Na jutrowne wiki
Budyšin. Spěchowanski kruh za serbsku ludowu kulturu přeprošuje jutře a njedźelu na 30. Serbske jutrowne wiki do Budyskeho Serbskeho domu. Na woběmaj dnjomaj móža wopytowarjo wot 10 do 18 hodź. debjerjam na žurli domu přihladować a sej najrjeńše jutrowne jejka kupić. Zajimcy budu so sami w debjenju jutrownych jejkow pospytać móc. Dźěći su nimo toho na paslenje a walkowanje jutrownych jejkow prošeni. Nimo debjerjow jejkow budźetej Carola Eitnerjec z keramiku a Birgit Patokowa z wudźěłkami ze škleńcy přitomnej. Runje tak so sobudźěłaćerjo Smolerjec kniharnje na kupcow w Serbskim domje wjesela. Tež wušiwarka swoje dźěło předstaji.
Na 12. schadźowanku swójbow
Sonja Krječmarjowa nawjeduje
Kozarcy. Po škotowym turněrje serbskich seniorow předwčerawšim w Kozarcach nětko Sonja Krječmarjowa cyłkowne hódnoćenje nawjeduje. To zdźěli hłowny organizatoriski nawoda Měrćin Nowak. Turněr w Kozarcach dobył je Herman Woko z 3 189 dypkami před Eberhardom Kroschkom (2 788) a Wolfgangom Kühnom (2 680). Sonja Krječmarjowa je štwórte městno wobsadźiła. Přichodny turněr wotměje so kónc měrca w Šunowje.
Wěnuja so Janej Haješej
Łaz. Na serbski wječor přeprošuje spěchowanske towarstwo Domu Zejlerja a Smolerja jutře, pjatk, we 18 hodź. do Łaza. Tam chcedźa so wěnować Łazowskemu Serbej a překupcej Janej Haješej (1873– 1960). Na jeho iniciatiwu nasta 1911 serbske towarstwo za Łaz a wokolinu. Dale je wón 1912 Domowinu sobu załožił. Wot 1921 do 1937 a wot 1945 do 1948 bě wón župan Wojerowskeje župy. Z přednoškom w němskej rěči, fotami a hudźbnym wobrubjenjom chcedźa na Haješa k jeho 150. narodninam spominać.
Radźićeljo wuradźuja
Njebjelčicy. Předstajenje studije wo energijowym koncepće za Njebjelčansku gmejnu budźe jedna z temow přichodneho posedźenja tamnišeje gmejnskeje rady. Wone wotměje so štwórtk, 2. měrca, w 19 hodź. w posedźenskej rumnosći gmejny. Dale wuradźuja mjez druhim wo wobswětlenskim koncepće za Njebjelčicy, Pěskecy, Serbske Pazlicy a Wěteńcu, kaž tež wo rumnosćach něhdyšeho Miłočanskeho předawanišća.
Yoga za kóždeho
Smjerdźaca. Wjacore kursy za yoga poskićuje Serbske šulske towarstwo w Smjerdźečanskim kubłanišću LIPA. Wone měrja so na wšitkich, kotřiž chcedźa swojemu ćěłu něšto dobreho činić, kotřiž trjebaja wjetšu koncentraciju a kotřiž pytaja za nutřkownym měrom. Kursy wotměja so stajnje pjatk dopołdnja a započnu so 17. měrca. Zajimcy njech přizjewja so hač do 8. měrca pod abo pod telefonowym čisłom 0172 7811959. Na to skupiny zestajeja a wobdźělnikam dokładny termin zdźěla.
Informuja wo jubileju
Chrósćicy. W lěće 2025 wopominaja 800. róčnicu prěnjeho pisomneho naspomnjenja Chróšćanskeje wosady kaž tež wsow Chrósćicy a Prawoćicy. Swjedźenski tydźeń je wot 13. do 22. junija 2025 předwidźany. Na informaciske zarjadowanje wo stawje přihotow a wšitkich dalšich idejow kołowokoło jubileja přeprošujetej gmejna a wosada zajimcow štwórtk, 2. měrca, we 18 hodź. na faru.
Za Dźeń Saksow so přizjewić
Budyšin. Kaž wšitke druhe zjawne zarjadowanja, dyrbješe w poslednich třoch lětach tež Dźeń Saksow wotprajić. Lětsa pak ma so najwjetši ludowy swjedźeń w Sakskej zaso wotměć, a to wot 1. do 3. septembra w Aue-Bad Schlema. Tež serbske towarstwa, kulturne skupiny a organizacije su na Dźeń Saksow přeprošene. Na stronje namakaja zajimcy wobšěrne informacije. Štóž ma prašenja, móže so na Clemensa Škodu w zarjedźe Domowiny wobroćić (tel.: 03591 550208, e-mail ).
Seniorojo zaso škotuja
Kozarcy. Přichodny škotowy turněr serbskich seniorow wotměje so wutoru, 28. februara, w Kozarčanskim hosćencu. Započatk je w 14 hodź. Na njón su tež nowačcy wutrobnje witani, kaž hłowny organizator Měrćin Nowak zdźěli. Dalši turněr přewjedu kónc měrca w Šunowskim hosćencu.
Poetiski punk na huslach
Budyšin. We wobłuku rjadu Kamjentneho domu „Koncert w foyeru“ zahudźi Paul Geigerzähler wutoru, 28. februara, w Budyšinje. Do koncerta rozmołwja so wón zjawnje ze žurnalistom Christianom Schäferom. Zarjadowanje započnje so w 20 hodź., zastup je darmotny.
Na kofej w třoch
Budyšin. „Naslědnje žiwy być něhdy a dźensa“ rěka hesło přichodneho zarjadowanja w rjedźe „Kofej w třoch“ srjedu, 1. měrca, w 15 hodź. w Budyskim Serbskim muzeju. Při kofeju a tykancu porěča sobudźěłaćerjo muzeja wo tym, kak su ludźo něhdy naslědnje žiwi byli. Zarjadowanje wotměje so prěni raz zhromadnje z Budyskej wotnožku Sakskeje centrale za přetrjebowarjow. Jeje sobudźěłaćerjo informuja wo móžnosćach naslědneho žiwjenja w dźensnišim času.
Porěči wo hrodźišćach
Powjedźe po wustajeńcy
Budyšin. Na wodźenje po archeologiskej wosebitej wustajeńcy „Smjerć a ritual“ přeprošuje Muzej Budyšin jutře, sobotu, w 11 hodź. Archeologowka Daniela Frehse posrědkuje wobdźělnikam zajimawosće wo najnowšich slědźerskich wuslědkach z předstawizniskeho pohrjebnišća pola Delnjeje Kiny. Dalšej wodźeni po wosebitej přehladce budźetej 18. měrca a 8. apryla stajnje w 11 hodź.
Serbsce po hrodźe a muzeju
Wojerecy. Składnostnje Swětoweho dnja přewodnikow hosći a Dnja maćeršćiny poskića Wojerowski hród hromadźe z tamnišim muzejom njedźelu, 26. februara w 14 hodź. wodźenje po hrodźe w serbskej rěči. Werner Sroka so wjeseli, zo smě Serbam a za serbšćinu so zajimowacym wopytowarjam serbske wodźenje po najstaršim twarjenju města poskićić. Wobdźělenje na wodźenju je darmotne. Zarjadowarjo proša wo pjenježny dar za Wojerowsku župu „Handrij Zejler“.
Na póstny seminar
Z wyšim měšćanostu rěčeć
Wojerecy. Město Wojerecy a tamniša biblioteka Brigitty Reimann pokročujetej 27. februara slěd zarjadowanjow pod hesłom „Prašej so wyšeho měšćanostu“. Tónraz njezměja krutu temu, tak zo móže kóždy swoje naležnosće přednjesć a so wo tym z Torstenom Rubanom-Zehom (SPD) rozmołwjeć. Wobdźělenje je darmotne a kóždy je přeprošeny, so wot 18 hodź. w měšćanskej bibliotece wobdźělić. Zarjadowanje wotměje so we wobłuku projekta „Wotewrjena dźěłarnička demokratije“. Z nim chcedźa wobydlerjow do procesa rozsudow wo měšćanskich naležnosćach zapřijeć.
Za wubědźowanje so přizjewić
Hózk. Za lětuše wubědźowanje Black Bird Run 3. septembra w Hózku móža so zajimcy nětko přizjewić. Kaž Hózkowske młodźinske towarstwo zdźěli, maja wobdźělnicy na dwanaće kilometrach 15 zadźěwkow přewinyć. Ličba wobdźělnikow je na 400 wobmjezowana. Startować móža zajimcy wot 18 lět. Přizjewjenja přijimuja pod blackbird.
Wóskować, škrabać a wužrawać
Budyšin. Hišće hač do 24. februara maja dorosćeni zajimcy móžnosć, swoje kolekcije za 70. wubědźowanje wo najrjeńše serbske jutrowne jejko zapodać. Wudźěłki přijimuja Spěchowanski kruh za serbsku ludowu kulturu, w Serbskej kulturnej informaciji w Budyšinje abo w „Lódce“ w Choćebuzu, w regionalnych běrowach Domowiny w Slepom, Choćebuzu, Chrósćicach a we Wojerecach kaž tež z póštu.
Spominaja na prócowarja
Spominaja na prócowarja
Hodźij. Składnostnje 100. posmjertnin něhdyšeho Hodźijskeho fararja a předsydy Maćicy Serbskeje Jana Pawoła Křižana přeprošuja Hodźijska wosada, Maćica Serbska, Serbske ewangelske towarstwo a Domizniske towarstwo w Hodźiju na wopomnjenske zarjadowanje. Wone wotměje so sobotu, 25. februara 2023, w 14 hodź. w Hodźijskim kantoraće (Při nawsy 2). Tam poskićuja tři krótkopřednoški. Wone zaběraja so ze žiwjenjom a skutkowanjom fararja Křižana (dr. Gerat Krawc, Hodźijska wosada), z fararjom Křižanom a Maćicu Serbskej (dr. Annett Brězanec, Maćica Serbska) a z burskimi statokami Křižanec swójby w Hodźijskej wosadźe w 19. lětstotku (Peter Beer, Domizniske towarstwo w Hodźiju). Přizamknje so počesćenje při rowje. Njedźelu, 26. februara, w 9.30 hodź. budu dwurěčne wopomnjenske kemše w Hodźijskej cyrkwi. Wšitcy zajimcy su wutrobnje přeprošeni.
Planuja wuprawu
Nowačkow přizjewić
Budyšin. Přizjewjenje do 5., 6., 7. a do 10. lětnika Budyskeho Serbskeho gymnazija je w tydźenju wot 27. februara hač do 3. měrca móžne. A to póndźelu, srjedu a štwórtk wot 8 do 15. 30 hodź., pjatk wot 8 do 12 hodź. a wutoru, 28. februara, wot 8 do 18 hodź. Trěbne za přizjewjenje su wupjelnjeny přizjewjenski formular, kubłanske doporučenje zakładneje šule, narodźenske wopismo, połlětna informacija, zdźělenje k zastaranskemu prawu (jeli přitrjechi) a zdźělenje k wosebitemu pedagogiskemu spěchowanju (jeli přitrjechi). Dokładniše informacije nadeńdu zajimcy pod .
Ralbicy. Přizjewjenje šulerjow do 5. lětnika Serbskeje wyšeje šule Ralbicy je wot póndźele, 27. februara, hač do pjatka, 3. měrca, póndźelu a štwórtk wot 8 do 14 hodź., wutoru wot 10 do 18 hodź., srjedu wot 8 do 12 hodź., pjatk wot 8 do 10 hodź. a po dorěčenju móžne. Informaciju nańdźeće tež na internetnej stronje .
Zhromadnje jejka debić
