K zarjadowanjam zežiwjenskeho a zeloweho centruma z wobswětowej a wučbnej zahrodu w klóštrje Marijinej hwězdźe słušeja projektowe dny za šulerjow a seminary.
Pančicy-Kukow (SN/mwe). Tysacy ludźi ze wšěch kónčin Němskeje, mjez nimi tójšto turistow, wopytuja lěto wob lěto w Pančicach-Kukowje klóštersku zahrodu. Za nju a tam wotměwace so zarjadowanja steji Miłočanski Křesćanskosocialny kubłanski skutk (CSB) na čole. Nimo swójbneho dožiwjenskeho dnja, zahajenja zahrodoweje sezony, klóšterskeho a swójbneho swjedźenja Budyskeho wokrjesa a nic naposledk zahrodoweje nocy a zeloweje njedźele stej tež nalětni koncert z chórom Lipa a koncert dujerskeje kapały Horjany mnohim kóžde lěto krutej terminaj.
Wojerecy (SN/mwe). Z koncertom mytowanych běchu minjenu sobotu lětuše 27. regionalne wubědźowanje Sakska/Łužica „Młodźina hudźi“ w awli Wojerowskeho Lessingoweho gymnazija wuspěšnje zakónčili. Na połnje wobsadźenej žurli přepodachu najlěpšim hudźbnym talentam wosebite myta. Hnydom dwě myće, wosebite Wojerowskeho Lions kluba a wosebite Wojerowskeho wyšeho měšćanosty Stefana Skory (CDU), dósta sydomlětny Emil Weißig z Huski. Wšako bě na gitarje hrajo jurorow tak přeswědčił, zo dachu jemu z 25 najwjetšu ličbu móžnych dypkow.
Wojerecy (SN/MiR). Dźesać šulow ze Sakskeje wobdźěla so na iniciatiwje zwjazkoweho ministerstwa za kubłanje a slědźenje kaž tež zwjazkowych krajow „Leistung macht Schule“. Su to kubłanišća primarneho a sekundarneho schodźenka. Iniciatiwa měri so wosebje na wukonliwych a potencielnje wukonokmanych šulerjow. Po cyłej Němskej je 300 zakładnych a wyšich šulow kaž tež gymnazijow zapřijatych. Zwjazk a kraje chcedźa projekt z 125 milionami eurow spěchować.
Stróža (AN/SN). We wobłuku dalšeho pohłubšenja znajomosćow wo mjenodawarju swojeje šule podachu so šulerjo 8. a 10. lětnika Kulowskeje Wyšeje šule „Korla Awgust Kocor“ ze swojej wučerku serbšćiny Ines Lešowej tele dny do Stróžanskeho šulskeho muzeja. Tam bě Kocor dźesać lět jako wučer skutkował.
Domizniske towarstwo Radiška so hižo wjele lět wuspěšnje prócuje, Kocorowe skutkowanje we wsy žiwe zdźeržeć. Šulerjo dóstachu na jara zajimawe wašnje zaćišć wo tym, w kotrej wokolinje a pod kotrymi wuměnjenjemi bě Kocor swój čas dźěłał. Zamołwita domizniskeho towarstwa Radiška za Stróžanski šulski muzej Marlis Konjechtec to holcam a hólcam jara nazornje a emocionalnje zbliži. Cyle praktisce šulerjo to nazhonichu, jako so do starych šulskich ławkow zesydachu a z pjerom pisać spytachu.
Kulowscy šulerjo běchu lětsa prěni wopytowarjo w Stróžanskim šulskim muzeju. W nim su loni nowe tepjenje zatwarili, nuzniki přetwarili a bjezzadźěwkowy zachod natwarili.
Serbska wyša šula Worklecy „Michał Hórnik“ zhladuje na 115 lět wobstaća. Milenka Rječcyna je so z wjelelětnym šulskim nawodu Křesćanom Korjeńkom rozmołwjała. Jemu a wučerjam kubłanišća stej zhromadnosć a zrozumjenje jedyn za druheho jara wažnej.
Na spočatku chcemy zhonić někotre ličby. Kelko wučerjow skutkuje tuchwilu na wašej wyšej šuli?
K. Korjeńk: Mamy tuchwilu 20 wučerjow na našim kubłanišću. Sym zbožowny, zo njetrjebamy někajkich personalnych wuskosćow dla wučbu skrótšić abo samo wupadnyć dać. Móžemy wučbu we wšitkich předmjetach zaručić. Wšitcy wučerjo móža w serbskej rěči wuwučować, kaž žada sej to koncepcija 2plus, kotruž na našej šuli zwoprawdźamy.
Kajki je poměr mjez maćernorěčnymi a tymi šulerjemi, kotřiž přińdu z měšano- abo němskorěčnych staršiskich domow?
Drježdźany (SN/at). Dwanaće šulow je prěnju etapu we wubědźowanju wo 4. sakske šulske myto wuspěšnje wobstało, kaž kultusowe ministerstwo dźensa w Drježdźanach informuje. Jako jeničkej z Budyskeho wokrjesa je so to Swobodnej křesćanskej šuli Šěrachow poradźiło.
Čłonojo jury kubłanišća přichodne tydźenje wosobinsce wopytaja. Dohromady 67 šulow bě swoje požadanje zapodało. Bohužel njebě mjez nimi žana serbska abo tajka z wučbu serbšćiny, kaž Katrin Beyer z Krajneho zarjada za šulu a kubłanje, stejnišćo Radebeul, na naprašowanje našeho wječornika zdźěli. Kultusowy minister Christian Piwarz (CDU), kiž lawreatow 14. meje počesći, je zahorjeny wo zapodatych wurjadnych projektach. Wone dopokazuja, zo je šula wosebite městno wuknjenja.
Malešecy (CRM/SN). Wospjet je Malešanska pěstowarnja „K wódnemu mužej“ w nošerstwje Serbskeho šulskeho towarstwa za swójbnych swojich chowancow kaž tež za wšěch wjesnjanow lětsa ptačokwasny swjedźeń wuhotowała.