Berlin/Halle (dpa/SN). Wokrjesne rjemjeslnistwo Halle-Solawski wokrjes w Saksko-Anhaltskej je zwjazkoweho kanclera Olafa Scholza (SPD) namołwiło, wšitke sankcije přećiwo Ruskej skónčić. W zjawnym lisće, kotryž je Redakciskej syći Němska (RND) wčera předležał, žadaja sej rjemjeslnicy nimo toho jednanja wo zakónčenju wójny přećiwo Ukrainje.

„Wěmy jako rjemjeslnicy z mnohich rozmołwow ze swojimi kupcami, zo wulka wjetšina zwólniwa njeje, za Ukrainu swój ćežko nadźěłany žiwjenski standard woprować. To tež naša wójna njeje!“, rěka tam, a dale: „Chceće Wy tón kancler być, kotryž je Němsku do ruina ćěrił, chceće woprawdźe swój kraj woprować?“ Wo­krjesne rjemjeslnistwo kritizuje nadpad Ruskeje na Ukrainu jako ćežke złóstnistwo a „jasne zranjenje artikla 2 Charty UN“.

Budyšin (SN). Kwětki žiwjenje wobohaćeja a ludźi zawjeseleja – ale přiwšěm so dźěłarnistwo twarstwo-agrar-wobswět (IG BAU) wo přistajenych w tymle wobłuku chětro starosća. Něhdźe 180 ludźi, kotřiž w Budyskim wokrjesu w kwětkowych wobchodach a zahrodowych centerach dźěłaja, po wobkedźbowanju IG BAU často lědma wjace hač dźesać eurow na hodźinu njezasłužeja. Pytajo za wyšimi mzdami móhli mnozy z nich bórze branšu wopušćić, warnuje dźěłarnistwo floristikarjow. „Mjeztym zo jich koleginy w zapadnej Němskej hižo nětko hodźinsku mzdu 13 eurow dóstawaja maja floristki na wuchodźe wo wjele mjenje dochodow. To je samo daloko pod zakonskej minimalnej mzdu dwanaće eurow, kotraž wot oktobra po cyłym zwjazku płaći“, wu­zběhny wobwodny předsyda IG BAU wuchodna Sakska Roland Müller. Dźiwać so tuž nichtó njetrjeba, jelizo so přistajeni za druhim dźěłom rozhladuja a swoje powołanje hižo njewukonjeja.

Płaćizny za płun a wolij stupaja a stupaja. Mnozy ludźo so starosći a pyta za alternatiwami, z čim a kak móhli přichodnje tepić. Mjeztym je nawal na wšitke palne maćizny kaž drjewo, drjewjane pelety abo brikety jara wulki, štož tež briketownja w Čornej Pumpje začuwa, hdźež z połnej paru produkuja. Naprašowanje za briketami budźe zawěsće hišće dale přiběrać. Tele dny su mnozy ludźo swoje nowe měsačne wotpłaćenki za płun dóstali a so zawěsće wustróžili, wšako zwěsćichu zdźěla tři króć wyšu ratu hač do toho. Trochu zboža maja ći, kotřiž w bydlenju hišće swójske kachle maja a je zawěsće přichodnje wužiwaja, kaž ženje do toho. Nadźijomnje maja woni dosć drjewa a briketow na składźe, wšako budźetej surowiznje hišće požadanišej. Za łužisku briketownju woznamjenja to dalši nawal kupcow, wšako budźe bórze jenička tajka po cyłej Němskej. Brikety wottam su „łužiske čorne złoto“, konjunktura to, z kotrejž mnozy hižo ličili njejsu. Bianka Šeferowa

Drježdźany (dpa/SN). Wuslědki pruwowanjow na sakskich šulach wostanu stabilne. W šulskim lěće 2021/2022 zmištrowachu kaž loni hižo 97 procentow šulerkow a šulerjow swoje zakónčace pruwowanja wuspěšnje. To zdźěli wčera sakske kultusowe ministerstwo w Drježdźanach. „Najebać wulke wužadanja we wšědnym šulskim dnju je so poradźiło, šulerki a šulerjow na dobre zakónčenje přihotować. Za to sym wšitkim wobdźělenym jara dźakowny“, wuzběhny sakski kultusowy minister Christian Piwarz (CDU).

Znamkowy přerězk na gymnazijach po cyłej Sakskej wučinješe lětsa 2,07 (loni: 2,08). W minjenym šulskim lěće je 486 (lětodo toho: 434) sakskich šulerkow a šulerjow ze znamku 1,0 maturowało. Na 51 sakskich powołanskich gymnazijach dósta 92,7 procentow absolwentow wuswědčenje powšitkowneje wysokošulskeje zrałosće. Znamkowy přerězk wučinješe 2,27 (loni: 2,26). Na zjawnych wyšich šulach a wječornych wyšich šulach su 97,2 procentaj, to je něhdźe 14 100 šulerkow a šulerjow, realnošulske wotzamknjenje dóstało.