47 maturantow Budyskeho Serbskeho gymnazija (SGB) je sobotu w Chróšćanskej „Jednoće“ swoje wuswědčenje z rukow­ direktora kubłanišća Renéja Wjacławka přijało.

Chrósćicy (SN/JaW). Swjedźenski rěčnik Michał Cyž namołwješe wotchadnikow, čas njebrojić, ale jón zmysłapołnje wužiwać. „Štož móžeće, čińće hnydom! Nješkodźi ničo, tež raz něšto wobžarować. Podać so pak njeje žana opcija“, wón jim přiwoła, a doda, zo njeńdźe z nadźiju samej, něšto zwoprawdźić.

Dźesać ze 47 wotchadnikow Budyskeho Serbskeho gymnazija chce wučerstwo studować a ma dojednanje z Krajnym zarjadom za šulu a kubłanje (LaSuB) w zaku. Mam to za spomóžne prócowanje Serbskeho šulskeho towarstwa a LaSuB, wotchadnikow za powołanje wučerja zdobyć. W Budyšinje je to hižo z tradiciju, a ta je z přikładom. Kaž zdźěli sobudźěłaćer zarjada Bosćij Handrik, chcedźa to po wšej Sakskej praktikować. Předsydka SŠT Ludmila Budarjowa skedźbni hišće raz na noworjadowanje w přizwolenju za studij wučerstwa. Serbskorěčni zajimcy maja lěpšinu a dóstanu abi-přerězk wo znamku polěpšeny. To zbudźa na jednym boku diskusije wo tym, hač je to prawy puć, wjac wučerjow dóstać. Na tamnym boku měli tež rozmyslować, hač je numerus clausus za studij wučerstwa trěbny, hdyž telko pedagogow pobrachuje. Wšako móže so tež maturant ze špatnišim přerězkom z wuběrnym wučerjom stać. Janek Wowčer

Budyšin/Ralbicy (JK/SN). Dalši zhromadny projekt UNESCO-šulow su wčera w Budyšinje zahajili. Zamołwitaj wučerjej hosćićelskeje Ralbičanskeje šule Fran­ciska Wróblowa a Michał Wałda witaštaj wučerjow a šulerjow z Lipska, Münstera a Grevenbroicha. Hač do njedźele chcedźa so z tym rozestajeć, kak so ratarstwo na wuwiće klimy a wobswěta wuskut­ku­je, a chcedźa pytać za móžnosćemi, kak hodźitaj so čłowjek a přiroda ze strowym wobswětom a zmysłapołnym ratarjenjom škitać. W přichodnych dnjach wopytaja wobdźělnicy mjez druhim ratarske zawody wšelakich hospodarskich formow a zeznajomja so w Njebjelčicach, Hrańcy a Nuknicy z produkciskimi wašnjemi tamnišich předewzaćow skótneje produkcije. Z toho chcedźa sej zdobyć dohlad a wědu wo škiće klimy a wobswěta z ekologiskimi a přirodnymi formami ratarjenja. Nimo toho chcedźa wšelake formy hospodarjenja a jich wuskutki na rolu, přirodu a wobswět přirunać. Bjezposrědni wuskutk toho dodnja sej z probami pódy, kotrež na polach ratarskich zawodow bjeru. W Ralbičanskej šuli proby jutře wuhódnoća.

Starši a dźěći chcedźa zadźěwać, zo dyrbi přidružnik šulu wopušćić

Łaz (CK/SN). Sakska pyta młodych a zahorjenych wučerjow. Za tajkeho maja šulerjo a starši Daniela Volkmera, kiž na Łazowskej wyšej šuli hudźbu a němčinu podawa. W přichodnym šulskim lěće 2018/2019 pak to po wšěm zdaću hižo njebudźe, znajmjeńša nic na samsnym kubłanišću. Přećiwo tomu su starši a šulerjo spočatk tydźenja protestowali a při haće napřećo šuli demonstrowali.

Daniel Volkmer je germanistiku a hudźbu studował. Wón je kantor w Rěčicach a skutkuje wot lońšeho decembra na Łazowskej šuli jako přidružnik. Na dnju ­wotewrjenych duri w februaru bě nawodnica šule Margit Hypko hišće ­rjekła, zo z nim škałobu začinja a „zo so wjesela, zo tu je“.