Pytaja kupca za čołm
Budyšin. Přichodne zjawne přesadźowanje wotměje so jutře, wutoru, 21. nowembra w Budyšinje wot 16.30 hodź. w delnim foyeru Budyskeje radnicy. Wot 15.30 hodź. maja zajimcy składnosć, sej namakanki wobhladać. To su mjez druhim kolesa za žony, muže a dźěći, mountainbiki, e-rolery abo rolery za dźěći a samo mały čołm. Ludźo dyrbja w awkciji zdobyte wěcy hnydom zapłaćić a móža je po předpołoženju personalneho wupokaza sobu wzać.
Nazymski koncert
Slepo. 40 lět Serbski dźěćacy ansambl Slepo a 50 lět Serbski folklorny ansambl Slepo stej přičinje za wosebite zarjadowanje. 25. nowembra, w 16 hodź. wustupitej skupinje na lětsa poslednim serbskim nazymskim koncerće w Serbskim kulturnym centrumje w Slepom. Załožba za serbski lud a Domowina rjad koncertow podpěrujetej.
Z Radworja inspirěrowane
W galeriji sej mólby zbližić
Radebeul. Měšćanska galerija w Radebeulu wotewrje jutře, pjatk, w 19.30 hodź. wustajeńcu z twórbami Anity Rempe a Maje Nageloweje. Midissaga z hudźbu budźe 8. decembra a wjedźenje po wustajeńcy 15. decembra w 16 hodź. Wustajeńca je hač do 17. decembra a dalši króć w tamnišej galeriji wot 8. do 21. januara 2024 widźeć. Wotewrjena je stajnje wutoru, srjedu a štwórtk wot 14 do 18 hodź. a njedźelu wot 13 do 17 hodź.
Pušća a staja hodowny štom
Hornja Kina. Na Nowosólskej 124 w Budyskim měšćanskim dźělu Hornja Kina maja lětsa hodowny štom, kiž ma so na Hłownym torhošću nastajić. Jutře rano we 8 hodź. chcedźa štom pušćić a potom do centruma sprjewineho města dowjezć. Dopołdnja w 11 hodź. so adwentna pycha za 640. Budyske Wencelowe wiki na Hłownym torhošću nastaji.
Předčitanski dźeń
Na mały jubilej
Njebjelčicy. Před pjeć lětami bu w Slepom Serbski sejm jako prěni demokratisce woleny parlament Serbow skonstituowany. Tónle jubilej woswjeća zajutřišim, pjatk, wot 17 hodź. w Njebjelčanskim farskim centrumje „Bjesada“. Wšitcy zapósłancy, podpěraćeljo, přećeljo, partnerojo a zajimowani hosćo su na tutón wjeršk přeprošeni. Za planowanja proša zajimcow wo to, so z mejlku na přizjewić a zdźělić, hač chcedźa přitomnym postrowne słowa posrědkować.
Druhi raz „Kino fever“
Nuknica. Towarstwo Barakka wuhotuje zajutřišim, pjatk, pod hesłom „Ničo nimo – Kino fever“ druhi filmowy wječor w Nukničanskim młodźinskim klubje, tónraz z ćežišćomaj aktiwizm a škit klimy. W 19.30 hodź startowacy program wopřijima paskaj „Rise up“ a „Bestie ze złego“ kaž tež krótkofilm „Libawka – Winterlieb“.
Pójće bubnować
Tema filma: šicofrenija
Budyšin. Budyski Kamjentny dom pokaza jutře, 15. nowembra, w 20 hodź. dansku tragikowu komediju „Rose – Njezapomnita jězba do Parisa“. Hnujacy film Nielsa Ardena Opleva je w Danskej njewočakowany wuspěch měł. Šicofrena žona jědźe z busom do Parisa, w kotrymž ze swojej wotewrjenosću tójšto wuskutkuje. We hłownej róli brilěruje Sofie Gråbøl, znata jako komisarka Lund. Zastup płaći šěsć eurow.
Premjera w kniharni
Budyšin. W swojej prěnjej, njedawno w Ludowym nakładnistwje Domowina wušłej basniskej zběrce, dawa Sylwija Šěnowa „putacy dohlad do čłowjeskeje duše. Wona znaje hłubiny w žiwjenju runje tak kaž začuće swobody a rytmus žadosćow. Wona rozestaja so z ciwilizaciju a jeje kritiskimi stronami.“ Knižna premjera wotměje so na zwučene wašnje w Smolerjec kniharni, a to štwórtk, 16. nowembra, w 19 hodź.
Přeprošuje do Berlina
Dalekubłanje za młodych
Worklecy. Worklečanske dušepastyrstwo młodźiny přeprošuje serbskich młodych dorosćenych w starobje mjez 18 a 30 lět na zhromadny kubłanski dźeń. Tón wotměje so sobotu, 6. januara 2024 w Budyšinje. Přizjewjenja přijimuja jeničce online hač do wutory, 12. decembra, pod: .
Wědomostnik Leo na wopyće
Kamjenc. „Wot laboroweje kuriozity k inowatiwnemu displayjej“ – z tutej temu zaběra so srjedu, 15. nowembra, w Kamjenskej měšćanskej bibliotece profesor za optoelektriku na Drježdźanskej Techniskej uniwersiće Karl Leo. W zarjadowanju w rjedźe „Słowa a běłe wino“ poda so ze zajimcami wot 19 hodź. na ekskursiju do fascinowaceho swěta swojeho slědźenja. Wón rozłožuje načasne techniske slědźenje a staw wuwića fleksibelnych solarnych paneelow.
Přednošk w muzeju
Zahaja karnewalowu sezonu
Spominanje při kopolaku
Hórki. Při kopolaku za Hanku Šěrcec w Hórkach spomina so dźensa na 85. róčnicu pogromoweje nocy a na přesćěhanych židow. Při Elic statoku na Chróšćanskej 17, modla so přitomni we 18 hodź. róžowc.
Přednošuje wo Pekingu
Łaz. Swoje pućowanske impresije wo Pekingu předstaji dr. John Chris Pollack z Běłeho Chołmca jutře, 10. nowembra, na žurli radnicy we Łazu. Na přednošk přeprošuje spěchowanske towarstwo Zetkanišćo Dom Zejlerja a Smolerja Łaz. Spočatk zarjadowanja pod hesłom „Peking, zakazane město“ je we 18 hodź. Zastup płaći tři eura.
Čaporowe wiki
Wětrow. W Starym Wětrowje čo. 4 wotměja tutu sobotu, 11. nowembra, čaporowe wiki. Wot 10 do 12 hodź. poskićuje tam Rosenmeyerec swójba wěcy z domjacnosće – małe meble, knihi a dalše. Štóž chce pozdźišo přińć, njech při wrotach zaklinka.
Na pjeriznu hladać
Pokazuja film „Připołdnica“
Budyšin. Kino w Budyskim Kamjentnym domje pokazuje dźensa w 20 hodź. sfilmowany roman „Připołdnica“ po knize Julije Franck. Film je subjektiwna chronika němskich stawiznow wot Weimarskeje republiki a doby nacionalsocializma hač do powójnskeho časa.
Spomnjeće na kěrchowje
Budyšin. Na Starym židowskim kěrchowje w Budyšinje wotměje so jutře w 14 hodź. spominanje na pogromowu nóc před 85 lětami. Na to přeprošujetej Smochčanski kubłanski skutk zhromadnje ze zjednoćenstwom přesćěhanych nacirežima Zwjazk antifašistow Sakska z.t. W swojej narěči budźe so Budyski měšćanosta Robert Böhmer słowa jimać. Po tym modli so Smochčanski farar Michael Kleiner kadiš. Mužojo, kotřiž so na zarjadowanju wobdźěla, njech staja sej kłobuk abo čapku.
Dary do Pólskeje
Zejicy. W Zejicach su pomocnicy minjenu sobotu we wobłuku akcije Towarstwa Cyrila a Metoda „Łužica pomha“ dary za Zwjazk Carity w Ełku w sewjernej Pólskej nakładowali. Direktor Carity tamnišeje diecezy, prelat dr. Dariusz Kruczyński, kiž wudźeržuje hižo nimale lětdźesatk styki do Łužicy je dary wotewzał. Na podlěšenym transporteru njeběše dosć ruma za wšitke pakćiki. Tuž dyrbi dalši króć awto přijěć, zo by zbytne dary wotwjezł.
Nowe wotewrjenske časy
Budyšin. Smolerjec kniharnja je wot tutoho tydźenja zaso po zwučenych časach wotewrjena. Ludowe nakładnistwo Domowina zdźěli, zo wočakuja tamniši sobudźěłaćerjo kupcow kaž tež zajimcow wot póndźele do pjatka wot 10 do 17 hodź. we wobchodźe. Do bohateho poskitka knihow LND słušeja wjacore nowostki. Mjez nimi su prěnja basniska zběrka Sylwije Šěnoweje „Mosty přez morjo“, za najmłódšich čitarjow klasiske powědančko Theodora Stroma „Mały Huzolak“ w přełožku Andreje Chěžcyneje kaž tež młodźinska antologija „Prěni raz“ za čitarjow wot dwanaće lět. W 4. nakładźe předleži kniha Trudle Malinkoweje „Ufer der Hoffnung“.
