Policija (10.05.19)
Paduchow lepili
Budyšin. Cigarety a alkohol chcyštaj mužej zawčerawšim z kupnicy w Budyskej Strowotnej studni kradnyć. Jako to předawarki pytnychu, wobaj ćeknyštaj. Při tym je 33lětny při informaciji dwaj telefonaj skóncował, dokelž sobudźěłaćerka runje policiju wołaše. Jeho pak zastojnicy přiwšěm zajachu, při čimž so jedyn z nich zrani. Tamny skućićel, 36lětny Budyšan, je z kupnicy twochnył a sobudźěłaćerjej hrozył. Tež to pak jemu ničo njepomhaše, dokelž policisća jeho z druhich deliktow hižo znajachu a pozdźišo „wopytachu“.
Policija (09.05.19)
Kolesowar smjertnje znjezbožił
Mučow. Tragiske wobchadne njezbožo je so wčera rano na zwjazkowej dróze B 96n stało. 61lětny kolesowar jědźeše po lěsnym pućiku z Hórnikec do Ćiska. Jako chcyše B 96n přeprěčić, přewidźa wón po wšěm zdaću so bližacy transporter, kotrehož 63lětny šofer njemóžeše hižo borzdźić. Kolesowar so tak ćežko zrani, zo hišće na městnje njezboža zemrě. Dróha bě šěsć hodźin dospołnje zawrjena.
Policija (08.05.19)
Na cuzej ležownosći zachadźeli
Budyšin. Wjacori njeznaći přebywachu minjeny kónc tydźenja w Budyšinje bjez dowolnosće na jim cuzej ležownosći při Naměsće přećelstwa ludow w Strowotnej studni a zawostajichu tam najwšelakoriši njerjad. Mjez druhim wuhlada mějićel na swojim wobsydstwje stare awto a zbytki spalenych plastikowych blešow.
Policija (07.05.19)
Paduchow cigaretow lepili
Wojerecy. Kedźbliwa wobydlerka měješe w nocy na njedźelu rozsudny tip, zo móžeše policija we Wojerecach młodeju muži zajeć. Wonaj běštaj na Budyskej dróze cigaretowy awtomat rozbuchnyłoj a z njeho pjenjezy kaž tež cigarety pokradnyłoj. Jako alarmowani policisća přijědźechu, zwěsćichu w bliskosći podhladneju, kotrajž wopisanju swědki wotpowědowaštaj. Muži w starobje 19 a 27 lět nachwilnje zajachu, na rewěrje wonaj swój njeskutk přiznaštaj. Za njón wužiwaštaj zakazanu pyrotechniku. Pola skućićelow namakachu tež pjenježnu kasetu a pokradnjene cigarety.
Policija (06.05.19)
Meju podrězali
Worklecy. Rjany nałožk mejemjetanja něchtó Worklečanskim šulerjam najskerje zawidźi. Na dworje šule dyrbjachu sobotu připołdnju zwěsćić, zo běchu tam njeznaći w nocy do toho meju podrězali. To rozprawja policajska direkcija. Wěcnu škodu trochuja na něhdźe 150 eurow.
Policija (03.05.19)
Drohe koleso pokradnyli
Wojerecy. Runje zawčerawšim na dnju dźěła njejsu paduši we Wojerecach wotpočnyli, ale so na Drježdźanskej dróze namócnje do kólnje zadobyli. Z njeje pokradnychu chětro drohe koleso, nic pak dospołne, kaž policajska direkcija informuje. Zadnje koleso woni mjenujcy wušrubowachu a w kólni wostajichu. Za to wot dalšeho koła zadnje koleso wutwarichu a do pokradnjeneho mountainbika zatwarichu. Čehodla su tak postupowali, je policiji hódančko. Jasne pak je, zo bě hórske koleso typa Canyon něhdźe 1 300 eurow hódne. Policija nětko za nim pyta.
Policija (02.05.19)
Pjany z awtom po puću był
Wojerecy. Wčerawša 1. meja bě hakle połdra hodźiny stara, jako zastojnikam we Wojerecach Porsche Cayenne napadny. Policisća kazachu 29lětnemu wodźerjej zastać, zo bychu sej jeho a jeho jězdźidło bliže wobhladali. Spěšnje napadny jim chorhojčka šofera, tak zo přewjedźechu alkoholowy test, kotryž wunjese 2,4 promile alkohola w kreji muža. Z tajkim wuslědkom zwjazanej běštej zahajenje chłostanskeho jednanja dla wopiłstwa w nadróžnym wobchadźe a njejapki kónc nócneho wulěta.
Policija (30.04.19)
Z wuhenja so kuriło
Kamjenc. Trochu kuriozne bě zasadźenje wohnjowych wobornikow wčera nawječor w Kamjencu. Tam běchu kameradow alarmowali, dokelž so pječa třěcha domu na Budyskej dróze paleše. Wobydlerjo běchu z hižo lěta prózdneho twarjenja kur stupać widźeli. Wobory z Kamjenca, Brěznje a Lückersdorfa z nimale 50 wobornikami přijědźechu. Tež policija a wuchowanska słužba běštej po puću. Na Budysku dróhu dojěwši pak nichtó žane płomjenja njewuhlada. Město toho so z wuhenja ruiny mócnje kurješe, a nichtó njemóžeše sej rozkłasć, čehodla. To dyrbješe sej hakle přiwołany saznik bliže wobhladać. Što je wón wuslědźił, bohužel znate njeje.
Ze zahrody grat pokradnyli
Ćichońca. Dwě zahrodźe w Ćichońcy (Teichnitz) pola Budyšina běštej w nocy na minjenu njedźelu cil paduchow. Tam zadobychu so do pódlanskeju twarjenjow a pokradnychu z nich wšelake elektriske graty, z kotrymiž wobsedźerjo swoju zahrodu wobdźěłachu. Po informacijach policije ma rubizna cyłkownu hódnotu něhdźe 1 700 eurow. Kriminalisća pad přepytuja.
Policija (29.04.19)
Kolesa wotšrubowali a pokradnyli
Biskopicy. Wot sydom nowych wosobowych awtow su njeznaći w nocy na sobotu w Biskopičanskim awtowym domje kolesa wotšrubowali a je pokradnyli. Pod awta połožichu plesternaki, kotrež běchu z dwora zwutorhali. Škoda wučinja něhdźe 28 000 eurow.
Policija (26.04.19)
Z mopedom znjezbožił
Sulšecy. Při wobchadnym njezbožu zawčerawšim popołdnju blisko delnich Sulšec je so 15lětny hólc ćežko zranił. Wón jědźeše ze swojim mopedom do směra na Šunow, jako při wotbóčce do Tradowa z dotal njeznateje přičiny na lěwym boku z puća přińdźe. Tam prasny młodostny do wobchadneho znamjenja. Wuchowanska słužba so wo zranjeneho stara a dowjeze jeho do chorownje. Wěcna škoda wučinja něhdźe 250 eurow.
