Choćebuz (SN). Na wučerskej online-platformje Choćebuskeho Dźěłanišća za serbske kubłanske wuwijanje (ABC) bu masterske dźěło Colett Šampatisoweje wozjewjene. Zajimcy móža so na internetnej stronje informować. Wona zaběra so z jara praktiskimi pokiwami k diferencowanju serbskeje wučby. K tomu słušeja wjacore dźěłowe łopjena. Dale na platformje přistupne su wšelake wudaća, kotrež su zašłe lěta wušli. Jedna so wo dwě wudaći za primarny schodźenk: BINGO – wobrazowe hry za serbsku wučbu pod awtorstwom Annet Hirschleroweje. Je to 28 dźěłowych pódłohow kaž tež metodiske pokazki, mjez druhim „Wuknu serbsce – Poručenja za serbšćinu w zakładnej šuli“, za kotrež su so wuzwolene wučbnicowe teksty za lětniki 1 do 4 zestajeli ­a k tomu nadawki a wotmołwy přidali.

Za sekundarnej schodźenkaj 1 a 2 su nětko digitalnje wučerske poručenja a pjeć diferencowacych dźěłowych łopjenow z rozklučowanjom na temu „Sorbisch oder Wendisch? – Mnoho pomjenjenjow za serbsku rěc“ z pjera Christiany Piniekoweje k dispoziciji.

Po najćešej dalokopućowanskej šćežce Europy Grande Randonnée 20 ducy był

Mnozy ludźo dowolowy čas wužiwaja, zo bychu so na přibrjohu morja ležo wot słónčnych pruhow brunić dali. 29lětny Maćij Möller ze Šunowa so hinak wočerstwja. Wučer geografije, nabožiny a towaršnowědy na Radworskej wyšej šuli „Dr. Marja Grólmusec“ je sej­ lětsa porno tomu za čas dowola woprawdźite wužadanje wuzwolił. Za to poda so na francosku kupu Korsika ze zaměrom, sewjerny dźěl tak mjeno­wa­neje Grande Randonnée 20, skrótšene GR20, a zdobom najćešeje dalokopućowanskeje šćežki Europy přewinyć.

Přihot za naročnu čaru

Ideju za njewšědny dyrdomdej je Maćij Möller cyle spontanje zrodźił. Dotal dźě bě stajnje z kolesom po puću, nětko bě sej předewzał nóžkować. Tak je so w syći za najrjeńšimi pućemi Europy wobhonił. Jako prěnju dósta pokazku na GR20. „Tale tura je jako nadměru naročna wo­pisana“, Šunowčan wuswětla, „tuž sym spočatnje trochu dwělował. Nimo toho njemějach hišće žanežkuli pućowanske nazhonjenja.“