Budyšin (SN/JaW). Dalšej přiručce za wučbu serbšćiny je tele dny Rěčny centrum WITAJ wudał. Najnowša, wčera wušła brošurka ma titul „Ptački našeje domizny“. Dalša wuńdźe w rjedźe „Wuknjemy serbsce“, kaž RCW na swojej internetnej stronje informuje.
„Ptački našeje domizny“ je wudospołnjacy wučbny material za wuknjacych 3. do 6. lětnika. Přiručku móža zajimcy a zajimče ze słuchopisakom BOOKii wužiwać, k jednotliwym ptačim portretam fifolenje ptačkow wotwołać a je we wšelakich hrach přirjadować. Nimo zajimawosćow wokoło ptakow jako „Ptače stawiznički“ zhonja dźěći z ptačeho časnika, hdy kotry ptačk fifolić započina.
W rjedźe „Wuknjemy serbsce“ předleži prěni dźěl zwučowanskeho zešiwka k šulskemu słowničkej za 1. a 2. lětnik. Je to přiručka k nawuknjenju serbšćiny jako cuzeje rěče, kaž z rěčneho centruma rěka. „Z pomocu zešiwka móža sej dźěći wobchadźenje ze słownikom nadźěłać a skrućeja swój słowoskład.“
Přiručce móža sej zajimcy pak w Budyskej Smolerjec kniharni abo digitalnje w online-wobchodźe Ludoweho nakładnistwa Domowina pod kupić.
Wojerecy (SiR/SN). Najebać koronu předčitanske wubědźowanje přewjesć? Haj, to so hodźi! Digitalny swět to dźensa zmóžnja, byrnjež live-warianta stajnje bóle awtentiska była.
Regionalne wurisanje 63. předčitanskeho wubědźowanja, kotrež bursowe towarstwo Němskeho knižneho wikowanja iniciěruje, je so tuž tež lětsa wotměło. Zhromadnje wobhladachu sej čłonojo jury minjenu srjedu zapodate widejowe přinoški dźewjeć wobdźělnikow. Spěchowanscy šulerjo, gymnaziasća a wuknjacy wyšich šulow z Wojerec, Kamjenca, Sepic, Radeberga, Rěčic a ze Serbskeje wyšeje šule Ralbicy dóstachu dypki za čitansku techniku, za interpretaciju kaž tež za wuzwolene tekstowe wotrězki. Wosebite wužadanje při tym bě zwěsćić, hač bu tekst woprawdźe předčitany a derje interpretowany, abo hač je jednotliwc pasaže z hłowy nawuknył.
Smjerdźaca (aha/SN). Po tym zo je Serbske šulske towarstwo wobšěrne dźěłowe wobłuki Smjerdźečanskeho kubłanskeho srjedźišća LIPA do swojeje zamołwitosće přewzało, su tam najebać koronapandemiju wšitke kursy a zaběry z dźěćimi dale wjedli. Tež štyridnjowski camp w zymskich prózdninach, kotryž so wčera zakónči, je mjez 30 wobdźělnikami w starobje sydom do dźesać lět wulke připóznaće žnjał. Projektowa sobudźěłaćerka SŠT Monika Süßowa kaž tež tam zamołwita za swójbne kubłanje Michaela Rabowa stej z podpěru a radu dotalneje nawodnicy Smjerdźečanskeje LIPY Lucije Handrikoweje dźěćom wotměnjawy a powučny wotběh zaručiłoj.
Městopředsydka Spěchowanskeho towarstwa Serbskeho gymnazija Budyšin Katrin Suchec-Dźisławkowa (napr.) a pokładnica Bernadett Klimannowa stej šulerskimaj rěčnikomaj Philipej Budarjej a Luizi Rosenkranz (wotl.) a direktorej Renéjej Wjacławkej pjeć laptopow přepodałoj. „Smy so w předsydstwje spočatk januara dojednali spěšnje na naprašowanja šulerjow za dalšimi laptopami reagować“, praji předsyda towarstwa dr. Daniel Měrćink. Digitalizacija šulow postupuje, a z tym stupaja tež naroki. „Wažne nam bě a je, šulerjam na njekomplikowane wašnje bazowe wuhotowanje přewostajić.“ Cyłkownje je so 1 400 eurow za nakup nałožowało.
Foto: Alena Hiccyna
Worklecy (SN/bn). Po aktualnym powšitkownym wukazu Sakskeho ministerstwa za kultus wostanjetej serbska zakładna šula „Michał Hórnik“ kaž tež přisłušacy hort we Worklecach dźensa a jutře dospołnje zawrjenej. Přičina je wysoka ličba pozitiwnje na koronawirus testowanych šulerjow. Kaž z ministerstwa wuchadźa, buchu dohromady 30 infekcijow zwěsćene. Złožujo so na „Postajenje za rjadowanje šulow, internatow, dźěćacych dnjowych přebywanišćow, dnjowych hladarnjow za dźěći kaž tež za njeakademiske zarjadnišća za wu- a dalekubłanje wuwučowaceho personala w zwisku zadźěwanja rozšěrjenja covid-19“ wujewja „staw natyknjenjow woprawnjeny strach dalšich infekcijow, čehoždla je nachwilne zawrjenje kubłanišća trěbne. Njebyštej-li so šula a hort zawrěłoj, su dalše infekcije prawdźepodobne, štož ćěło a žiwjenje třećich wohrožuje. Wukaz wotpowěduje tuž poměrnosći.“
Takle krótko do premjery hry „Šěrcec Hanka“ Němsko–Serbskeho ludoweho dźiwadła w Budyšinje dopominam so na wšelke zajimawostki z časa, jako dźiwadłowa skupina Sernjany-Róžant hru „Židowka Hana“ po noweli Jurja Kocha w Serbach předstaji. 2. decembra 1967 rozsudźi tehdyše předsydstwo skupiny w Frenclec korčmi w Róžeńće, nazwučować hru wo Židowce Hanje a to pod režiju Leńki Cmuntoveje, pochadźaceje z tehdyšeje Čěskosłowakskeje, bydlaceje pak w tym času w Budyšinje. Awtor hry bě Jurij Koch. Wobsah hry bě jara jimacy, štož Róžeńčan-Sernjanscy hrajerjo spočatnje trochu skeptisce widźachu. Běchu mjenujcy dotal zwjetša wjeselohry hrali. Po dokładnym studowanju rólow pak zajim přiběraše hrać hru, kotraž w našej bjezposrědnjej kónčinje jedna. Tež Jurja Kochowe wuwjedźenja tomu přinošowachu. Hižo nazajtra, 3. decembra, podachu so Borbora Šołćic, Měrćin Wjeńk a Jurij Korjeńk na puć, zo bychu ludźi pytali a narěčeli w hrě sobuskutkować, wšak měješe so 22 rólow wobsadźić. Sobotu wječor, na swjedźenju Třoch kralow 1968, bě hižo prěnja proba.
W přihotach na wubědźowanje „Młodźina hudźi“ dóstachu wobdźělnicy njedawno dobre pokiwy wot prof. Michaela Schützy. Mjez wobdźělnikami kursa bě tež młoda Serbowka.
Wojerecy (SiR/SN). Hudźba tastoweho a blachoweho dujerskeho instrumenta bě tele dny we Wojerowskej hudźbnej šuli słyšeć. Jamila Hórnikec hraješe na klawěrje, Kilian Trittmacher ju na pozawnje přewodźeše. Nadobo pak bu jeju hra přetorhnjena. Prof. Michaelej Schütze bě mjenujcy napadnyło, zo wonaj jednotliwe zynki přespěšnje hrajetaj. Profesor za klawěr a korepeticiju na Drježdźanskej wysokej šuli za hudźbu wě, wo čim wón rěči. Fachowc swoje nazhonjenja a swoju wědu rady młódšim ludźom sposrědkuje.
Podstupim/Mužakow (SN/MiR). Areal kołowokoło jednaćelnje Němsko-pólskeho geoparka UNESCO Mužakowski zahork ma nowy napohlad dóstać. Tele dny su za to přihotowanske dźěła zahajili. Aktualny projekt wopřijima dale koncepciju wustajeńcy wo geoparku.
Projekt chcedźa zwoprawdźić z pjenježnej podpěru braniborskeho ministerstwa za hospodarstwo. Te přewostaji gmejnje Dolina Nysy a Małksy 450 000 eurow ze srědkow politiskich stron a masowych organizacijow bywšeje Němskeje demokratiskeje republiki (NDR), tak mjenowane PMO-srědki. „Sym přeswědčeny, zo stanje so geopark dale a woblubowaniši“, rjekny braniborski hospodarski minister Jörg Steinbach (SPD).
Drježdźany/Budyšin (SN/MiR). Wodźenska skupina 2plus sakskeho ministerstwa za kultus (SMK) je wčera pod nawodom jeho referentki Kerstin Wittig online wuradźowała. We wobłuku wjacore hodźiny trajaceho wuradźowanja zaběrachu so zastupjerjo Domowiny, Rěčneho centruma WITAJ, Budyskeje a Radebeulskeje wotnožki krajneho zarjada za šulu a kubłanje (LaSuB) kaž tež Serbskeho šulskeho towarstwa ze stawom ewaluacije koncepta 2plus. Prjedy hač budu wuslědki wozjewjene, je trjeba so dale z dotalnymi wuslědkami rozestajeć.