W zajimje stroweho wobswěta po puću
Budyšin/Ralbicy (JK/SN). Dalši zhromadny projekt UNESCO-šulow su wčera w Budyšinje zahajili. Zamołwitaj wučerjej hosćićelskeje Ralbičanskeje šule Franciska Wróblowa a Michał Wałda witaštaj wučerjow a šulerjow z Lipska, Münstera a Grevenbroicha. Hač do njedźele chcedźa so z tym rozestajeć, kak so ratarstwo na wuwiće klimy a wobswěta wuskutkuje, a chcedźa pytać za móžnosćemi, kak hodźitaj so čłowjek a přiroda ze strowym wobswětom a zmysłapołnym ratarjenjom škitać. W přichodnych dnjach wopytaja wobdźělnicy mjez druhim ratarske zawody wšelakich hospodarskich formow a zeznajomja so w Njebjelčicach, Hrańcy a Nuknicy z produkciskimi wašnjemi tamnišich předewzaćow skótneje produkcije. Z toho chcedźa sej zdobyć dohlad a wědu wo škiće klimy a wobswěta z ekologiskimi a přirodnymi formami ratarjenja. Nimo toho chcedźa wšelake formy hospodarjenja a jich wuskutki na rolu, přirodu a wobswět přirunać. Bjezposrědni wuskutk toho dodnja sej z probami pódy, kotrež na polach ratarskich zawodow bjeru. W Ralbičanskej šuli proby jutře wuhódnoća.
Za wučerja demonstrowali
Starši a dźěći chcedźa zadźěwać, zo dyrbi přidružnik šulu wopušćić
Łaz (CK/SN). Sakska pyta młodych a zahorjenych wučerjow. Za tajkeho maja šulerjo a starši Daniela Volkmera, kiž na Łazowskej wyšej šuli hudźbu a němčinu podawa. W přichodnym šulskim lěće 2018/2019 pak to po wšěm zdaću hižo njebudźe, znajmjeńša nic na samsnym kubłanišću. Přećiwo tomu su starši a šulerjo spočatk tydźenja protestowali a při haće napřećo šuli demonstrowali.
Daniel Volkmer je germanistiku a hudźbu studował. Wón je kantor w Rěčicach a skutkuje wot lońšeho decembra na Łazowskej šuli jako přidružnik. Na dnju wotewrjenych duri w februaru bě nawodnica šule Margit Hypko hišće rjekła, zo z nim škałobu začinja a „zo so wjesela, zo tu je“.
Wosebity wuznam serbšćiny
Wojerowski Lessingowy gymnazij je konsultaciske kubłanišćo za spěchowanje wukonliwosće wšitkich šulerjow
Wojerowski Lessingowy gymnazij so profiluje, wukonosylnych a potencielnje wosebje zamóžliwych šulerjow spěchować. Milenka Rječcyna je so z nawodnicu kubłanišća Katharinu Michelfeit rozmołwjała.
Wukonosylni šulerjo pokazuja swoje zamóžnosće w mnohich předmjetach. Kak pak pokazuja to šulerjo, kotrychž maće za wosebje zamóžliwych?
Swjedźeń RCW zdobom dalekubłanje był
Budyšin (SN/MiR). 20 lět hižo skutkuje w Serbach model Witaj. Za Rěčny centrum WITAJ bě to přičina, přeprosyć kubłarki a kubłarjow wšitkich serbšćinu nałožowacych kubłanišćow Hornjeje Łužicy na swjedźeń a dalekubłanje w Budyskim Serbskim domje. Hesło zarjado- wanja wčera popołdnju bě: „20 lět Witaj – dale tak!?“ Na wšě 35 zajimcow – kubłarki a kubłar, sobudźěłaćerki RCW, wučerjo Serbskeje fachoweje šule za socialnistwo Budyšin kaž tež iniciatoraj Witaj-hibanja Jan Bart a Jadwiga Wejšina – je přišło. Wědomostna sobudźěłaćerka RCW Jadwiga Kaulfürstowa předstaji jim dźěłowy zešiwk ke katalogej kwalitatiwnych kriterijow k spěchowanju a posrědkowanju serbšćiny w dźěćacych dnjowych přebywanišćach Sakskeje. Katalog předleži mjeztym w hornjo- a delnjoserbšćinje kaž tež w němčinje, aktualny dźěłowy zešiwk hornjo- a delnjoserbsce. Na cyle nazorne wašnje Kaulfürstowa rozłoži, kak móža kubłarki z pomocu zešiwka kwalitu swojeho skutkowanja na polu serbšćiny stopnjować.
Bonus přesadźić
Drježdźany (SN/MiR). Lipšćanska uniwersita kaž tež Techniskej uniwersiće Drježdźany a Kamjenica nałožuja nětko wšitke tři bonusowe rjadowanje za serbskorěčnych zajimcow, kotřiž chcedźa wučerstwo studować. Techniskej uniwersiće stej online-maski za požadanje za wšitke wobmjezowane předmjety a směry za studij wučerstwa wo polo „pohłubšace znajomosće serbšćiny“ rozšěrili. Na Lipšćanskej uniwersiće móža zajimcy we wobłuku online-požadanja z pomocu portala za studowacych AlmaWeb z wosebitej próstwu pohłubšene znajomosće serbšćiny dopokazać.
Čitać a sej w nocy Budyšin zbližić
Budyšin (SN/MiR). 18 šulerjow 3. a 4. lětnika měješe w nocy wot pjatka na sobotu wosebite dožiwjenje w Budyšinje. Němsko-Serbske ludowe dźiwadło a Rěčny centrum WITAJ stej mjeztym 12. króć na čitansku nóc do Dźiwadła na hrodźe přeprosyłoj. Wabić za projekt je lědma trěbne. Rěčny centrum WITAJ posrědkuje kóžde lěto flajer šulskim nawodam, wučerjo šulerjow informuja a starši swoje dźěći přizjewja. Městna su požadane, tak zo maja čakansku lisćinu.
Dźěći ze wšitkich serbskich zakładnych šulow, z Worklec, Ralbic, Radworja, Pančic-Kukowa, Chrósćic a Budyšina běchu so za čitansku nóc přizjewili, kotraž lubješe wosebite dožiwjenja. Pjatk nawječor so we wobłuku z hrami mjez sobu zeznachu a připrawichu sej button ze swojim mjenom. Po wječeri wuslědźichu cyłe dźiwadło, wot pincy hač pod łubju, wobhladachu sej klankowy fundus, probowe rumnosće kaž tež wulke a małe jewišćo. Po tym dožiwichu probu kónčneho wobraza lětušeho lětnjeho dźiwadła „Olsenowa cwólba wotzběhnje“. Na to pak čitachu kóždy a kóžda wurězki ze serbskeje knihi wšitkim tamnym wobdźělnikam projekta.
Wóslinčanskim šulerjam serbšćina wažna
Wóslink (SN/mwe). „Dźěćom a swójbam, kotrež chcedźa, zo so na Ewangelskej srjedźnej šuli Wóslink serbšćina podawa, je to žiwa domizna. Přiběrace naprašowanje pokazuje, zo smy na prawym puću a zo je zajimcam wažne, serbšćinu wuknyć móc. Wšako słuša wona k jich žiwjenju a wobswětej, a tomu měło tak wostać“, předsyda Wóslinčanskeho šulskeho towarstwa Henry Nitzsche podšmórnje.
Swět fantazije wabił
Zetkanje swójbow na swjedźenju Serbskeho šulskeho towarstwa
Hórki (SN/MiR). Napřećo Hórčanskemu sportnišću je so wčera popołdnju wulka syła swójbow zešła. Serbske šulske towarstwo bě na swój 13. swójbny swjedźeń přeprosyło. Wosebitosć lětušeho podawka bě, zo steješe pod hesłom „Swět fantazije“. Mnohe dźěći, ale tež kubłarki běchu so swój najlubši kostim woblekli. „Smy so tónraz rozsudźili, swjedźeń hinak hač hewak wuhotować. Njemějachmy kaž dotal program dźěći ze wšelakich pěstowarnjow, ale wjacore překwapjenki za našich chowancow“, rjekny předsydka SŠT Ludmila Budarjowa. Nam bě wažne dźěćom zmóžnić, zo su kreatiwne. Zdobom su zhromadnje ze staršimi rjane dožiwjenja měli.“
Wotrow wołał: Sportej zdar!
Takle rěkaše njedawno na Wotrowskim sportnišću. Kubłarki a kubłarjo serbskeje pěstowarnje „Dźěćacy raj“ běchu dźěći a jich staršich na zhromadny sportowy swjedźeń přeprosyli. Nawodnica pěstowarnje Hańžka Nawcyna móžeše nimale połsta wobdźělnikow witać. Sportowy swjedźeń bě zdobom přiležnosć dźeń nana, dźeń maćerje a dźeń dźěsća hromadźe swjećić.
K zazběhej bě sej kubłar Chrystof Šołta někotre zwučowanja k sćoplenju přemyslił. Tak zestupachmy so do wulkeho kruha a kružachmy při rjanej hudźbje z ramjenjomaj: Skakachmy kašporka a smy k lóštnej zabawje wšelakore hry přewjedli. Te běchu sej kubłarjo přemyslili. Tak dyrbjachu starši swoje dźěći na karu sadźić a je z druhim mustwom napřemo wozyć. Při napřemoběhu z pjericomaj (Flossen) běchu nanojo wosebje wužadani. Maćerje přizamknychu so we wubědźowanju z wobručemi.
Wjeršk swjedźenja bě kopańca nanow z dźěćimi. Dobra nalada na sportnišću je tež wjesnjanow přiwabiła a woni su zhromadnje z maćerjemi mustwa pohonjeli. Na kóncu je wšitkim mały imbis z Bulankec pjekarnje zesłodźał. Felizitas Birkhofenowa
Młodostna stara so rady wo dorost
Hižo jako dźěćo je Marie-Sophie Stephan na jewišću stała. Tuž je jej samozrozumliwe zhotować so k wosebitym składnosćam drastu Wojerowskich Serbowkow. Jako chowanča Čornochołmčanskeje pěstowarnje „Krabat“ je wona prěnje serbske słowa nawuknyła. Mjeztym studuje młodostna socialne dźěło a pedagogiku na Techniskej uniwersiće Drježdźany. Po studiju chce so w dalinje za dźěłom rozhladować, pozdźišo pak do domizny so nawróćić. Najradšo dźěłała by na młodźinskim zarjedźe abo tam, hdźež so wo domy za dźěći staraja.
