Policija (12.11.18)
W poslednim wukomiku
Budyšin. Dospołnje wupaliło je so sobotu popołdnju na awtodróze A 4 blisko Budyšina wosobowe awto typa BMW X3. Po tym zo bě 39lětny wodźer kur w awće pytnył, wón na kromje jězdnje zasta. Lědma zo běchu wón, jeho mandźelska a sydomlětne dźěćo awto wopušćili, woheń wudyri a BMW zniči.
Policija (09.11.18)
Paducha awta lepili
Słona Boršć. Zwjazkowa policija je wčera rano na awtodróze A 4 pokradnjene awto zawěsćiła a paducha zajała. Při Porchowskej wotbóčce napadny policistam do směra na Zhorjelc jěducy BMW z Lipšćanskim čisłom. Krótko do Hornjowujězdźanskeje wotbóčki zastojnicy wodźerja BMWja napominachu, za nimi jěć a awtodróhu wopušćić. Tón pak je na płun stupił a dale smalił. Blisko wotpočnišća pola Słoneje Boršće policajske awto jeho zaso dosćahny. Nadobo ćěkacy zaborzdźi a chcyše so pěši zminyć. Tomu pak policisća zadźěwachu a móžachu tak 20lětneho z Großschönauwa zajeć. Wón přizna, zo bě BMW w Lipšćanskim zahrodnišću pokradnył.
Policija (08.11.18)
Přepytuja morjenja dla
Budyšin. Po wšěm zdaću hrózbny njeskutk sta so wčera w Budyšinje. Kriminalna policija je wječor přepytowanja podhlada morjenja dla zahajiła. Jako bě žona po dźěle do swojeho bydlenja na Karla Marxowej přišła, namaka tam swoju dźowku nježiwu. Přiwołany nuzowy lěkar móžeše jenož hišće smjerć 30lětneje zwěsćić.
W bydlenju 50lětneje maćerje bě tohorunja 32lětny žiwjenski partner jeje dźowki. Wón bě spytał sebje samoho morić. Nuzowemu lěkarjej pak so poradźi jeho wožiwić. Na to 32lětneho zajachu. Pod škitom policije dowjezechu jeho do chorownje. Při tym dyrbjachu muža sputać, dokelž so wón ze wšej mocu přećiwo wuchowanju wobaraše. Što bě so w bydlenju dokładnje stało, dotal hišće znate njeje. Kriminalisća zawěsćichu slědy a dopokazanki. Statne rěčnistwo a komisija za mordarstwa pad přepytujetej.
Policija (07.11.18)
Rentnarku zjebali
Wojerecy. Hnydom trójce su njeznaći zawčerawšim we Wojerecach spytali z tak mjenowanym wnučkowym trikom staršim ludźom pjenjezy wulišćić. Na zbožo wšitcy potrjecheni prawje reagowachu, telefonat skónčichu a policiju informowachu. Mjenje zboža měješe samsny dźeń rentnarka w Žitawje. Cuza žona wudawaše so při telefonje jako „dobra znata“. W rozmołwje wona 76lětnej wo nuzowej situaciji powědaše a zo trjeba krótkodobnje 8 000 eurow. Rentnarka pjenjezy na bance wotzběhny a je njeznatemu posołej přepoda. Hakle jako swoju woprawdźitu znatu wróćo zazwoni, so wukopa, zo bu zjebana. W tym zwisku policija znowa warnuje, zo měli starši ludźo kedźbliwi być, hdyž jich něchtó při telefonje wo pjenjezy prosy.
Policija (06.11.18)
Nócny „wopyt“ njepytnył
Budyšin. Po wšěm zdaću strowy a wosebje hłuboki spar ma 70lětny muž na Lubijskej dróze w Budyšinje. W nocy na njedźelu wón pytnył njeje, zo bě so něchtó do jeho domu zadobył. Rano dyrbješe wustróžany rentnar zwěsćić, zo běchu jemu paduši třicyfrowu sumu pjenjez a mobilny telefon pokradnyli. Kak běchu skućićeljo do domu přišli, hišće přepytuja. Slědy zadobywanja kriminalna policija na městnje žane našła njeje.
Policija (05.11.18)
Na třěchu wobchoda zalězli
Budyšin. Kedźbnosć mnohich ludźi zdoby sej skupina muži, kotraž je sobotu wječor po wohnjowobornym rěblu na třěchu sportoweho wobchoda na Wonkownej Lawskej zalězła. Tam rozpřestrěchu woni něhdźe 40 metrow dołhi plakat z napisom „UN-Migrationspakt stoppen“. Zo by wón derje widźeć był, zapalichu tak mjenowane bengalo-wohenje. Policija zakroči, zwěsći wot wosom muži w starobje 16 do 31 lět personalije a plakat sćaza.
Policija (02.11.18)
Zastojnikam ćeknył
Kubšicy. Wosobowe awto typa Toyota Auris je wobsadce policajskeho awta minjenu wutoru něhdźe w 22.30 hodź. w Kubšicach napadnyło. Jako chcychu zastojnicy jězdźidło z Drježdźanskim čisłom kontrolować, stupi šofer na płun a ćekny. Policisća přesćěhachu jeho přez Sowrjecy (Soritz), Rachlow a dale do směra na Brězow (Blösa). Pozdźišo wuhladachu awto při Kubšiskim zastanišću železnicy. Šofer pak bě so mjeztym zminył.
Policija (01.11.18)
Po zražce ćeknyć chcył
Běła Woda. Trochu jara blisko přišłoj běštej sej zawčerawšim na Heinricha Heinowej w Běłej Wodźe wosobowej awće typa VW Polo a Renault, tak zo so jedne tamneho wotboka šmórny. 66lětny wodźer Renaulta jědźeše prosće dale. 29lětnemu šoferej VWja pak so poradźi jeho k zastaću nuzować. 66lětny změje so nětko njedowoleneho wotsalenja z městna njezboža dla zamołwić. Na jězdźidłomaj nasta něhdźe 2 000 eurow škody.
Wopity kolesowar padnył
Njedźichow. Kedźbliwa wobydlerka informowaše zawčerawšim policiju wo tym, zo w Njedźichowje muž z kolesom při puću leži. Zastojnicy zwěsćichu, zo drje bě alkohol na tym wina, wšako naměrichu pola 41lětneho 1,88 promilow.
Policija (30.10.18)
Přez kružny wobchad jěła
Prěčecy. Alkoholizowana rentnarka je zawčerawšim wječor něhdźe we 18 hodź. přez kružny wobchad na statnej dróze S 100 pola Prěčec zajěła. Při tym zrazy VW Golf 70lětneje do wobchadneho znamjenja. Wěcna škoda wučinja po prěnim trochowanju něhdźe 5 500 eurow. Při wobdźěłanju njezboža žona policiji powědaše, zo bě wot swětłomjetakow druheho jězdźidła slepjena. Zastojnicy Budyskeho policajskeho rewěra pak tohorunja zwěsćichu, zo wona hižo cyle strózba njebě. Z alkoholowym testom woni zwěsćichu, zo měješe jedyn promil alkohola w kreji. Tuž jej dalšu jězbu wězo zakazachu a přewodźachu ju na wotewzaće kreje do Budyskeje chorownje.
Policija (29.10.18)
Wodu kradnyli
Běła Woda. Nic alkohol abo druhe hódnotne wěcy, ale zawěrno njewšědnu rubiznu běchu njeznaći minjene dny w Běłej Wodźe pokradnyli. Po wšěm zdaću běchu woni přelěni sami nakupować hić. Tak spakosćichu woni 87lětnej žonje z jeje pincy we wjaceswójbnym domje na Humboldtowej nimale 40 blešow mineralneje wody. Byrnjež hódnota rubizny poměrnje snadna była, kaž Zhorjelska policajska direkcija zdźěli, dyrbi so staruška nětko znowa dračować, zo by sej z kupnicy ćežke bleše wody zaso domoj znosyła.
