Policija (12.10.17)
Hižo dopołdnja wopity
Połčnica. Jako zastojnicy patrulje Kamjenskeho policajskeho rewěra w Połčnicy na Kamjenskej dróze wutoru dopołdnja wodźerja Forda kontrolowachu, za alkoholom „ćehnješe“. Po tesće so wukopa, zo měješe 63lětny 1,02 promilej alkohola w kreji. Měło so tole wobkrućić, wočakujetej wopiteho pjenježna pokuta 500 eurow a dypkaj w centralnym registrje w Flensburgu.
Popjeroweho pryskarja lepili
Běła Woda. W Běłej Wodźe je patrulja městneho policajskeho rewěra wčera w nocy 33lětneho na Karla-Marxowej dróze kontrolowała. W nachribjetniku młodeho muža nadeńdźechu stražnicy teleskopowe pradło a popjerowy spray. Z dokładnišeho přepytowanja wuchadźa, zo je kontrolowany spray před někotrymi tydźenjemi při padustwje wužiwał.
Policija (11.10.17)
Awto do wabjenskeje tafle zrazyło
Budyšin. Na Budyskej Nowosólskej dróze je wčera popołdnju šofer přezpólneho woza Kia na B 96 z města won z dotal njeznateje přičiny kontrolu nad jězdźidłom zhubił. Tuž zjědźe z jězdneje, zrazy do wabjenskeje tafle a potom do wjacorych wjetšich kamjenjow, kotrež před awtowym domom ležachu. Při tym so wodźer awta zrani, kotrehož wuchowanska słužba zastaraše. Policija přepytuje, hač měješe šofer strowotniske problemy.
Policija (10.10.17)
Kolesowarjow kontrolowali
Budyšin. Zastojnicy Budyskeho policajskeho rewěra su minjeny kónc tydźenja w Budyšinje kolesowarjow kontrolowali. Přičina bě, zo so wobydlerjo na policiju wobroćichu. Wšako běchu po měnjenju Budyšanow mnozy z kolesom na chódnikach po puću a tež techniski staw kołow bě po jich měnjenju jara špatny. Tole so na kóncu při kontroli tež wobkrući. Cyłkownje 14 kolesowarjam zastojnicy porok wuprajichu.
Dźiwi płót wobškodźili
Hórnikecy. W Hórnikecach su njeznaći zawčerawšim na Ernsta-Thälmannowej wobhrodźenje dźiwiznoweho rewěra wobškodźili. Tuž móžachu z njeho něhdźe 40 skoćatow do wokolnych lěsow ćeknyć. 56lětnemu wobsedźerjej stadła so poradźi, někotre z dźiwich skoćatow zaso popadnyć. Wěcna škoda wučinja něhdźe 3 000 eurow.
Do garažow so zadobyli
Njedźichow. Kónc tydźenja zadobychu so njeznaći w Njedźichowje na Wojerowskej do garažoweho kompleksa. Što su sobu wzali, dotal znate njeje.
Policija (09.10.17)
Na awtodróze do awta zajěł
Porchow. Z njeznateje přičiny je wčera popołdnju šofer mjez Porchowom a Ohornom na A 4 do před nim jěduceho awta zrazył. Kameradojo Hornjowujězdźanskeje a Porchowskeje wohnjoweje wobory městnosć njezboža zawěsćichu a jězdnu wurjedźichu.
Policija (06.10.17)
Ćěšenkej žiwjenje wuchował
Njedźichow. Jako pomocnik w žiwjenskim straše wopokazał je so zawčerawšim policist w Njedźichowje. Ćěšenk z Ruskeje pochadźaceje swójby lědma hišće dychaše a trjebaše nuznje lěkarsku pomoc, tak zo swójba na puću policista narěča. Tón sadźi swójbu z holčku do swojeho słužbneho awta, zaswěći módru swěcu a signal a smaleše do Wojerowskeje chorownje. Tam lěkarjo dźěsću pomhachu, tak zo njeje hižo w žiwjenskim straše.
Policija (05.10.17)
Pod wliwom alkohola do tafle zajěł
Hodźij. Při wjesnej tafli w Hodźiju je so zawčerawšim wječor jězba młodeho muža z jeho wosobowym awtom typa Škoda skónčiła. 26lětny bě ze Žičenja přijěł, je kontrolu nad wodźidłom zhubił a zrazy do tafle, kotraž so při tym skóncowa. Při wobdźěłanju njezboža policisća zwěsćichu, zo měješe šofer 2,66 promilow alkohola w kreji. Jeho dowjezechu z wuchowanskim awtom do chorownje. Jězbnu dowolnosć sej policija wobchowa.
Policija (04.10.17)
Konje ćeknyli
Brětnja-Michałki. We wjacorych telefonatach běchu wobydlerjo zawčerawšim wječor policiji zdźělili, zo na zwjazkowej dróze B 97 mjez Wojerecami a Njedźichowom konje swobodnje běhaja. Přiwołana wobsadka policajskeho awta na to blisko Brětnje-Michałkow tři konje wuhlada a je z puća wjedźeše. Pozdźišo móžachu zastojnicy štyrinohače zbožownej wobsedźerce přepodać.
Policija (02.10.17)
Powučić so njedał
Budestecy. Při wobchadnej kontroli pjatk wječor w Budestecach lepichu 25lětneho wodźerja Škody, kiž žanu jězbnu dowolnosć njeměješe. Chłostanska zdźělenka a powučenje pak ničo njewuskutkowaštej, přetož poł hodźiny pozdźišo młody muž znowa za wodźidłom sedźeše a policisća jeho wospjet lepichu. Tónraz sej woni klučik awta hnydom wobchowachu.
Policija (29.09.17)
W jastwje so paliło
Budyšin. K hašenju su wohnjowych wobornikow wčera wječor do Budyskeho jastwa wołali. Po informacijach policije bě tam młody muž z Lybiskeje swoju matracu zapalił. Dokelž alarmowa připrawa hnydom fungowaše, běchu wobornicy spěšnje na městnje a woheń zhašachu. 25lětneho Lybičana w chorowni zastarachu, wón pak bě dźensa rano zaso w jastwje. Zasadźenych bě pjeć wohnjowych woborow z jědnaće jězdźidłami.
Policija (28.09.17)
Kable roztřihali
Miłoraz. Na terenje Wochožanskeje brunicoweje jamy pola Miłoraza chcychu wutoru wječor njeznaći kable kradnyć. Woni wotrěznychu wjacore milinowody po cyłkownej dołhosći 200 metrow, roztřihachu je do mjeńšich kuskow a sej je za pozdźiši transport přihotowachu. Sobudźěłaćerjo pak to pytnychu, tak zo k padustwu hižo njedóńdźe. Přiwšěm nasta wěcna škoda, kotruž trochuje firma na něhdźe 3 000 eurow.
