Policija (27.09.18)
W kupnicy móšeń pokradnyli
Pančicy-Kukow. 29lětnej žonje su njeznaći minjenu póndźelu popołdnju w kupnicy Netto w Pančicach-Kukowje móšeń pokradnyli. Žona drje bě swój nachribjetnik w nakupowanskim wozu krótki čas njewobkedźbowany wostajiła. Tutu składnosć njeznaći wužiwachu a za móšnju sahnychu. Nimo wupokaza a pjenježnych kartow zhubi so tohorunja dwucyfrowa suma pjenjez. Kriminalna policija pad přepytuje a radźi, wosobinske wěcy njewobkedźbowane njewostajić.
Kóń do awta zaběžał
Prěčecy. Wjacore konje so wčera rano pola Bolborc ze swojeje pastwy wudobychu. Jedyn z nich je krótko po 5 hodź. na statnej dróze S 100 pola Prěčec do wosoboweho awta zaběžał a so při tym snadnje zranił. Skótny lěkar jeho zastara. Šofer so na zbožo zranił njeje.
Policija (26.09.18)
Pokradnjene awto namakali
Rakecy. Wosobowe awto typa BMW 318i, kotrež bě so před tydźenjomaj z garaže w Běłej Wodźe zhubiło, su zawčerawšim w Rakecach namakali. Wobydlerjej bě 27 lět stare jězdźidło bjez čisłow napadnyło. Po tym zo kriminalisća awto přepytachu, móžachu je wobsedźerjej wróćić.
Policija (25.09.18)
Štó je błyskač skóncował?
Němcy. Nic kóždemu so lubi, hdyž při kromje puća nadobo błyskač wuhlada. Druhdy so samo stanje, zo spyta něchtó spěšnosć měrjacy aparat skóncować. Z najnowšim tajkim padom zaběra so nětko policija w Němcach. Tam běchu njeznaći w nocy na njedźelu, 16. septembra, stacionarny błyskač na Drježdźanskej dróze po wšěm zdaću z praskotakami wobškodźili. Při tym so akustiski alarm připrawy zaswěći. Nětko pyta policija swědkow, kotřiž su snano něšto wobkedźbowali, předewšěm skupinu třoch wosobow ze swětłej drastu, kotřiž krótko po połnocy do směra na Wojerecy nóžkowachu. Pokiwy přijimuja pod telefonowym čisłom 03571/ 46 50.
Policija (24.09.18)
Mužej randalowałoj
Wojerecy. W někotrych Wojerowskich domjacnosćach njemóžachu wobydlerjo w nocy na njedźelu woměrje telewiziju hladać. Přičina běštaj młodaj mužej, kotrajž na Hasy Käte Niederkirchner při satelitowej připrawje telewizijneho poskićowarja randalowaštaj a tak přijimowanje myleštaj. Kedźbliwy wobydler bě jeju wobkedźbował a policiju zazwonił. Zastojnicy lepichu tam mužej w starobje 32 a 20 lět. Wonaj běštaj na techniskej připrawje něhdźe 1 000 eurow škody načiniłoj. Alkoholowy test wunjese pola njeju 1,08 resp. 2,08 promilow alkohola w kreji. Wonaj změjetaj so nětko wobškodźenja wěcow dla zamołwić.
Policija (21.09.18)
Bjezskruploweho šofera zadźerželi
Połčnica. Na awtodróze A 4 blisko Połčničanskeje wotbóčki do směra na Drježdźany je wčera připołdnju awtodróhowa policija 32lětneho do wopačneho směra jěduceho wodźerja bruneho Mercedesa zadźeržała. Pólski šofer bě so na A 4 zawróćił a na lěwej jězdni do směra na Zhorjelc wróćo jěł. Muž ma so nětko wohroženja wobchada dla před sudnistwom zamołwić.
Policija (20.09.18)
Wobchod zapusćili a tony pomórali
Wojerecy. Něhdźe 10 000 eurow škody načinichu wandalojo, kotřiž běchu blisko Wojerowskeho lěsneho kěrchowa w nocy na wutoru wobchod zapusćili. Policija na to tuka, zo jedna so wo samsnych chaotow, kotřiž su na Kinajchtskej a na Hasy dr. Marje Grólmusec wotpadkowe tony, latarnju, nadróžne znamješka a busowu čakarnju z hokatymi křižemi a ze wšelakimi parolemi pomórali.
Policija (19.09.18)
Wjelk wowcy zakusał
Ćisow. W Ćisowje pola Sepic je w nocy na wutoru po zdaću wjelk na pastwje wjacore wowcy zakusał. Po prěnich informacijach bu wosom skoćatow morjenych a sydom zranjenych. Wjelk dyrbješe 1,80 metrow wysoki dźiwi płót přeskočić.
Brune parole mórali
Budyšin. Po zdźělenju towarstwa su njeznaći minjeny kónc tydźenja na Budyski Kamjentny dom brune parole mórali. Jako policajska patrulja přijědźe, pak běchu grafitije zaso přemórane.
Policija (18.09.18)
Z dwěmaj promilomaj na e-biku
Budyšin. W nocy na póndźelu je policajska patrulja w Budyšinje na Serbskich hrjebjach 17lětneho na e-biku lepiła, kiž měješe wjac hač dwaj promilej alkohola w kreji. Zastojnikaj młodostnemu dalejězbu nablaku zakazaštaj.
Wóslik na dróze
Mučow. Za Mučowom wuhladachu wčera rano šoferojo na B 96 wóslika a zdźělichu to policiji. Mjeztym dóšły plahowar je so wo skoćo dale starał.
Awto do kolesowarja zajěło
Hrańca. Njedźelu popołdnju je 22lětny wodźer Škody na S 101 pola Hrańcy do kolesowarja zajěł a jeho ćežko zranił. Šofer bě 63lětneho kolesowarja přesćahnył, jako chcyše tón runje dróhu přeprěčić.
Policija (17.09.18)
Wobornicy lěsny woheń zhašeli
Čorny Chołmc. Lěs je so wčera dopołdnja při Petzerec hórce w Čornym Chołmcu na pjeć městnach a na cyłkownej přestrjeni něhdźe 8 000 kwadratnych metrow palił. 45 kameradow, mjez druhim z Wojerec, Čorneho Chołmca, Michałkow/Brětnje, Němcow kaž tež z Njedźichowa a Kulowa, kotřiž běchu wot 10 hodź. na městnje, měješe płomjenja něhdźe w 14.30 hodź. pod kontrolu. Tak móžachu hišće wjetšim škodam zadźěwać. Přičiny wohenja njejsu znate, čehoždla je fachowcy tuchwilu přepytuja.
Policija (14.09.18)
Paduši w kupjeli
Kulow. Wospjet su so paduši do Kulowskeje kupjele zadobyli. Kaž dyrbjachu tam zawčerawšim zwěsćić, běchu njeznaći z kioska žiwidła a napoje w hódnoće 400 eurow pokradnyli. Nimo toho načinichu 500 eurow wěcneje škody.
