Wulki hołk a tołk knježeše minjenu njedźelu na burskich wikach w ...
Dźe wo stawizny korjeninow
Před Choćebuskim šulskim zarjadom su wčera šulerjo, starši a ...
Wjace zhromadnosće je jej wažne
Jako nowa měšćanska radźićelka bu Utta Winzer z Wobydlerskeho zwjazkarstwa Budyšin na njedawnym posedźenju měšćanskeje rady sprjewineho města spřisahana. Wona naslěduje Stephana Jurosa, kiž je mandat z powołanskich přičin złožił. Utta Winzer běše so hižo před pjeć lětami před měšćanskej radu jara doraznje za wobchowanje měšćanskeje hale „Króna“ wuprajiła. Mjeztym je so jeje wizija zwoprawdźiła. W minjenych měsacach wotměchu so tam zarjadowanja najwšelakorišeho razu. Móžeš rjec, zo je „Króna“ zaso kulturne srjedźišćo města. Utta Winzer a jeje podpěraćeljo ze spěchowanskeho towarstwa, kotrež bě wona załožiła, mějachu k tomu wšelake ćeže přewinyć. Jej so samo poradźi přewšo wobkedźbowanu němskorěčnu knihu „Chronik der Krone“ wudać.
W swojim skutkowanju jako měšćanska radźićelka chce so Winzer angažować za wjace zhromadnosće město jednoho přećiwo druhemu. Nimo toho nochce žanoho dočasneho zasudźenja dopušćić.
Turistiske ideje z dźěłarnički skonkretizowali
Wulka Dubrawa (SN/MiP). Gmejnski zwjazk Radwor-Wulka Dubrawa-Malešecy a „FUTOUR tzwr“ stej wčera wječor druhi raz na wosebite wobydlerske zarjadowanje přeprosyłoj. Něhdźe 40 zajimcow běše do Wulkodubrawskeje Swobodneje wyšeje šule přichwatało, zo by so wo namjeće kónčneho koncepta za zhromadne turistiske wuwiće w gmejnach informowało. Tež wšitcy třo wjesnjanosća běchu přitomni: Madeleine Rynčowa z Radworja, Hardy Glausch z Wulkeje Dubrawy a Matthias Seidel z Malešec.
Krótkopowěsće (10.05.23)
Na festiwalu spěwała
Halle. Delnjoserbska spěwarka Lena Hauptmannojc je wčera wječor na 18. festiwalu Woman in Jazz w Halle nad Solawu wustupiła a tež wjacore delnjoserbske spěwy zanjesła. Studowana jazz- a pop-spěwarka je loni na samsnym festiwalu loni dobyła 2. myto publikuma mjez 22 wobdźělnikami z cyłeje Europy a z tym składnosć tam lětsa koncertować.
Seminar MENS klětu we Łužicy
Budyšin. Serbske młodźinske towarstwo Pawk wuhotuje klětuši jutrowny seminar MENS, Młodźiny europskich narodnych skupin. To su sobustawske organizacije na swojej wurjadnej hłownej zhromadźiznje kónc tydźenja jednohłósnje wobzamknyli. Tak witaja młodźi Serbja na 60 młodostnych z cyłeje Europy do sprjewineho města. Nimo dźěłarničkow k mjeńšinowym temam je tež mały wulět po Łužicy předwidźany.
Kniha pohonja kreatiwni być
Přednošuje wo jubilejnej wsy
Lejno. W lěće 1423, potajkim před 600 lětami, bu wjes Lejno prěni raz pisomnje naspomnjena. Tutomu jubilejej wěnuje Benedikt Cyž swój přednošk, kotryž změje wón srjedu, 10. meje, w 19 hodź. w Lejnjanskim hosćencu „K lipje“. Na njón su wšitcy wobydlerjo cyle wutrobnje přeprošeni.
Darmotnje do stolicy
Budyšin. Wot 1. do 2. junija wobsteji móžnosć z busom wot Budyšina do Berlina jěć. Wobdźělnicy wopytaja mjez druhim Němski zwjazkowy sejm, zwjazkowe ministerstwo za dźěło a socialne kaž tež Humboldtowy forum. Nimo toho je planowana kołojězba po měsće. Na jězbu přeprošuje zapósłanča zwjazkoweho sejma Kathrin Michel (SPD), kotraž so z wobdźělnikami jězby k rozmołwje zetka. Wudawki za jězbu, přenocowanje, snědań a dwójce za wobjed kaž tež wšitke zastupy žane njenastanu. Přizjewjenja přijimuja hač do 11. meje pod telefonowym čisłom 03591 2744690.
Dźěći a młodostni rejwali
Bydlenja saněruja po naprašowanju zajimcow
Wobsedźerka wobstatka něhdyšeje Rakečanskeje bydlenjotwarskeje towaršnosće móžeše loni nahladnu ličbu bydlenjow znowa přenajeć. Při tym je jej wosebite wuwiće pomhało.
Rakecy (UM/SN). Firmowe stawizny Rakečanskeje bydlenjotwarskeje towaršnosć su skónčene. Rakečanska gmejnska rada je hižo kónc 2022 likwidaciju komunalneho předewzaća wobzamknyła. „To bě formalny akt, wšako smy 2020 cyłkowny wobstatk bydlenjow předali“, rozłoži wjesnjanosta Swen Nowotny (CDU). Po tym njeje hižo žane zamóženje wobstało, towaršnosć bě jenož hišće wonkowny konstrukt. Wěrićeljo mějachu składnosć swoje žadanja přizjewić, wjesnjanosta předchadźacy proces wuswětla.
Policija (09.05.23)
Podhladnych za hranicu lepili
Krušwica. Do metal předźěłaceje firmy chcychu so njeznaći předwčerawšim w Krušwicy zadobyć. Při tym jich sobudźěłaćer myleše a policiju zazwoni. Podhladni z awtom do Pólskeje ćěkachu. Na tamnym boku hranicy so němskim zastojnikam poradźi, skućićelow dosahnyć. Jednaše so wo muži w starobje 26 a 47 lět kaž tež wo 36lětnu žonu. Wšitcy třo běchu pólscy staćenjo. Kaž pólscy policisća při dalšim přepytowanju zwěsćichu, předležeše přećiwo 26lětnemu skućićelej přikaz zajeća. Jeho dowjezechu do jastwa. W Němskej změja so lepjeni pospytneho zadobywanja dla zamołwić.
