Koncert a galerija
Njeswačidło. Prěni lětuši koncert w Njeswačanskim hrodźe wotměje so njedźelu, 15. meje, w 15 hodź. Zaklinča filmowa hudźba a šansony 1920- do 1940tych lět. Kapała „Štyri capriole“ kaž tež Njeswačanske domizniske a kulturne towarstwo wjeselitej so na mnohich wopytowarjow. W Małej galeriji wustaja Budyšan Andreas Rochor swoje mólby.
Ludowe wuměłstwo widźeć
Dešno. K mjezynarodnemu muzejowemu dnjej njedźelu, 15. meje, wotewru w 16 hodź. w Dešnjanskim domizniskim muzeju nowu wosebitu wustajeńcu. Ekspozicija „Ludowe wuměłstwo w NDR“ prezentuje wysoku kwalitu wuměłskich dźěłow a mnohe fakty k stawiznam kaž tež wuwiću wuměłskeho ludoweho tworjenja z něhdyšeho wobwoda Choćebuz. Wo hudźbne wobrubjenje stara so skupina „Drjewjanki“.
Na hłownu a wólbnu
Chrósćicy. Předsydstwo Towarstwa Cyrila a Metoda (TCM) přeprošuje wšitkich čłonow towarstwa, čłonow sekcijow a korporacijow kaž tež zajimowanych hosći na swoju hłownu a zdobom wólbnu zhromadźiznu pjatk, 13. meje, do Chrósćic. Započatk budźe w 19 hodź. z Božej mšu w cyrkwi. Přizamknje so zhromadźizna na farje.
Po přestawce zaso kofejownja
Budyšin. Budyski ekumeniski tachantski wobchod přewjedźe pjatk, 13. meje, wot 18.30 hodź. zaso literarnu kofejownju. Ullrich Schollmeyer z Budyskeho měšćanskeho muzeja wustupi tam jako kantor August Bergt, kiž bě před něhdźe 200 lětami organist w Budyskej cyrkwi swjateho Pětra. Jako hudźbny wučer na wučerskim seminarje je wón kantorow Hornjeje Łužicy wukubłał. Wo hudźbne wobrubjenje wječora staraja so dujerjo skupiny Consonare pod nawodom Evelyn Fiebiger. Zarjadowanje wotměje so na Pětrowej žurli wosadneho domu Při měšćanskim nasypje 12.
Pytaja wikowarjow
Serbske popołdnjo tež lětsa
Wochozy. Po lońšim wuspěšnym serbskim popołdnju we Wochožanskim parku błudźenkow chcedźa tam tajke zarjadowanje lětsa znowa přewjesć. Wone wotměje so njedźelu, 8. meje, wot 14 hodź. Za to je Smjerdźečanska rejwanska skupina nowy program nazwučowała, kotryž nałožk mejemjetanja předstaji. Kaž organizatorojo zdźěla, pojěcha mejski kral z kralownu na konju po parku.
Wotewru přehladku
Wojerecy. Nowu wosebitu wustajeńcu „Manfred Vollmert – metalowy design“ wotewru njedźelu, 8. meje, w 10.30 hodź. w kaminowej stwě Wojerowskeho hrodu. W přehladce prezentuja dźěła Židźinskeho wuměłca z jeho dlěje hač 50 lět trajaceho kreatiwneho tworjenja. Twórby Manfreda Vollmerta su kruty wobstatk wuměłskeho wobraza Wojerec, regiona a mnohich dalšich městow. Dale widźeć budu jeho plastiki a nadawkowe dźěła za sakralne rumnosće.
Poradźuje darmotnje
Na dźeń wotewrjenych duri
Kamjenc. Swój dźeń wotewrjenych duri móže Kamjenska hudźbna šula lětsa zaso w prezencnej formje přewjesć. Wšitke na hudźbje zajimowane dźěći kaž tež młodostni a starši su sobotu, 7. meje, na Kamjensku Macherowu 140a přeprošeni. W času wot 14 do 17 hodź. móža wopytowarjo instrumenty wuspytać a so z hudźbnymi wučerjemi rozmołwjeć. Hudźbny program poda dohlad do skutkowanja kubłanišća. Zajimcy njech přizjewja so pod telefonowym čisłom 03578 7747370.
Wobornicy přeprošeni
Róžant. Dobrowólne wohnjowe wobory zarjadniskeho zwjazka Při Klóšterskej wodźe swjeća jutře, pjatk, dźaknu Božu mšu składnostnje swjedźenja swjateho Floriana. Wona započnje so w 19 hodź. w Róžeńčanskej hnadownej cyrkwi. Wšitcy wohnjowi wobornicy kaž tež dalši hosćo su k tomu přeprošeni. Božu mšu organizuje lětsa Njebjelčanska dobrowólna wohnjowa wobora.
Wo serbskich pomnikach
Porěča z kandidatom
Kamjenc. Rozmołwa wo serbskich prašenjach z kandidatom za wólby Budyskeho krajneho rady Alexom Theilu wotměje so srjedu, 4. meje, w 19 hodź. w Kamjenskim běrowje Lěwicy na Budyskej čo. 8. Wječor skići móžnosć, so wo předstawach kandidata wosebje tež k serbskim naležnosćam a prezency serbskeje rěče w Budyskim wokrjesu a we wokrjesnym zarjadnistwje dorozumić. Na zarjadowanje přeprošuje dźěłowy kruh Serbja pola SPD.
Předpředań zaběžała
Budyšin. Wot wčerawšeho předawaja zastupne lisćiki za Łužiske hudźbne lěćo 2022. Na programje steji dwanaće zarjadowanjow w Budyšinje a wokolinje wot 12. do 28. awgusta. Dospołny program nadeńdu zajimcy internetnje pod . Lisćiki poskićuja w Budyskim měšćanskim zarjadnistwje kaž tež w Žitawje, Njeswačidle, Chróstawje a Großschweidnitzu.
Serbska hudźba w Lipsku
Greenpeace a mandala
Miłoćicy. Před lětomaj nastaty mandala mjez Miłoćicami a Njebjelčicami ma so wobnowić. Zdokonjeć chcedźa to jutře, sobotu, čłonojo hornjołužiskeje skupiny Greenpeace. Njebjelčanski wjesnjanosta Tomaš Čornak (CDU) chce jim na pućowanju gmejnu předstajić. Zdobom wobdźěla so na mejestajenju popołdnju na nawsy w Njebjelčicach. Njedźelu potom wotměje so w Miłočanskej skale měnjenska bursa rostlinow. Wot připołdnja w 13 hodź. hač do 17 hodź. móža zajimcy swoje młode rostliny sobu přinjesć a je z tymi druhich poskićerjow měnjeć. Tež nakup za mały pjenjez je móžny.
Požohnuja motorske
Ralbicy. Wodźerjo motorskich su njedźelu, 1. meje, do Ralbic přeprošeni. Tam so w 14 hodź. nyšpor z požohnowanjom mašinow a wodźerjow započnje. Přizamknje so zhromadny wulět.
Swójbny dźeń na statoku
Wotpočnišćo nětko dospołne
Lejno. Nowe wotpočnišćo za pućowacych po wodźe maja wotnětka při Lejnjanskim jězoru. Do njeho je zaměrowy zwjazk Łužiskeje jězoriny tři miliony eurow inwestował. Hižo loni bě do twarjenja wodoškitna policija zaćahnyła. Nětko móža pućowacy tež sanitarne připrawy a kuchnju wužiwać. Přistawny mišter ma swój běrow tohorunja w domje. W susodstwje nastachu městna za bydlenske mobile a stany.
Sport a zabawa na hrajkanišću
Budyšin. Na nowym Budyskim hrajkanišću Sprjewnik w Strowotnej studni wotměje so sobotu, 30. apryla, wot 10 do 17 hodź. sportowy a zabawny swjedźeń. Na wopytowarjow čakaja najwšelakoriše sportowe aktiwity a zabawny program na jewišću. Wo ćělne derjeměće budźe postarane.
Seniorojo škotowali
Kozarcy. Štwórty lětuši škotowy turněr serbskich seniorow je předwčerawšim w Kozarcach dobył Gerat Šmeling z 2 739 dypkami před Eberhardom Kroschkom (2 453) a Manfredom Höraufom (2 276). Cyłkowne hódnoćenje nawjeduje dale Herbert Krječmar. Přichodny turněr wotměje so 31. meje w Radworskim hosćencu „Zelena hałžka“.
Přewjedu mejski swjedźeń
Radźićeljo wuradźuja
Róžant. Přichodne posedźenje gmejnskeje rady Ralbicy-Róžant wotměje so jutře, štwórtk, we 18.30 hodź. w Róžeńčanskim gmejnskim zarjadnistwje. Mjez druhim zaběraja so radźićeljo z hospodarskim planom za lěto 2022. Nimo toho steja dodatne wustawki „Konjecy – zapadny dźěl“ na dnjowym porjedźe posedźenja.
Njebjelčicy. Tohorunja jutře, ale hakle w 19.30 hodź. zetkaja so čłonojo Njebjelčanskeje gmejnskeje rady k swojemu wuradźowanju w gmejnskim zarjadnistwje. Woni rozjimaja mjez druhim Leaderowu wuwićowu strategiju za dobu wot 2023 do 2027 a wotzamknu wotnajenske zrěčenje za solarnu připrawu. Nimo toho wobjednaja Njebjelčanscy radźićeljo tež swój hospodarski plan za 2022. Na wobě posedźeni su zajimcy witani.
Fit w starobje
Piwo w srjedźišću
Wojerecy. Składnostnje dnja němskeho piwa přeprošuje Wojerowska dźěćaca a młodźinska farma jutře, srjedu, w 19 hodź. na dalše zarjadowanje w rjedźe „Zetkanišćo strowe zežiwjenje“. W srjedźišću maja regionalne piwowe speciality stać. Tobias Frenzel z Budyskeje piwoweje manufaktury poda dohlad do produkcije wšelakich družin piwa. Kuchar Ramnowskeho barokneho hrodu Axel Göber rozłoži pokiwy, kak móžež piwo w kuchni sobu wužiwać. Wobdźělenje płaći dźewjeć eurow na wosobu. Zajimcy njech přizjewja so pod telefonowym čisłom 03571/ 979 164.
B 96 nětko zawrjena
Wulke Ždźary. Znajmjeńša hač do 16. julija wostanje zwjazkowa dróha B 96 we Wulkich Ždźarach dospołnje zawrjena. Tam zwoprawdźeja prěnjej twarskej wotrězkaj wopłóčkoweje syće. Nimo toho kładźe Kamjenska EWAG nowe wodowody. Łazowska gmejna wutwari w tym zwisku busowej čakarni.
Sport za žony
