Bilanca a wuhlad skupiny
Swoje lońše dźěło wuhódnoćiła a plan za 2018 nastajiła je sej Domowinska skupina Pančicy-Kukow na wčerawšej hłownej a wólbnej zhromadźiznje. Nimo přednoškow Moniki Gerdesoweje a Clemensa Bejmaka wopytachu skupinarjo inscenaciju NSLDź „Za brězami“, podźěłachu při pomniku Ćišinskeho w Lipju a wulećachu sej do Lipska. Lětsa přewjedu mjez druhim čitanski wječor, wopytaja wustajeńcu wo Krabaće w Budyskim Serbskim muzeju a podadźa so do Konječanskeho ratarskeho muzeja.
Něhdźe 40 čłonow je wčera dotalne skupinske předsydstwo z Pětrom Korjeńkom na čole w funkciji wobkrućiło. Domowinskej skupinje Pančicy-Kukow přisłuša tuchwilu 92 čłonow. Nowych, předewšěm w srjedźnej starobje do skupiny nawabić měł přichodnje jedyn z wažnych nadawkow předsydstwa być, namołwješe Alfons Kuring. Marian Wjeńka
Klankodźiwadźelnik so dopominał
Jako serbski klankodźiwadźelnik je wón swójske stawizny pisał: rodźeny Pozdečan Měrćin Krawc. Njedawno powědaše nam serbskim senioram Budyskeje tachantskeje wosady na měsačnym zetkanju wo swojich dožiwjenjach, kotrež měješe přez lětdźesatki na tymle wosebitym polu jewišćoweho wuměłstwa.
Klankodźiwadłowa sparta bu 1961 pod intendantom Jurjom Wuješom w Serbskim ludowym dźiwadle w Budyšinje załožena. „Mišter Krabat“ a „Ptači kwas“ słušeštej do prěnich inscenacijow. Kruhej awtorow přisłušeše tehdy předewšěm Hańža Bjeńšowa, pozdźišo tež Gerat Hendrich. Wjele serbskich a němskich dźěći je tele předstajenja rady wopytowało.
Ralbičanscy šulerjo pomhali
Z pjenježnym darom 205 eurow su wotchadnicy Ralbičanskeje wyšeje šule pomocny projekt w afriskim Malawiju podpěrali a mi přepodali. Tele pjenjezy wužiwam za dweju mótkow, dwójnikow Andrewa a Alexandera Mitaye ze wsy Madisi, kotrajž běštaj w mojim 5. lětniku šulskeho lěta 2012/2013, jako sym sama we wobłuku pomocneho projekta na šuli St. Francis dźěłała a jeju wuwučowała. Wot toho časa jeju podpěruju. Dokelž mataj jenož hišće mać, jimaj tež wyšu šulu z pjenjezami spěchuju. Wobaj staj mudraj hólcaj, čehoždla so nadźijam, zo z dobrymi znamkami za swój lěpši přichod dźěłataj. Wudawki za šulu w Malawiju su so lětsa zaso podróšili, tak zo wučinjeja wone nětko na wosobu lětnje 270 eurow. Z wutroby so wjeselu, zo mi lońši Ralbičanscy wotchadnicy pomhaja, dźěl šulskich pjenjez za woneju hólcow zwjesć.
Pohodowne zetkanje w znamjenju ekumeny
Hodownička katolskich Serbow tachantskeje wosady njedźelu po Nowym lěće steješe tež lětsa cyle w znamjenju ekumeny. Poměrnje bohaty běše hižo wopyt nyšpora w cyrkwi Našeje lubeje knjenje z prelatom Witom Sćapanom a superintendentom Janom Malinkom. Derje přihotowanu pobožnosć wobrubi kwartet młódšich wosadnych z někotrymi hodownymi pěsnjemi, mjeztym zo přewodźeše tachantski kantor Friedemann Böhme zhromadne kěrluše na pišćelach.
Miniskupina rozpušćena
K swojej hłownej zhromadźiznje a hodowničce zetkachu so njedawno čłonojo Hornjohórčanskeje Domowinskeje skupiny pola Jahnec-Brězanec w Debsecach. Předsyda poda rozprawu za lěto 2017. Wopytachmy kulturne zarjadowanja kaž ptači kwas SLA, wustajeńcu w Serbskim muzeju „500 lět reformacija a Serbja“, XII. mjezynarodny folklorny festiwal w Hochozy a Chrósćicach, serbske inscenacije NSLDź kaž tež nazymski koncert w Bukecach. Za rozprawu na župu a wotličenje spěchowanja na Załožbu za serbski lud dyrbjachmy někotre pisomne wěcy rjadować a tež lětny přinošk čłonow zběrać. Rezimej financneje rozprawy bě, zo runaja so wudawki dochodam, spěchowanym ze 40 eurami. Za serbske kulturne zarjadowanja kupichmy zastupne lisćiki za 103 eura. Za LND předawachmy a kupichmy tež sami protyki a knihi w hódnoće 370,60 eurow.
Zhromadnje wobhladachmy sej film „My Słowjenjo w Němskej“. Trěbnu techniku natwariłoj běštej Annett Brězanowa a Judit Heroldowa. Za poradźeny wječor wuprajichu hosćo mandźelskimaj Jahn-Brězanecom wulki dźak.
Partnerske zrěčenje ze šulu podpisali
Posledni šulski dźeń do hód zetkachu so wuknjacy Kulowskeje wyšeje šule „Korla Awgust Kocor“ po třećej hodźinje w sportowej hali, a to k tradicionalnemu dohodownemu spěwanju. Lětsa pak bě wšo tróšku hinaše. Po tym zo instrumentalna skupina zarjadowanje zahaji, podpisachu nawodnica kubłanišća Ines Lešowa, zamołwići Drježdźanskeje Industrijneje a wikowanskeje komory (IHK) a zastupjerjo zawodow partnerske zrěčenje. Jednaćel kubłanskeho wobłuka IHK Torsten Köhler zwurazni swoje wjeselo, zo Kulowske kubłanišćo ze zawodami a firmami styki wudźeržuje. Su to energijuzastaranske předewzaće Čorny Halštrow, Kulowska meblownja Maja, twornja za produkciju klimowych kompresorow w Nadróznej Hrabowce a kupnica Netto. Zaměr partnerskeho zrěčenja je, zo so Kulowscy šulerjo w mjenowanych zawodach za wukubłanskimi městnami rozhladuja. Kulowski měšćanosta Markus Posch (CDU), kiž bě hósć na hodownym spěwanju, aktiwity šule wita a je podpěruje.
Dostojnu adwentničku swjećili
Swoje poslednje lětuše měsačne zarjadowanje su sej Budyscy katolscy serbscy wuměnkarjo 19. hodownika po tradiciji znowa sami jako swoju adwentničku we wotpowědnje rjenje wupyšenej rumnosći Carity pódla cyrkwje wuhotowali.
Kěrluše, ludowe adwentne kaž tohorunja hodowne spěwy, dostojne přednjesenje a čitanje adwentnemu kaž tež hodownemu časej wotpowědnych powědančkow a basnjow z tróšku staršich literarnych žórłow wšitkich zwjeselichu. Tak čitaše mjez druhim knjeni Žurkowa ze Serbskeje čitanki za horni schodźenk ludowych šulow „Kwětki“ (1921) powědančce „Hodowny wobraz z wulkeho města“ wučerja Korle Wyrgača (1883– 1956) a „Bože dźěćo“ duchowneho Handrija Dučmana (1836–1909). Knjeni Pinkawina přednjese žortnu baseń Bena Budarja „Njepraj dale“ ze Serbskeje protyki 1971, a knjeni Jurosowa recitowaše rjanu němskorěčnu baseń „Die vier Kerzen“. Tele a hišće někotre dalše přinoški kaž wězo tež tróšku bjesady wupjelnichu dopołdniše rozpominanske zarjadowanje při dobrym wosušku a dalšich hodownych přikuskach z kofejom.
W internaće na hody so přihotowali
Šulerjo internata Budyskeho Serbskeho gymnazija so runja tym, kotřiž wotydźenja doma pola staršeju bydla, na hody wjesela a so na nje přihotuja. Tak smy zhromadnje kónc nowembra hodownu pychu a hwězdy za hodowny štom paslili. Hižo k prěnjemu adwentej wopytachu šulerjo wobydlerjow bliskeje starownje a přednjesechu jim adwentne a hodowne spěwy. Hdyž wšak cyły tydźeń w Budyšinje bydliš, podaš so wězo tež na Wjacławske wiki. Chór 1. serbskeje kulturneje brigady pod wuměłskim nawodom Friedemanna Böhmy je so pola nas na swój adwentny koncert přihotował. Zwjeselace je, zo tójšto šulerjow internata na wšelakich instrumentach hraje a program tak wobohaća.
Často smy zhromadnje poprjancy pjekli a so na akciji Radija Satkula wobdźělili, jako fachowcy poprjančki woptachu a posudźowachu. Ćim bóle so wjeselachmy, zo smy 3. městno we wubědźowanju wobsadźili. Sydom šulerkow pod nawodom Hilže Zyndźineje tydźensce wušiwanski kurs wopytuje a sej rubiško za narodnu drastu wušiwa. Druzy wužiwaja swobodny čas za volleyball. To je dobra wotměna k šulskej wučbje.
Hober Sprjewnik sobu hrał
Po mjeztym sedmym beneficnym koncerće w Rynčec bróžni dožiwichu Jasčenjo minjenu sobotu swoju tradicionalnu adwentničku w kulturnym domje „Bjesada“. Do rjenje wupyšeneje rumnosće přichwatachu połni wočakowanja stari kaž tež młodźi wjesnjenjo. Dźěći wjeselachu so najbóle na wopyt rumpodicha a Božeho dźěsća, starši wšak na nowu hodownu hru.
Najprjedy dachu sej wšitcy kofej a wosušk zesłodźeć. Při bjesadźe so čas spěšnje miny. Hižo so wonka ćmičkaše a dojěli běchu – kaž kóžde lěto – dujerjo Njeswačanskeje wosady, zo bychu Jasčanow z dohodownymi a zymskimi melodijemi zawjeselili. Ze sylnym přikleskom a małym darom so jim dźakowachu.
Zasłužbneju čłonow počesćili
Předsydstwo Katolskeho zjednoćenstwa kubłarjow Sakskeje (KEG) je swojich čłonow tele dny na tradicionalne zetkanje w adwenće přeprosyło, a to tónkróć do Drježdźanskeho hosćenca „Kurhaus“. Mjez něhdźe 30 přitomnymi běše nimale połojca Serbow. Rjane, wjesołe a pokojne zetkanje je předsydstwo KEG pod nawodom swojeje předsydki Moniki Jurkoweje organizowało.
Po witanju, kofejpiću z dobrym hodownym pječwom informowaše městopředsyda sakskeho KEG Franz-Josef Fischer wšitkich wo předewzaćach, kubłanjach a dalšich zarjadowanjach w lěće 2018. Tak čakaja na čłonow w słužbje kaž tež na wuměnku klětu nimo tradicionelnych nowe poskitki a wězo tež nadawki.
Po tym počesći předsydstwo prěni raz třoch sobustawow za wjelelětne skutkowanje w zjednoćenstwje z medalju swjateho Bena-Mišnjanskeho, zhotowjenej z Mišnjanskeho pórclina. Dwě spožčichu so Serbomaj z Budyšina, a to Ludmile Bizoldowej a Jurjej Nukej.
