Fotograf Erich Schutt zemrěł

Choćebuz. Znaty delnjołužiski fotograf a wobrazowy chronist Erich Schutt je minjenu njedźelu, 19. nowembra, 92lětny w Choćebuzu zemrěł. We Wětošowje narodźeny je hač do 1994 za nowinu Lausitzer Rundschau dźěłał. Jeho fota wobohaćichu tež Nowy Casnik, Nowu dobu, Serbske Nowiny, Rozhlad a dalše edicije Ludoweho nakładnistwa Domowina.

Wučerjej z Bórkowow mytowanaj

Berlin. Mjez dźensa z „Mytom za ciwilnu kuražu – přećiwo prawicarskemu radikalizmej, antisemitizmej a rasizmej“ w Berlinje počesćenymi, staj tež něhdyšej wučerjej na Bórkowskej šuli Laura Nickel a Max Teske. Myto je ze 4 000 eurami dotěrowane. Wučerjej běštaj z anonymnym listom zjawnosć na prawicarske podawki na swojej šuli skedźbniłoj.

Z kardinalom so zetkali

Lubi čitarjo,

z nowym rjadom přinoškow chcemy wam měsačnje poručić, što móžeće w zahrodce abo w rostlinarni zdokonjeć. Přejemy wam wjeselo při dźěle a radosć při wobkedźbowanju toho, štož pod wašimaj rukomaj rosće.

Přiroda hotuje so na zymu a nocy ze zmjerzkom. Tola nětko je hišće prawy čas za wusyw koruškoweje zeleniny (Wur­zelgemüse), kotruž móžemy zdźěla hižo w zažnym nalěću žnjeć. Ale započinamy ze zeleninu, kiž hodźi so nětko žnjeć, kotraž móže pak tež hišće w zemi wostać. Štóž na přikład čerwjenu rěpu, pastynak abo zatkańcu (Schwarzwurzel) plahuje a nima njewitaneho hosća kaž swišća (Wühlmaus), tón móže zeleninu hač k prěnjemu krutemu zmjerzkej w zemi wostajić. Štóž pak wě, zo njeje w zahrodce sam, měł zeleninu po dozrawjenju hnydom ze zemje wzać (njewobškodźenu a zelo wotwjertnyć, nic wotkrać) a w pěsku skła­dować. Pěsk měł za morcheje, selerij, ­čerwjenu rěpu, chrěn, pastynak abo zymsku rjetkej (Winterrettich) włóžny być. Dyrbjeli włóžnotu pěska tuž za składowanje prawidłownje kontrolować.

Wěrowanja w swjedźenskej drasće wosrjedź wjesołeje towaršnosće

Slepo (AK/SN) W Slepjanskej wosadźe so dopomnjenki na serbske kwasy wobchowaja. Wo tym swědči kniha „CernoBěłe. Serbske swaŕby w Slepjańskej wósadźe 1902–1954“, kotruž je Zhorjelska Domowinska župa „Jakub Lorenc-Zalěski“ wudała. „Dotalna rezonanca je přewšo dobra. Dóstawamy dodatne pokiwy wo kwasach a wosobach“, rozjasni sobudźěłaćerka Slepjanskeho Serbskeho kulturneho centruma Stephanie Bierholdtec, kotraž je zhromadnje z Heidemarju Richter a Wolfgangom Kotissekom redakciju za knihu měła. Lektorat je Marek Krawc podpěrał a wo přełožki je so dr. Hync Rychtaŕ starał. Wón je zapřijeća, na přikład mjena instrumentow, dźěle drasty a tradicionalne jědźe do slepjanšćiny přełožił. Załožba „Doma w Slepom, Rownom, Mułkecach“ je financowanje knihi spěchowała. Nakład wučinja 300 eksemplarow, kotrež su nimale wupředate.

Zakazane praskotaki nadešli

Wjelećin. Zastojnicy policajskeho rewěra Budyšin su zašłu sobotu popołdnju wosobowe awto při Awgusta Bebelowej dróze we Wjelećinje přepruwowali. Při tym policisća zwěsćichu, zo bě wodźer awta praskotaki w swojim wozydle měł. Te pak njeběchu něhdźe dopušćene. To woznamjenja přeńdźenje přećiwo zakonjej wo rozbuchlinach. Policisća mužej praskotaki wzachu a je wěsće chowachu. Kriminalna słužba chce 36lětneho Němca nastupajo wumjetowanja njedowoleneho skutka dla słyšeć. Wotpowědne pismo bu jemu posrědkowane.