawěsćenje a financy. Wustajerjo poskićachu wjele inspiracijow a idejow nastupajo samostatne wuknjenje. Tójšto poskitkow su z pomocu kumštneje inteligency wuwili, a dóstachu na to wot wopytowarjow direktny feedback.
Jejka debić
Budyšin (SN/VaŽ). Spěchowanski kruh za serbsku ludowu kulturu z.t. přeprošuje na 72. wubědźowanje wo najrjeńše serbske jutrowne jejko w lěće 2025. Hač do 5. měrca móža dorosćeni swoje kreatiwne dźěła wotedać. Mytuja so jejka, kotrež su z tradicionelnymi gratami a mustrami z jednej ze sćěhowacych serbskich technikow zhotowjene: wóskowanje, bosěrowanje – wobě jědno- a wjacebarbnje –, škrabanje a wužrawanje. Je móžno, tež wjacore techniki kombinować.
Wobdźělnicy njech zapodadźa kolekciju, kotraž wobsteji z třoch wudutych kokošacych jejkow. Motiwy na nich měli być swójske kreatiwne kreacije, kotrež bazuja na swójbnych a regionalnych tradicijach.
Zajimcy móža je z póštu pósłać abo na wšelakich městnach wotedać: pola Spěchowanskeho kruha za ludowu kulturu z.t. w Budyšinje, w Serbskej kulturnej informaciji w Budyšinje, w „Lódce“ w Choćebuzu kaž tež w regionalnych běrowach Domowiny. Najrjeńše kolekcije so we wustajeńcy prezentuja a dobyćerjo dóstanu připóznaće za swoju wuměłsku kmanosć. Projekt spěchuje Załožba za serbski lud, kotraž dóstawa kóžde lěto přiražki z dawkowych srědkow.
Ludźom w nuzy dale zamołwiće pomhać
Wojerecy (AK/SN). Z wjace hač 172 000 zasadźenjemi wob lěto pomha Wojerowska wuchowanska centrala na wuchodźe Sakskeje ludźom w nuzy a zamołwiće dźěła. „Transformacija je so poradźiła“, měni nawoda centrale Stefan Schumann na swjedźenju 10lětneho wobstaća. Straža je za bywše stejnišća we Wojerecach, Budyšinje, Běłej Wodźe, Zhorjelcu a Lubiju zamołwita. Wuchowanska straža je jedne z pjeć wodźacych centralow Sakskeje. Wšědnje 24 hodźin koordinuja sobudźěłaćerjo straže něhdźe 500 zasadźenjow a wjedu 300 telefonatow. Wažni partnerojo su wuchowanske słužby, kliniki, wohnjowe wobory, Techniski pomocny skutk, Maltezojo a dalše organizacije, zarjady a zarjadnišća.
Perspektiwisce zaso wjace dźěći
Budyšin (SN). W Budyskim wokrjesu so dale a mjenje dźěći w pěstowarnjach hlada. Samsny čas pak ličba dźěći w hortach přiběra. Dokelž ličba žonow, kotřiž maja starobu za porodźenje dźěći, w přichodnych lětach zaso přiběra, budźe dołhodobnje wjac porodow. Hladajo na tuchwilne wuwiće we wobłuku pěstowarnjow a hortow w Budyskim wokrjesu a prognozu přichodnych lět je wuběrk za młodźinsku pomoc Budyskeho wokrjesa zawčerawšim plan za potrjebu w pěstowarnjach wobzamknył.
Přirunujo z lětom 2023 je předewšěm mjenje dźěći w starobje hač do 3 lět. Ličba je wo dźesać procentow woteběrała. Tole je so na kubłanišća w Budyskim wokrjesu wuskutkowało, hdźež wosom procentow mjenje dźěći hladaja. Loni bydlachu w Budyskim wokrjesu tři procenty mjenje dźěći w pěstowarskej starobje. W hortach pak je ličba wobsadźenych městnow wo tři procenty přiběrała.
Přichodne lěta so mjenje dźěći narodźi. Najmjenje drje budźe jich klětu. Perspektiwisce pak liča fachowcy zaso z wjace porodami. Tónle trend ma hač do lěta 2040 trać.
Tójšto noweho na wikach
Serbowka ze swójskej praksu
Regionalne a biologiske produkty požadane
Zajim za naslědne zežiwidła w Němskej dale a bóle přiběra – to bě dopóznaće na 89. Mjezynarodnym zelenym tydźenju
„Cyłkowna ličba 310 000 wopytowarjow je naše wočakowanja přetrjechiła“, běše facit zarjadowarjow dźeń po skónčenju wikow 25 januara. To njezadźiwa, wšako je so ličba porno loni wo 13 procentow zwyšiła. Přiwšěm je wotstawk k něhdyšemu rekordej 400 000 wopytowarjow z časa do korona-pandemije hišće wulki.
Tróšku zrudny napohlad měješe wopytowar lětsa w hali za skót. Tam běchu wšitke stejnišća zwjazkow plahowarjow a za kruwy a howjada pak prózdne, pak běchu zamołwići prosće wjetše a mjeńše atrapy howjadow tam postajili. Konsekwenca to mrětwy pochromy, kotraž běše 10. januara w Braniborskej w bjezposrědnym susodstwje Berlina wudyriła. Hosćom „wutroby zawjeselili“ pak su w sakskej hali rejowarki a rejowarjo Smjerdźečanskeje rejowanskeje skupiny hnydom na prěnim dnju wikow. Tež Chróšćan dujerska kapała Horjany, kotraž je dwaj dnjej pozdźišo trójny wustup měła, je sylny přiklesk publikuma žnjała.
Hospodarski plan za lětsa steji
Budyšin (SN/VaŽ). We wobłuku lětušeho mytowanja portala booking.com bu Budyšin jako jedne z najhospodliwišich městow wuznamjenjeny. Z tym wobsadźi po cyłej Sakskej prěnje městno, w Zwjazku pak docpě třeće. Z tutej informaciju zahaji Budyski wyši měšćanosta Karsten Vogt (CDU) wčera rozmołwu z nowinarjemi. Wón dźakowaše so lokalnym hosćencarjam, hotelownikam a hosćićelam za jich přinošk, kotryž na pozitiwnych hódnoćenjach hosći bazuje.
„Etat města je wobzamknjeny a tuchwilu prawniskemu dohladej předleži“, rozprawješe nawodnica financneho zarjadnistwa města Budyšina Regine Krause. Město planuje za lětsa wudawki we wobjimje něhdźe 108 milionow eurow. Dochodow změja wjace hač 89 milionow eurow, hłownje z dawkow a powšitkownych připokazankow. „Strukturny deficit wurunamy z rezerwami“, fachowča za financy připowědźi. Do zarjadnistwa běchu někotre próstwy a namjety k wuradźowanju wo etaće dóšli. Mjez druhim dźěše wo srědki za ćopłotne planowanje.
Ličbu wjelkow wobmjezować
Podstupim (dpa/SN). Braniborske ratarske ministerstwo ma za trěbne, w nuzy tež wjelki zatřělić. To je tuchwilu hišće zakazane. Mjeztym pak je pokazkow, zo móhło so tole změnić. Statny sekretar za ratarstwo Gregor Beyer, kotryž je tuchwilu za tak mjenowany wjelči management zamołwity, rozkładźe, zo je přirunujo z kónčinami po cyłym swěće hustota wjelkow w zwjazkowym kraju najwyša. „Wuchadźam z toho, zo mamy tu něhdźe 2 000 rubježnych zwěrjatow.“ W Norwegskej, kotraž je jědnaće króć wjetša hač Braniborska, je 250 wjelkow zadomjenych. Prašenje tuž je, kelko wjelkow Braniborska znjese. Statny sekretar na tym njedwěluje, zo wjelk do Braniborskeje słuša. Tola konflikty z rubježnymi zwěrjatami přiběraja. Ratarjo a škitarjo zwěriny hižo wjacore lěta wo tym diskutuja, kak z wjelkom wobchadźeć.
Škitny status na runinje EU so w přichodźe po wšěm zdaću zniži. Za to pak ma so prawo EU změnić. Hakle po tym budźe móžno, aktiwnje zapřimnyć a ličbu wjelkow w Braniborskej regulować. Gregor Beyer wuchadźa z toho, zo móhło snano hižo klětu tak daloko być.
