W nazymskim času je husto widźiš – dźiwje husy. Po stach tworja ...
Zelenu swěcu za Wulku Dubrawu
Kumwałd (SN/at). Regionalny přewodźacy wuběrk je na swojim posedźenju wčera w Kumwałdźe dwanaće projektow z wokrjesow Budyšin a Zhorjelc za spěchowanje we wobłuku změny strukturow rozjimał. Předsydka gremija dr. Romy Reinisch je projektowym předłoham wysoku kwalitu wobkrućiła. Jednaće předewzaćam, sydom z Budyskeho a štyrjom ze Zhorjelskeho wokrjesa, su wuběrkownicy přihłosowali.
Zelenu swěcu dóstała je mjez druhim gmejna Wulka Dubrawa za inkluzijowe dźěćace dnjowe přebywanišćo „Slědźerjo na wsy“ w Chwaćicach. Swój hospodarski a zjawny cyłk chce komuna skrućić z lukratiwnymi wuměnjenjemi na městnje a ze spušćomnej a dobrej strukturu kubłanja, předewšěm za dźěći w předšulskej starobje. W zarjadnišću planuja 54 městnow, z toho 18 žłobikowych. Mjez 36 městnami za pěstowarske dźěći su tři integraciske městna. Projekt měła gmejna hač do lěta 2026 zwoprawdźić.
Schwalene buchu dale projekty z Wojerec, Kamjenca, Njedźichowa, Nadrózneje Hrabowki, Běłeje Wody, Niskeje, Radeberga, Großhennersdorfa a Jonsdorfa.
Wotpokazuja wudobywanje kopora
Gmejny Slepo, Trjebin a Dźěwin kaž tež wjesna rada Rowno wotpokazuja planowane wudobywanje kopora w regionje. Tole su w pisomnym stejnišću wozjewili.
Slepo/Trjebin/Dźěwin (AK/SN). Firma Koporowy šćěpjel Łužica tzwr (KSL) chce po planach na dohromady 45 hektarach mjez Grodkom a Slepom wot lěta 2035 do 2055 lětnje pjeć milionow tonow kopora wudobywać. Cyłkowne mnóstwo wudobywanja trochuje KSL na 100 milionow tonow kopora. Na Slepjanskim składźišću KSL tuchwilu wudobywać nochce.
Krótkopowěsće (16.11.23)
Dalše potencielne stejnišćo
Hodźij. Tež Hodźij móhł po rešeršach sćelaka MDR potencielne stejnišćo za nowu jednotku Zwjazkoweje wobory w Hornjej Łužicy być. Wjesnjanosta Gerald Meyer (njestronjan) wobkrući našemu wječornikej wotpowědne naprašowanje wójska a zo su so zastupjerjo před tydźenjemi móžny areal pola Třoch Hwězdow wobhladali. Wot toho časa w naležnosći ničo wjace słyšał njeje, Meyer rjekny.
Mjenje spokojnosć z dźěłom
Drježdźany. Němski dźěłarnistwowy zwjazk woprašuje so jónu za lěto dźěłopřijimarjow po cyłej Němskej za jich spokojnosću z dźěłom. Ličby za loni nětko předleža. Tam podachu 45 procentow wšěch dźěłacych, zo su ze swojim dźěłom spokojom. Tole je wo 10 procentow mjenje hač w cyłoněmskim přerězku.
Z bałdrijanom kóčki wabja
Policija (15.11.23)
Z psychiskimi ćežemi
Budyšin. 41lětny muž je póndźelu na wšelakich dróhach města w běhu jedneje hodźiny pasantam zeškodźał. Jednej wosobje storhny nawoči z nosa, druhej wutorhny ručnu tobołu, nimo duceho kopny. Pozdatna přičina jeho wustupowanja běše wuwzaćny psychiski staw.
Paduši bjez duše
Ćisk. Njeznaći su mjez sobotu a póndźelu dopołdnja wjacore pleńčatka z rowa na Ćiskowskim kěrchowje pokradnyli. Nan tam pochowaneje wosoby zdźěli, zo je so to hižo wospjet stało. Hódnota pokradnjenych figurow wučinja 30 eurow. Materielna škoda za njeho rozsudna njeje, za to pak ideelna, praji nan.
Na mały jubilej
Njebjelčicy. Před pjeć lětami bu w Slepom Serbski sejm jako prěni demokratisce woleny parlament Serbow skonstituowany. Tónle jubilej woswjeća zajutřišim, pjatk, wot 17 hodź. w Njebjelčanskim farskim centrumje „Bjesada“. Wšitcy zapósłancy, podpěraćeljo, přećeljo, partnerojo a zajimowani hosćo su na tutón wjeršk přeprošeni. Za planowanja proša zajimcow wo to, so z mejlku na přizjewić a zdźělić, hač chcedźa přitomnym postrowne słowa posrědkować.
Druhi raz „Kino fever“
Nuknica. Towarstwo Barakka wuhotuje zajutřišim, pjatk, pod hesłom „Ničo nimo – Kino fever“ druhi filmowy wječor w Nukničanskim młodźinskim klubje, tónraz z ćežišćomaj aktiwizm a škit klimy. W 19.30 hodź startowacy program wopřijima paskaj „Rise up“ a „Bestie ze złego“ kaž tež krótkofilm „Libawka – Winterlieb“.
Pójće bubnować
Srjedźišća na dobro gmejny
Njeswačanscy gmejnscy radźićeljo tójšto pozitiwneho zhonili
Njeswačidło (JK/SN). Po dlěšej přestawce je wjesnjanosta Gerd Schuster (CDU) posedźenje Njeswačanskeje gmejnskeje rady zaso nawjedował. Prjedy hač wón radźićelow wo najnowšich podawkach w gmejnje informowaše, dojednachu so wšitcy jednohłósnje na to, zo chcedźa za klětuše komunalne wólby, 9. junija, ze susodnej Bóšičanskej gmejnu zhromadny wólbny wuběrk wutworić. Dokelž stej gmejnje w zarjadniskim zhromadźenstwje, zda so tajki wuběrk logiski a praktiski. Nadrobnosće za wotběh wólbow so potom klětu wujednaja a postaja.
Potom slědowachu radźićeljo rozprawje wjesnjanosty wo njedawnym wopyće delegacije z čěskeho partnerskeho města Lučany nad Nisou. Hosćo z Čěskeje běchu so w Njeswačidle jara derje čuli a wuprajichu so za dalewjedźenje přećelskich poćahow. Wosebje spodobało je so hosćom park, hród, kulturne poskitki towarstwa přećelow domizny a kultury kaž tež wutrobne pohosćenje kameradow wohnjoweje wobory.
Busy nětko w Krakecach zawróćeja
Bajkojty swjedźeń wuhotowali
Ćisk (JT/SN). Serbske dźěćace towarstwo Ćisk je lětsa prěni króć swjedźeń towarstwow wuhotowało. Nicole Strauchowa, kotraž z něhdźe 20 dźěćimi tydźensce prawidłownje němske a serbske reje zwučuje, měješe hnydom ideju za ramikowe jednanje za zarjadowanje w Ćisku. Wona namjetowaše lóštne stawiznički kołowokoło serbskich mytiskich figurow předstajić. „Dźěći wšak je znaja a běchu tak kmane, program ze swójskimi idejemi sobu wuhotować“, wona praji.
Próstwu hišće lětsa zapodać
Pančicy–Kukow (SN/MG). W połnej wobsadce zetka so wčera, wutoru, zhromadźizna Zarjadniskeho zwjazka „Při Klóšterskej wodźe“ w sydarni zwjazkoweho twarjenja. Na dnjowym porjedźe mějachu radźićelki a radźićeljo diskusiju wo hospodarskim planje kaž tež spěchowanje komunalneho ćopłotneho plana, kiž dyrbja gmejny nadźěłać.
Jasne je nětko hižo, zo wudawki zarjadniskeho zwjazka klětu wo něhdźe 105 000 eurow na 1,72 milionow přiběraja. Přičiny za to su wšelake, kaž nawoda Stefan Anders rozkładźe. Najwjetša pozicija drje su zwyšenja personalnych kóštow wo 65 000 eurow. Dale změja tež klětuše wólby kaž wšelakore administratiwne nadawki wulki wliw na kóšty. Za wólby na přikład dóstanje zarjadniski zwjazk drje podźělne přiražki, tute pak njedosahaja. Za wólby zwjazkoweho sejma lěta 2021 na přikład dósta zarjadniski zwjazk jeničce 50 centow na wobydlerja. Z wyšimi kóštami zwisuje nětko wězo tež powyšenje popłatka gmejnow na zarjadniski zwjazk. Plan wobzamknyć chcedźa na přichodnym posedźenju cyłka 9. januara 2024.
