Policija (11.01.18)
Wobšudźić spytali
Běła Woda. Dohromady dźewjeć razow su njeznaći w Běłej Wodźe a we wokolinje spytali, wobydlerjam z trikom nahladne sumy pjenjez wulišćić. Tak prošachu woni na přikład jako „wnučkojo“ telefonisce wo 15 000 eurow. Na zbožo so trik w žanym padźe šlachćił njeje.
Młodostny so wobarał
Wojerecy. Jako policija zawčerawšim wječor na Wojerowskim Łužiskim naměsće skupinu ludźi kontrolowaše, bě tam tohorunja 15lětny młodostny, za kotrymž hižo pytachu, dokelž bě doma ćeknył. Tón pak so tak mócnje wobaraše, a dyrbjachu jemu ruce sputać, zo móhli jeho staršimaj přepodać. Kajke tele zasowidźenje skónčnje bě, bohužel znate njeje.
Policija (10.01.18)
Droho telefonowałoj
Budyšin. Zastojnicy Budyskeho awtodróhoweho policajskeho rewěra su zawčerawšim na awtodróze A 4 mjez Zhorjelcom a Drježdźanami 46lětneho wodźerja Škody a 36lětneho šofera nakładneho awta lepili, jako staj jěducy handy wužiwałoj. Za to změjetaj wonaj kóždy sto eurow pokuty płaćić a dóstanjetaj dypk w Flensburgu. Wot awgusta minjeneho lěta policija přeńdźenja přećiwo tak mjenowanemu zakazej handyja při jězdźenju sylnišo chłosta. A to ma swoju přičinu, přetož změna zakonja wopřijima posłužowanje wšitkich elektroniskich nastrojow za čas jězby, kotrež słuža komunikaciji, informaciji a organizaciji. Město předwidźaneje pokuty sto eurow dóstanu potrjecheni we wobchodźe hižo dosć dobru rěčensku připrawu.
Policija (09.01.18)
Z busom dale sobu jěć njesměł
Słona Boršć. Dokelž w nocy na póńdźelu wopity a renitentny sobujěducy z busa wulězć nochcyše, zasta šofer krótko po połnocy na Słonoboršćanskim wotpočnišću při awtodróze A 4 a zazwoni policiju. Jako zastojnicy přijědźechu, 25lětny tež jim napřećo agresiwnje wustupowaše, tak zo dyrbjachu młodeho muža sputać, zo bychu jeho změrowali. Alkoholowy test wunjese pola njeho pozdźišo 2,72 promilow. Tole so tež při lěkarskim přepytowanju wobkrući, tak zo sej muža hnydom w chorowni wobchowachu. Bus je do směra na Ingolstadt bjez wopiteho harowaka dale jěł.
Policija (08.01.18)
Hajnik zapřimnyć njetrjebał
Łuty. Swoju wćipnotu by sobotu popołdnju dźiwje swinjo we Łutach bjezmała ze žiwjenjom zapłaćiło. Wone bě so něhdźe w 15.30 hodź. na Parkowym puću do zahrodnišća zabłudźiło, zwotkelž so pak hižo won njenamaka. Jedyn ze zahrodkarjow informowaše na to policiju a ta hajnika. Swinjo najskerje čuješe, kotry wosud jemu kiwa, a tak tola hišće puć přez wočinjene wrota zahrodnišća do wěsteje swobody nańdźe. Policija a hajnik njetrjebaštaj tuž zapřimnyć.
Policija (05.01.18)
Na parkowanišću spał
Ottendorf-Okrilla. Chětro alkoholizowany je so zawčerawšim připołdnju muž pola Ottendorfa-Okrille wosrjedź awtodróhoweho parkowanišća wuspał. Tam nańdźe jeho wobsadka policajskeho awta smorčaceho a spjaceho kaž kamjeń, kaž w policajskej rozprawje rěka. Zastojnicy 33lětneho wubudźichu a prošachu jeho k alkoholowemu testej. Tón wunjese 3,28 promilow. Dowjezechu „pućowaceho“ tuž do chorownje, hdźež wón k swójskemu derjeměću hač do přichodneho dnja wosta. Kak je na wjele wužiwane parkowanišćo přišoł, znate njeje.
Policija (04.01.18)
Wjace hač dwójce tak spěšnje
Budyšin. Spěšnosć kontrolowała je policija zawčerawšim w 30 km/h-pasmje na Budyskich Schillerowych zelenišćach. W třoch hodźinach měrješe wona 700 jězdźidłow, a 67 bě přespěšnych. Njesławny rekord docpě wodźer Audija, kotrehož błysknychu ze 77 km/h. Wón změje nětko 200 eurow pokuty płaćić, dóstanje dwaj dypkaj w Flensburgu a dyrbi jedyn měsac nóžkować.
Policija (03.01.18)
Awtomat rozbuchnyli
Mały Wjelkow. Silwesterske praskotaki njejsu Nowe lěto w Małym Wjelkowje jenož k zawjeselenju wužiwali. Tam běchu zawčerawšim něhdźe w 6 hodź. cigaretowy awtomat rozbuchnyli a za to po wšěm zdaću pyrotechniske wudźěłki wužiwali. Hač su njeznaći cigarety abo pjenjezy spakosćili, njeje znate. Škoda wučinja něhdźe 3 000 eurow.
Policija (02.01.18)
Woheń wulku škodu načinił
Běła Woda. Wšo druhe hač měrliwy spočatk noweho lěta dožiwichu wohnjowi wobornicy wčera rano w Běłej Wodźe. Krótko po 6 hodź. wołachu jich k hašenju wohenja na Jabłóńskim puću. Tam bě so z dotal njeznateje přičiny najprjedy nakładowane drjewo palić započało. Pozdźišo přeskočichu płomjenja na susodnu garažu. Nimo Běłowodźanskich wobornikow běchu tohorunja jich kolegojo z Wuskidźe zasadźeni. Garaža so dospołnje wotpali, runje tak dwě jězdźidle w njej. Wobornikam drje so poradźi zadźěwać, zo płomjenja na susodny bydlenski dom přeskoča. Nastata horcota pak wuskutkowa tež na nim wěcnu škodu. Kelko to dokładnje bě, njeje hišće zwěsćene. Na zbožo so nichtó zranił njeje. Fachowc ma nětko přičiny wohenja přepytować. Najskerje bě so silwesterski praskotak do drjewa zabłudźił. Dalše přepytowanja je kriminalna policija přewzała.
Policija (29.12.17)
Špihele awtow wobškodźeli
Wojerecy. Po hodownych swjatych dnjach dožiwichu wjacori wobsedźerjo wosobowych awtow njelubu překwapjenku. Njeznaći běchu na wšelakich městnach we Wojerecach kaž tež w susodnym Ćisku a w bliskich Wulkich Ždźarach wot awtow škleńcu wonkownych špihelow wotstronili. Potrjechene běchu jězdźidła typow Mercedes Benz, Škoda a BMW. Dokładny wobjim škody drje hišće zwěsćić njemóžachu, po wšěm zdaću pak jedna so wo znajmjeńša 2 000 eurow. Zo móhli skućićelow namakać, prosy policija wobydlerjow wo pomoc. Štó je we Wojerecach na Schweitzerowej, Lilienthalowej a Armstrongowej kaž tež w Ćisku a we Wulkich Ždźarach podhladne jězdźidła abo wosoby widźał? Pokiwy přijimuja pod telefonowym čisłom 03571/ 46 50.
Policija (28.12.17)
Do rěznistwa so zadobyli
Wojerecy. Wokoło hodownych swjatych dnjow běchu so njeznaći na Wojerowskej Hasy Ziolkowskeho do rěznistwa zadobyli a pokradnychu tam třicyfrowu sumu pjenjez. Na to přepytachu tež rumnosće susodneje pjekarnje a načinichu wěcnu škodu něhdźe 4 000 eurow.
Pod wliwom drogow z awtom jěł
Brětnja. Zawčerawšim dopołdnja su policisća w Brětni na B 97 šofera Peugeota zadźerželi. Při kontroli woni zwěsćichu, zo bě 25lětny pod wliwom drogow po puću.
