Natwarja na nazhonjenja
Apoteka ma dołhe stawizny a wot spočatka lěta nowu nawodnicu
Kulow (AK/SN). Worjołska apoteka słuša k markantnym twarjenjam Kulowskeho torhošća. Jeje stawizny sahaja hač do lěta 1854. „W tutym domje sym wotrostła a znaju apoteku, dołhož móžu myslić“, powěda Claudia Kupcyna z Łazka. Mjeztym 31 lět wona w apotece dźěła. Jeje mać Dorothea Görigkowa je apoteku wot 1970 do 1990 nawjedowała. Po tym přewza Marlies Graudußus nawodnistwo domu a jón wot rukowaćelnje kupi. 1993 su dom a apoteku wobšěrnje saněrowali. Wot spočatka 2022 nětko Elisa Gedan Kulowsku apoteku nawjeduje. Přistajenych ma wona inženjerce za farmaciju, techniskej asistentce, farmaceutiskotechnisku asistentku a posołku. Něhdźe 4 500 lěkow maja w sortimenće. Ludźo jězdźa ze Sernjan a Róžanta runje tak do Kulowa kaž z Wóslinka, Jitra a Skaskowa. Předewšěm starši pacienća sej waža, zo posołka skazane medikamenty ludźom domoj wozy.
Němsko-pólski zwjazk załoženy
Zhorjelc (SN/BŠe). Po wjele lětach přihotow su nětko 14 čłonow wopřijacy mjezu přesahowacy zwjazk Němsko-pólski geopark Mužakowski zahórk załožili. Jeho zaměr je koordinować, spěchować a wolóžić zhromadne dźěło na dobro naslědneho wuwića geoparka. Na konstituowacym posedźenju minjenu póndźelu su sobustawojo z Pólskeje, Braniborskeje a Sakskeje wažne zakłady kooperacije wobzamknyli, tak zo móže zwjazk bórze dźěłać započeć. Čestnohamtski prezident je Tadeusz Jędrzejczak. Hłowne sydło zarjaduja w Małym Kólsku (Klein Kölzig), kaž nowinska rěčnica Zhorjelskeho wokrjesa Franziska Glaubitz wčera informowaše. Dale su sobustawojo rozsudźili hłownohamtskeho direktora přistajić.
Ze stron Sakskeje je Zhorjelski krajny rada Bernd Lange (CDU) w zwjazku zastupjeny. Dalše sobustawske komuny su Brody, Łęknica, Przewóz, Trzebiel, Tuplice, Żary, ale tež wojewódstwo Lubuskie w Pólskej. Braniborsku zastupuja gmejny Dolina Nysy a Małksy, Feliksowy jězor a wokrjes Sprjewja-Nysa. Dalšej sakskej čłonaj stej město Běła Woda a gmejna Jabłońc (Gablenz) w Zhorjelskim wokrjesu.
Awstralska firma budźe w Čornej Pumpje produkować
Zhotowjenje baterijowych materialow wuwiwa so dźakowano změnje k elektro-mobiliće na industriju přichoda. Runje łužiski brunicowy region w tymle wobłuku dźeń a wjetšu rólu hraje.
Čorna Pumpa (dpa/SN). Předewzaće Altech Industries Germany tzwr chce w Čornopumpskim industrijnišću na 14 hektarow wulkej płoninje produkciske stejnišćo za naworštowanje wysokowukonitych litiumowo-ionowych baterijow twarić. Plany za to je předstejićel Uwe Ahrens wčera w Čornej Pumpje rozłožił. Němska wotnožka awstralskeho koncerna Altech Chemical chce hač do 500 milionow eurow do projekta inwestować. Něhdźe 150 dźěłowych městnow ma nastać. Po słowach Uwy Ahrensa trjebaja procesowych technikarjow, logistikarjow a dalšich motiwowanych ludźi z regiona.
W Zejicach ma bistro nastać
Zo dóstanu wuknjacy Ralbičanskeje zakładneje a wyšeje šule wšědnje připoł-dnju, čemuž druhdźe tak njeje, čerstwje nawarjeny wobjed, maja woni za samozrozumliwe. Wo to so mjeztym štwórte lěto Helery Hančik stara. Nětko ma wón nowe plany.
Ralbicy (aha/SN). W Ralbičanskej šulskej kuchni warja tež za šulerjow w Chrósćicach a za dźěći w šěsć pěstowarnjach, mjez druhim w Njeswačanskej. Mjez dźesać přistajenymi w Ralbicach je pjeć wučenych kucharjow. Zhromadnje so woni wo to staraja, zo warja wšědnje nimale 700 porcijow słódneje jědźe, štož sej tež wjele wuměnkarjow waži.
We wobłuku VVO płaći wuwzaće
Potenciale spóznać a je wužiwać
We wobłuku modeloweho projekta sakskeho ministerstwa za energiju, škit klimy, wobswět a ratarstwo přepytuja tuchwilu přetrjebu energije w komunalnych twarjenjach. Gmejny nadźijeja so z toho jednanskich konceptow, zo móhli inwesticije zmysłapołnje planować.
Drježdźany/Rakecy (SN/BŠe). Sakske statne ministerstwo za energiju, škit klimy, wobswět a ratarstwo zahaji spočatk januara modelowy projekt, z kotrymž přepytuje přetrjebu energije w komunalnych objektach. W Budyskim wokrjesu su to nimo Budyšina, Kamjenc, Kinspork, gmejny Bukecy, Rakecy, Wóslink, Šěrachow-Korzym a Smělna-Póckowy. Wokrjes a přisłušna sakska energijowa agentura SAENA projekt přewodźatej a přewozmjetej rólu regionalneho multiplikatora. Zhromadnje z eksternym energijowym coachom budu energijowe daty hač do kónca apryla zběrać a z wosebitej software wuhódnoćić.
Loni wjele wody za zapławjenje jězorow było
Zły Komorow (SN/BŠe). Łužiska a srjedźoněmska towaršnosć hórnistwoweho zarjadnistwa (LMBV) zhladuje na wuspěšne lěto předewšěm hladajo na zapławjenje tudyšich jězorow. Něhdźe 130 milionow kubiknych metrow wody su za to wužiwali, kaž LMBV informuje. Porno minjenym lětam z trajacej suchotu bě loni wjele wjace wody k dispoziciji. W lěće 2018 bě to mjenujcy jenož 58 milionow kubiknych metrow wody, před dwěmaj lětomaj podachu fachowcy LMBV ličbu 78 milionow a w lěće 2020 cyłkownje 63 milionow kubiknych metrow wody.
Dźěłowe wiki snadnje wolóžene
Wuchodosakske dźěłowe wiki su so 2021, w druhim lěće koronapandemije, snadnje wočerstwili. Wo tym informowaše dźensa Budyska wotnožka agentury za dźěło.
Budyšin (SN/at). Bjezdźěłnosć we wuchodnej Sakskej je w běhu minjeneho lěta woteběrała. W decembrje 2021 bě 1 239 ludźi mjenje bjez přistajenja hač kónc lěta 2020. To wuchadźa z aktualnych ličbow dźěłowych wikow, kotrež je Budyska agentura za dźěło dźensa wozjewiła. W decembrje bě tam 16 896 bjezdźěłnych, 683 resp. 4,2 procentaj wjace hač w nowembrje. Minjeny měsac mějachu poradźowarjo dźěłoweho zarjada 5 135 socialneho zawěsćenja winowatostnych dźěłowych městnow k dispoziciji. Jich bě 81 mjenje hač w nowembrje, ale 537 wjace hač w decembrje 2020.
Originelne sportowe stacije za trenowanje přepodali
Nimješk (AK/SN). Zaměrowy zwjazk braniborska Łužiska jězorina hódnotu Złokomorowskeho jězora dale stopnjuje. To podšmórny referentka předsydy zwjazka a zamołwita za marketing Dana Hüttner.
Minjene dny je zaměrowy zwjazk zhromadnje ze zastupnikami a zastupnicami města Zły Komorow (Senftenberg) tři tak mjenowane aktiwnotreningowe stacije při jězoru zjawnosći přepodał. Při Nimješćanskim (Niemtsch) přibrjohu maja zdobom staciju z wisatym rěblom. Při wuhladnej wěži na juhu jězora je naćahowanska stacija a při přibrjohu w Košynje (Großkoschen) je nastała tak mjenowana treningowa stacija za swójsku wahu. Wšitke tři stacije buchu z pomocu spěchowanja z programa Leader zhotowjene a spočatk decembra na wotpowědnych městnach nastajene. Zajimcy móža wšitke tež w zymje wužiwać.
Znowa mytoLEX wupisane
Běła Woda (SN/JaW). Hospodarska iniciatiwa Łužica (WiL) pyta z wubědźowanjom „Łužiscy załožerjo eksistencow – LEX“ tež 2022 najlěpši hospodarski koncept šulerkow a šulerjow z regiona. Wo tym informuje jednaćel WiL Michael Schulz w nowinarskej zdźělence.
„Łužiska młodźina ma telko dobrych idejow. Tajke chcemy znowa z pjenježnymi mytami podpěrać. Zdobom chcemy tak hižo zahe zajim šulerjow a šulerkow zbudźić, sej pozdźišo sami zawod załožić abo firmu w naslědnistwje přewzać. Šulerske wubědźowanje je tohorunja motiwacija młodym ludźom, so ze zawodnymi prašenjemi rozestajeć a z tak zdobytej wědu w najlěpšim padźe wuspěšny hospodarski model zwoprawdźić“, tak Schulz.
Tež w štwórtym nakładźe LEX-wubědźowanja maja šulerki a šulerjo swójske zawodne ideje koncepcionelnje wuwić. Wubědźowanje móže wobstatk šulskeje wučby abo wólnočasneje zaběry być. Wobdźělić móža so šulerki a šulerjo z Łužicy wot 8. lětnika. Swoje koncepty zapodać, móža zajimcy a zajimče hač do 30. junija w běrowomaj WiL. Dalše informacije su pod: wozjewjene.
