Budyšin (SN). Twarskich dźěłow na awtodróze A 4 kołowokoło Budyšina a Porchowa dla dyrbja jězdźerjo wot dźensnišeho ze zaraćenjemi ličić. Twarski zawod chce wot srjedź apryla hač do kónca oktobra 2023 jězdnje A 4 po dwěmaj wotrězkomaj ponowić. Pódla jězdnje chcedźa při tym tež wotwódnjenski system, wěstotne wuhotowanje kaž tež markěrowanja a wobchadne znamjenja wobnowić. Prěni, 4,3 kilometry dołhi wotrězk leži mjez najězdomaj Porchow a Mohorn (Ohorn). Druhi, 4,5 kilometrow dołhi wotrězk je mjez najězdomaj Budyšin-zapad a Budyšin-wuchod.

Najězd Budyšin-zapad na A4 do směra na Drježdźany je wot dźensnišeho hač do 27. jutrownika zawrjeny. Wot 9. róžownika potom budźe najězd Budyšin-wuchod do směra na Drježdźany zawrjeny. Wot 11. róžownika budźe tónle najězd tež do Zhorjelskeho směra dospołnje zaraćeny. Jako wobjězdka je za wobaj padaj susodny najězd zarjadowany.

Jutře budźe tunl pod Limas do směra na Drježdźany cyły dźeń zawrjeny. Po tym steji do wobeju směrow A 4 dźěłow dla jenož jedna jězdnja k dispoziciji.

Dana Němcová zemrěła

Praha. Čěska wojowarka za wobydlerske prawa a prjedawša disidentka Dana Němcová je 89lětna zemrěła. Wo tym je Załožba Olgi Havloveje wčera w Praze informowała, kotrejež zarjadnisku radu běše njeboćička dołhi čas nawjedowała. Němcová bě podpisarka a nachwilnje tež rěčnica hibanja Charty 77, kotrež bě so za dodźerženje čłowjeskich prawow w by­w­šej socialistiskej Čěskosłowakskej za­sadźiło.

Kritizuja „Poslednju generaciju“

Berlin. Zjednoćenstwo Fridays for future kritizuje nětko wotewrjene aktiwistow tak mjenowaneje „Poslednjeje generacije“. Nowinska rěčnica zdźěli: „Klimowa kriza trjeba cyłotowaršnostne rozrisanja a te namakamy jenož zhromadnje a nic w tym, zo ludźi we wšědnym dnju přećiwo sebi rozzłobimy.“ Přičina wote­wrjeneje kritiki běchu akcije „Poslednjeje generacije“ k jutram w Hamburgu.

Dwanata sezona z čołmom

Wjele škody nastało

Komorow. Policija njeje jutrowničku jenož křižerske procesiony přewodźała, ale měješe tež hewak dosć dźěła. Tak wo­łachu zastojnikow krótko po 13 hodź. k wobchadnemu njezbožu do Komorowa pola Rakec. Tam 71lětna wodźerka Peugeota pytnyła njeje, zo dyrbjachu před njej jěduce awta zastać. Tak zrazy rentnarka wotzady do wosoboweho awta typa Nissan, w kotrymž sedźeše 33lětna žona. Jeje jězdźidło bu na to do VWja 45lětneho muža storčene. Na zbožo so při zražce nichtó zranił njeje. Cyłkownu wěcnu škodu pak trochuje policija na něhdźe 20 000 eurow.

Pěskecy. Mjez dnjom lěsa (21. měrca) a dnjom štoma (25. apryla) wotměwaja so w rewěrach hornjołužiskeho lěsnistwoweho wobwoda wjacore informaciske zarjadowanja za wobsedźerjow lěsa a za dalšich zajimcow. W formje małych ekskursijow wobjednawaja při tym aktualne temy kołowokoło lěsa. Tajka ekskursija budźe tež sobotu, 15. apryla, wot 9 do 11 hodź. Zajimcy zetkaja so na ­parkowanišću mjez Pěskecami a Ró­žantom. Přizjewjenja přijimuja hač do 14. apryla pod telefonowym čisłom 0174 3055901 abo pod . Wobdźělnicy njech njezabudu na wotpowědnu drastu a krute črije.

Bohaty wopyt

Njeswačidło (ML/SN). 105 dorosćenych a 50 dźěći wopyta krótko do jutrow w Njeswačanskim domizniskim muzeju w běhu třoch hodźin po wotewrjenju wustajeńcu „Woheń, para a ćopły powětr“. Předewšěm dźěći wobdźiwachu wšelake modele parnicow a hrajkow, kotrež běštaj Ronny Kutschke ze Šešowa a Matthias Stein z Budyšina za přehladku přewostajiłoj. Wustajeńca je njedźelu a swjate dny popołdnju hač do 2. julija wotewrjena.