Dóńtaj čłowjekow přirunował

Praha. Z Němsko-čěskim žurnalistiskim mytom 2023 bu mjez druhim reportaža „Kak ćežko je, w cuzym kraju so zadomjeć“ žurnalista Martina Weisera, wozjewjena w časopisu „Reporter“, wu­znamjenjena. Přinošk přirunuje dóńt po Druhej swětowej wójnje wuhnateje sudetskeje Němki ze žiwjenjom ukrainskeho dźěsća ćěkancow w Němskej.

4. myto Miny Witkojc wuwołane

Podstupim. Serbska rěč a kultura stej centralnej wobstatkaj Łužiskeje identity a domizny. To chce Braniborska z Mytom Miny Witkojc wuwědomić, kotrež kóžde druhe lěto spožča. Hač do 29. februara 2024 móža komuny, towarstwa a zwjazki namjety za 4. myto Witkojc zapodać, kaž je knježerstwowy społnomócnjeny za naležnosće Serbow, statny sekretar Tobias Dünow (SPD), wčera wozjewił.

Komunalnu energetiku zmóžnić

Njezbožo z kolesom

Kulow. Srjedu nawječor je 43lětna při Budyskej w Kulowje parkowała. Jako ­durje swojeho awta wotewrě, bližeše so ­kolesowarka. 14lětna pódla awta padny a so ćežko zrani. Wěcna škoda žana njenasta. Dotal njeje jasne, hač je so kolesowarka scyła durjow dótkała. Swědkojo, kotřiž su podawk wobkedźbowali, njech zazwonja na słužbu za wobchadne nje­zboža policije pod telefoniskim čisłom 03591 3670.

Přiroda je chowancam Budyskeje Swobodneje šule Hornja Łužica a tamnišeje ­pěstowarnje přewšo wažna. Tuž su šulerjo 1. lětnika a dźěći předšulskeje skupiny njedawno cyle njewšědny dźeń měli. Dnja 8. nowembra je jich wohnjowy jandźel Gabriel rano na šulskim dworje witał. Ze samopaslenymi drjewjanymi kijemi a wosebitymi klěšćemi podachu so dźěći do wokoliny kubłanišća, zo bychu wotpadki zběrali. Z wulkej motiwaciju a wjeselom zběrachu plastikowe dźěle abo papjeru. Wotpadkowe měchi běchu spěšnje napjelnjene. Zaměr akcije běše, mjez dźěćimi wědomje za wobswět sylnić a přećiwo jeho zanjerodźenju postupować. Připołdnju nawróćichu so wšitcy do kubłanišća. Tam čakaše Gabriel z překwapjenku. Zadźiwanje a wjeselo dźěći běše přewulke, jako wón njejapcy z palacymi smólnicami žonglěrowaše. Foto: Lotti Prochaska

Worklecy (SN/MG). Wjele drje na dnjowym porjedźe Worklečanskeje gmejnskeje rady wčera, štwórtk, njesteješe. A tola běchu wuradźowanja chětro napjate. Jako wažny dźěl diskutowachu mjenujcy plany Wudworskeje firmy ET Hansky Beton. Zawod chce w přichodźe swoju produkciju rozšěrić, kaž tež wopak produkowane twory zaso wužiwać. Dalša wažna změna je rozšěrjenje produkciskeho časa wot 6 do 22 hodźin. Sobudźěłaćer Žitawskeje firmy IDU – IT & Umwelt GmbH Bert Schmiechen, kotryž je proces přewodźał, je přitomnym dotalny staw předstaji. Tak měł zawod na zakładźe posudkow někotrežkuli naprawy wobkedźbować, zo njebychu bliskich wobydlerjow wsy přejara mylili. Po chětro raznych diskusijach radźićeljo naposledk ze snadnej wjetšinu přihłosowachu. Jako dalši wažny dypk wozjewi wjesnjanosta Clemes Poldrack (njestronjan), zo buchu spěchowanske srědki za přetwar wyšeje šule přilubjene. Wot planowaneho cyłkowneho wolumena 3,15 milionow eurow, maja so 60 procentow spěchować.