Policija (12.02.19)
Smjertnje znjezbožił
Dobrošicy. Tragiski wukónc měješe wčera dopołdnja jězba 58lětneho muža, kiž bě ze swojim wosobowym awtom typa Kia na wokrjesnej dróze z Dobrošic do směra na Łomsk po puću. Krótko za Lišej Horu zajědźe wón ze swojim Picantom w lochkej lěwej křiwicy z jězdnje a prasny frontalnje do štoma. Zražka bě tak mócna, zo šofer hišće na městnje njezboža wudycha. Nuzowy lěkar, kiž bě z helikopterom přilećał, móžeše jenož hišće smjerć muža zwěsćić. Wobchadna njezbožowa słužba nětko přepytuje, kak je k njezbožu dóšło. Wosobowe awto so dospołnje skóncowa.
Policija (11.02.19)
Při camprowanju znjezbožił
Hory. Wšo druhe hač rjany wukónc měješe camprowanje sobotu na Horach pola Wojerec. Nimo nóžkowacych camprowarjow bě tam traktor we wsy po puću, kiž ćehnješe připowěšakaj z dohromady pjeć sobujěducymi. Na zadnim připowěšaku steješe 48lětny muž. Tón pak bě w běhu dnja tak hłuboko do piwoweje škleńcy hladał, zo so hižo na nohomaj dźeržeć njemóžeše. Wón padny z připowěšaka a so ćežko zrani. Pola njeho naměrichu 2,5 promilow alkohola w kreji.
Policija (08.02.19)
Pytaneho běharja namakali
Kinspork. Srjedu bě so muž pola Kamjenskeje policije přizjewił, prajo, zo pyta swojeho bratra. Tón bě so do Kinsporkskeje hole na běhanje podał a so njenawróćił. Na to jeho zastojnicy z helikopterom pytachu. Z pomocu kamery policisća 30lětneho wuhladachu.
Policija (07.02.19)
Křesło na awtodróze
Budyšin. Z njewšědnym zadźěwkom dyrbjachu so šoferojo zawčerawšim popołdnju na awtodróze A 4 mjez woběmaj Budyskimaj wotbóčkomaj bědźić. Do směra na Drježdźany ležeše mjenujcy křesło na lěwej jězdni. Wodźer Mercedesa bě je runje hakle kupił, ale na připowěšaku prawje njepřipasał, tak zo so wone dele suny. Dwě jězdźidle móžeštej jeno z nahłym spinanjom zadźěwać, zo do mebla njeprasnyštej. Kuražěrowani wodźerjo nakładnych awtow sćahnychu křesło na nakromne pasmo. 30lětny zawinowar podawka so k městnu wróći, swój zmylk mjeztym přichwatanej policiji přizna a křesło sobu wza. Kak wone potom wupadaše, bohužel znate njeje.
Policija (06.02.19)
Muža mortweho namakali
Běła Woda. 27lětny Běłowodźan je policiji wčera wječor zdźělił, zo w bydlenju na dróze Wam k zbožu mortwy muž leži. Policija tam 69lětneho namaka, pola kotrehož móžeše nuzowy lěkar jenož hišće smjerć zwěsćić. Hladajo na zranjenja njehodźi so namócny njeskutk wuzamknyć. Dokelž 27lětny rjekny, zo ma něšto z tym činić, jeho nachwilnje zajachu.
Policija (05.02.19)
Milinowy kašćik wuprózdnili
Lěska. Kable a relaisy we wulkim stilu wutwarili su njeznaći tele dny z milinoweho kašćika při železniskim přechodźe w Lěsce pola Wóslinka. Zmylka we wuhibkarni dla je sobudźěłaćerjam wobškodźenje w šaltowanskej připrawje napadnyło, čehoždla sej woni naležnosć bliže wobhladachu. Při tym zwěsćichu, zo běchu paduši dohromady 26 relaisow pokradnyli. Jich hódnotu trochuja na nimale 8 000 eurow.
Policija (04.02.19)
60 njezbožow sněha dla
Budyšin. Nic jeno sobudźěłaćerjo zymskeje słužby a mějićeljo ležownosćow mějachu wčera ze sněhom ruce połne dźěła. W Budyskim a Zhorjelskim wokrjesu dyrbješe so policija wo tójšto wobchadnych njezbožow starać. Hač do wčerawšeho pózdnjeho popołdnja přizjewichu Zhorjelskej policajskej direkciji 60 zražkow zymskich poměrow na pućach dla. Zwjetša wosta při blachowej škodźe. W někotrych padach pak so wodźerjo abo sobujěducy snadnje zranichu. Wot wobchadnych njezbožow potrjechene jězdźidła sunychu so do přirowow, wobhrodźenjow, wobchadnych znamjenjow, sćežorow a amplow, ale tež do tamnych wozydłow.
Policija (01.02.19)
Serwis smjerć drohi był
Ottendorf-Okrilla. Mnozy drje su hižo situaciju dožiwili, zo stejachu před swojimi chěžnymi durjemi, ale njemějachu kluč při sebi. Tele małe njezbožo bě za žonu w Ottendorfje-Okrilli nětko chětro drohe. Přez hotline zazwoni wona klučowy serwis, kiž jej wězo hnydom pomocliweho sobudźěłaćerja pósła. Po zdokonjanym dźěle pak wupisa wón zličbowanku we wysokosći 919,15 eurow. Žona čuješe so w tym wokomiku najprjedy raz winowata, zličbowanku na městnje zapłaćić. Pozdźišo so wona tola hišće z tutej naležnosću na policiju wobroći. Kriminalisća přepytuja tónle pad nětko lichowarstwa (Wucher) dla.
Policija (31.01.19)
Dowolnosć a konop sćazali
Rakecy. Z njepowučomnym wobydlerjom dyrbjachu so policisća zawčerawšim w Rakecach zaběrać. Po přikazu sudnistwa měješe wón jězbnu dowolnosć wotedać, štož pak dotal činił njebě. Jako zastojnicy do jeho bydlenja zastupichu, wuhladachu tam konopjowe rostliny a marihuana. Tuž njesćazachu jeno jězbnu dowolnosć, ale tež njejapku namakanku. To pak 33lětneho scyła njemyleše, přetož bórze na to wón zaso za wodźidłom swojeho awta sedźeše. Policisća wšak jeho při tym lepichu.
Policija (30.01.19)
Spěšnosć měrili
Njebjelčicy. Na statnej dróze S 94 je policija póndźelu při wotbóčce do Njebjelčic spěšnosć měriła. W běhu třoch hodźin kontrolowachu 1 730 wozydłow. W 51 padach wosta při warnowanju. Wosom šoferow změje pokutu płaćić. Rekord docpě awto z Budyskim čisłom, kotrež při dowolenych 70 km/h ze 118 km/h nimo smaleše. Šofer změje nětko 160 eurow pokuty płaćić, dóstanje dypkaj w Flensburgu a dyrbi měsac nóžkować.
