Policija (21.12.18)
Z wukazom zajeća pytaneho našli
Hłupońca. Njewšědny wuspěch móžachu sej zastojnicy Kamjenskeho policajskeho rewěra minjenu srjedu zapisać. Připadnje spóznaštaj policistaj na kontrolnej jězbje přez Hłupońcu (Glaubnitz) muža, kotrehož justica z wukazom zajeća pyta. Wón bě z kolesom we wsy gmejny Pančicy-Kukow po puću. Zastojnikaj chcyštaj jeho njepłaćeneje zličbowanki cyłkownje 900 eurow dla zajeć a hnydom sobu do jastwa wzać. Tomu pak móžeše 66lětny zadźěwać a je jimaj sumu radšo hnydom zapłaćił.
Policija (20.12.18)
Šofer so po njezbožu spalił
Trjebjeńca. Na zwjazkowej dróze B 6 je wčera wokoło 6.30 hodź. k tragiskemu njezbožu dóšło. Z dotal njeznateje přičiny je Alfa Romeo mjez Kubšicami a Bukecami njedaloko wotbóčki do Trjebjeńcy (Steindörfel) frontalnje do nakładneho awta zrazył. Kaž policija zdźěla, so wosobowe awto na to hnydom zapali a płomjenja rozpřestrěchu so chětro spěšnje tež na nakładne awto. 46lětny wodźer Lkw-ja móžeše so lochce zranjeny wuchować, jeho dowjezechu do chorownje. Šofer Pkw-ja – zastojnicy mjeztym wuslědźichu, zo jedna so wo 30lětneho muža – pak njemóžeše so hižo z awta wuswobodźić a so w jězdźidle spali. Zasadźene wohnjowe wobory z wokolnych wsow móžachu jenož hišće woheń zhašeć a wuchowanskej słužbje pomhać městno njezboža zrumować. Zwjazkowa dróha bě hač do popołdnja zawrjena. Policija njezbožo přepytuje a pyta za swědkami. Pokiwy přijimujetej wobchadonjezbožowa słužba a policajska direkcija w Budyšinje.
Wopity znjezbožił
Policija (19.12.18)
Ze swojim do dalšeju awtow zrazyła
Biskopicy. Wodźerka VWja bě wčera popołdnju w Biskopicach na S 111 do Peugeota zajěła a storči jón tak do dalšeho před nim stejaceho VWja. Šoferka so zrani a dyrbjachu ju do chorownje dowjezć. Dźěsćomaj, kotrejž w jeje awće sedźeštej, a dalšemu šoferej so ničo njesta. VW žony a Peugeot dyrbjachu dospołnje wobškodźenej wottransportować. Zawrjeneje dróhi dla dóńdźe k haćenjam.
Dźiwja jězba po polu
Huska. Po polu agrarneho zawoda w Husce su njeznaći z awtami dźiwje wokoło jězdźili. Na něhdźe 150 króć 400 metrow wulkim zahonu nasta tak škoda něhdźe 3 000 eurow. Wobsedźer pola je so na kriminalnu policiju wobroćił, kotraž pad nětko přepytuje.
Policija (18.12.18)
Alarm w baterijowym centrumje
Kamjenc. W Kamjenskim baterijowym slědźenskim centrumje započa wčera wokoło 21.15 hodź. w składowanskej hali alarmowa připrawa wuć. Zawołani kameradojo měšćanskeje wohnjoweje wobory objekt dokładnje přepytachu, zo bychu přičinu wuslědźili. Po jednej hodźinje pak njejsu ničo namakali. Prawdźepodobnje jednaše so wo wopačny alarm.
Při njezbožu so ćežko zraniłoj
Šěrachow. Wodźer Suzukija na Sauerowej dróze w Šěrachowje je wčera popołdnju frontalnje do jemu napřećo přijěduceho małotransportera zrazył. Wobaj šoferaj so ćežko zraništaj, awće běštej jara wobškodźenej. Wohnjowi wobornicy dyrbjachu z awtow wuběžacu kapalinu wotstronić. Zawrjeneje dróhi dla dóńdźe w Šěrachowje k wobchadnemu chaosej.
Policija (17.12.18)
Šofer sej drěmnył a znjezbožił
Budyšin. 24lětny wodźer Renaulta bě sej, kaž sam praji, dźensa w nocy na awtodróze pola Budyšina drěmnył. Tak zajědźe nalěwo do srjedźneje a naprawo do praweje planki a zaso na dróhu, hdźež stejo wosta. Nichtó ze štyrjoch sobujěducych so na zbožo njezrani. Cyłkowna škoda na awće wučinja něhdźe 3 000 eurow.
Pokradnjeny kwad namakali
Budyšin. W nocy wot 13. na 14. december w Lubiju pokradnjeny kwad su zastojnicy Budyskeho policajskeho rewěra na Budyskej Krakečanskej dróze namakali. Při jězdźidle zetkachu 31lětnu a 29lětneho, kotrajž běštaj z nim po zdaću jěłoj. Šofer steješe pod wliwom drogow a njeměješe žanu jězbnu dowolnosć.
Policija (14.12.18)
Tři njezboža zawinił a ćeknył
Nowa Wjes. W běhu krótkeho časa zawini šofer srjedu popołdnju w Nowej Wsy (Naundorf), w gmejnje Dobruša-Huska, tři njezboža. Na kóncu pak je awto stejo wostajił a přez pola ćeknył. Kaž policija zdźěli, njeměješe 31lětny ani jězbnu dowolnosć. Njezadźiwa tuž, zo bě na hładkej dróze wjacore razy kontrolu nad wodźidłom zhubił. Najprjedy šmórny so murje a płotu, po tym bě jemu schodowe wobłoženje domu na puću a skónčnje zajědźe do milinoweho sćežora.
Policija (13.12.18)
Ćežka zražka na S 101
Jědlica. Ćežke njezbožo sta so wčera popołdnju na S 101 mjez Hornim Wujězdom a Zejicami. Tam stej VW a Ford do so zrazyłoj. Wohnjowa wobora dyrbješe šofera Forda z pomocu hydrawliskich nožicow wuswobodźić. Dwě ćežko zranjenej wosebje dowjezechu do chorownje. Tež helikopter bě na městnje. Dróha bě dlěje hač hodźinu dospołnje zawrjena.
Zjebać so njedali
Radwor. Wobšudnicy su tón tydźeń w Radworju a wokolinje spytali telefonisce wobydlerjam pjenjezy wulišćić. Wudawachu so jako přiwuzni, kotřiž pjenjezy trjebaja. Zawołani pak njedachu so zjebać a informowachu policiju.
Policija (12.12.18)
Zymske wjedro haćenja zawiniło
Dobruša/Huska. Wčerawše zymske wjedro ze zdźěla chětro sylnym sněhowanjom je w Hornjej Łužicy k wjacorym wobchadnym njezbožam wjedło, kaž policija zdźěla. Předewšěm w Hornim kraju registrowachu zastojnicy na hładkich a chětro zasněženych pućach wjac njezbožow a haćenjow prěki stejacych Lkw-jow dla. Předewšěm potrjechene běchu dróhi wokoło Wjelećina (Wilthen), Wjazońcy (Neukirch) a Wjernarjec (Wehrsdorf). W Drječinje (Dretschen) pola Huski (Gaußig) zhubi wčera wječor šofer VWja we wulkim sněze kontrolu nad wodźidłom a zajědźe do přirowa, hdźež so jězdźidło nabok zwróći. Po informacijach policije pak so nichtó zranił njeje.
Policija (11.12.18)
Na wikach so bili
Kulow. Z bijeńcu su so adwentne wiki minjenu sobotu w Kulowje zakónčili. Kaž policija hakle dźensa zdźěli, chcyše 23lětny Kulowčan rozestajenje mjez wjacorymi wopytowarjemi wikow změrować a bu sam atakowany. Mužej w starobje 18 a 21 lět jeho biještaj a do njeho kopaštaj, jako hižo na zemi ležeše. Wšitcy wobdźěleni běchu alkoholizowani. Kriminalna policija nětko přepytuje.
Hodowny štom fuk
Budyšin. Prawdźepodobnje žane pjenjezy za hodownu pychu njemějachu paduši njedźelu w Budyšinje. Ze składa na Stieberowej pokradnychu woni hodowny štom w hódnoće 30 eurow, kaž policija zdźěli. Wěcna škoda wučinja 50 eurow. Policija za skućićelemi slědźi.
Policija (10.12.18)
Třěchikryjerski skład wopor wohenja
Hornja Hórka. Tójšto dźěła mějachu wohnjowi wobornicy kónc tydźenja w Hornjej Hórce. Pjatk wječor wołachu jich na Šulsku, hdźež so skład třěchikryjerskeje frimy paleše. Kaž policija zdźěli, běchu w něhdźe 40 x 40 metrow wulkej hali wjetše mnóstwa palneho drjewa a twaršćizny składowane kaž tež twarski kran wotstajeny. Wšitko sta so z woporom płomjenjow. Tež twarska substanca hale je wohenja dla chětro poćerpjeła. Wosoby so njezranichu. Škodu trochuje wobsedźer na wjac hač 150 000 eurow. Kaž w rozprawje policije dale rěka, zwěsćichu wohnjowi wobornicy wjacore městna, na kotrychž bě woheń wudyrił. Kriminalna policija pad tuž nětko přepytuje.
