Policija (13.12.19)
Katalyzatory z awtow kradnyli
Rakecy/Wojerecy. Katalyzatory su po wšěm zdaću mjez paduchami jara woblubowane. Kaž policija zdźěla, ma so mjeztym z wjacorymi tajkimi padustwami rozestajeć. Mjez druhim su wčera w Rakecach njeznaći hnydom z awtow katalyzatory wutwarili. Škoda wučinja wjac hač 3 000 eurow. Tež we Wojerecach su paduši z Hondy katalyzator wurězali.
Policija (12.12.19)
Wopiteho zadźeržał
Bluń/Bjezdowy. Mjez Blunjom a Bjezdowami je so Blunjanej poradźiło wopiteho šofera zadźeržeć, a to wutoru rano. Krótko do sedmich informowaše wón policiju wo njewšědnym jězbnym stilu před nim jěduceho. Zastojnikam šofer Kije na to wuzna, zo bě njezbožo zawinił. Wón měješe 1,56 promilow alkohola w kreji. Zawěsćili su policisća zdobom na njezbožo pokazowace slědy. Jězbnu dowolnosć mužej nablaku sćazachu.
Policija (11.12.19)
Adwentnu pychu spakosćili
Pěskecy/Němske Pazlicy. Tež paduši chcedźa adwentny a hodowny čas najskerje w přitulnej atmosferje swjećić. Za to trěbne je wězo prawe wobswětlenje. Te „wobstarachu“ sej njeznaći kónc tydźenja w Pěskecach, Němskich Pazlicach a Budyšinje. Kaž policija zdźěla, su w tam nimo hodowneje hwězdy tež wobswětlenje hodowneho štomika a figuru rumpodicha z ležownosćow na Kamjenskej w Pěskecach a na Pěskečanskej w Němskich Pazlicach spakosćili. Hódnotu rubizny trochuje policija na 150 eurow. W Budyšinje na Schliebenowym kružnym wobchadźe su njeznaći dźěl hwězdow z tamnišeho hodowneho štoma dele storhali. Kriminalna policija slědźi.
Policija (10.12.19)
Něhdźe tysac eurow škody
Nowa Wjes. Njeznaći su so minjeny kónc tydźenja do zawoda w Nowej Wsy pola Rakec zadobyli. Kaž policija zdźěla, wobškodźichu skućićeljo najprjedy groćany płót, zo bychu so na areal firmy na Hermančanskej dóstali. W běrowowym twarjenju přepytachu wšitke rumnosće. Spakosćili su po informacijach policije 600 eurow hotowych pjenjez, kluč za generatorowu budku kaž tež kapsnu lampu. 57lětny škodowany trochuje wěcnu škodu na něhdźe tysac eurow. Zastojnicy su wjacore slědy zawěsćili. Kriminalna policija pad nětko přepytuje.
Policija (09.12.19)
Frontalnje do so zrazyłoj
Delni Wujězd. Ćežke njezbožo sta so dźensa rano wokoło sedmich při wotbóčce na awtodróhu A 4 w Hornim Wujězdźe. Šoferka Toyoty ze směra Zejic chcyše na awtodróhu wotbočić, přewidźa pak z Wujězda přijěducy transporter. Jězdźidle zrazyštej frontalnje do so. Wodźerjow wobeju awtow dyrbjachu zranjeneju do chorownje dowjezć, wěcna škoda wučinja wjacore tysacy eurow.
Policija (06.12.19)
Škodu načinić chcyli
Budyšin. Worakawcy běchu tele dny w Budyšinje po puću. Kaž policija wčera zdźěli, su njeznaći w nocy na srjedu na Wjacławskich wikach winowu budku nadpadnyli. Z wulkim praskotakom chcychu płun w bleši zamiškrić. Při tym mějachu cyle jasnje wotpohladane, budku wobškodźić. Na zbožo so skućićelam njeporadźi někajku škodu načinić.
Policija (05.12.19)
Rozkora ze zranjenym
Wojerecy. Policisća dyrbjachu wutoru na Hasy Liselotty Herrmann we Wojerecach dweju muži změrować. 21 a 25 lět staraj mužej běštaj so chětro do włosow dóstałoj, młódši biješe samo z piwowej blešu do tamneho, tak zo dyrbjachu jeho zranjeneho do chorownje dowjezć.
Policija (04.12.19)
Podhladnych zwěsćili
Budyšin. Sakska policija je w zhromadnym dźěle ze zastojnikami z Čěskeje a Pólskeje móhła w naležnosći manipulowanych bankomatow w Budyskim a Zhorjelskim wokrjesu štyrjoch podhladnych zwěsćić. Wšitcy štyrjo su z wuchodnych krajow. Wumjetuja jim manipulaciju bankowych awtomatow w znajmjeńša 22 padach, zdźěla Zhorjelska policajska direkcija. Kaž wottam dale rěka, su wšitcy štyrjo skućićeljo po wšěm zdaću tež w Lipsku a we wjacorych městach Braniborskeje podobne njeskutki skućili. Policija tuž dale přepytuje.
Policija (03.12.19)
Dwě žonje na dróze zranił
Budyšin. Zo móže so jednora jězba njedźelu popołdnju z awtom tež njeluboznje skónčić, wo tym móža policisća zawěsće spěwčk spěwać. K zranjenju hnydom dweju žonow je slědowacy pad w Budyšinje wjedł. 43lětny muž bě předwčerawšim ze swojim awtom na Budyskej Serbskej hasy po puću. Kaž wón měnješe, pak je jemu na chódniku parkowace jězdźidło dweju žonow puć zaraćiło. Na to poča trubić, a tak dóńdźe k rozkorje mjez nim a žonomaj w starobje 30 a 35 lět. Tak biješe muž jenož jónu z pjasću do směra žonow, při čimž trjechi wobě w mjezwoču a jej lochce zrani. Zawołana policija přija přizjewjenje skóržby přećiwo łamarjej zakonjow a zawěsći slědy njeskutka, kaž w rozprawje pisa. Mjeztym je kriminalna policija pad přewzała a jón přepytuje.
Policija (02.12.19)
Cigaretowy awtomat rozbuchnyli
Sulšecy. Přewšo wótry wrjesk je wobydlerjow delnich Sulšec w nocy na sobotu něhdźe w dwěmaj ze spara torhnył. Kaž policija dźensa zdźěli, běchu njeznaći we wsy na twarjenju připrawjeny zjawnje přistupny cigaretowy awtomat rozbuchnyli. Kelko pjenjez móžachu ze swojej akciju spakosćić a kelko tyzow cigaretow su sobu wzali, dotal hišće jasne njeje. Kriminalna policija pad přepytuje. Kaž pak informuje, su skućićeljo z detonaciju awtomata wjacore tysacy eurow škody načinili.
