Hižo po nowym terminje so měć
Budyšin (SN). 69 próstwow wo spěchowanje z wolumenom 299 000 eurow za projekty w druhim połlěće 2023 Załožbje za serbski lud předleži. Wo tym je załožbowy zarjad dźensa informował, po tym zo je so doba za jich zapodaće kónc měrca skónčiła. W meji chce fachowa přirada zhromadnje ze sobudźěłaćerjemi załožboweho zarjada wo móžnym spěchowanju wuradźować.
Nawjazujo na nowy zarjadniski wukaz sakskeho financneho ministerstwa, po kotrymž maja próstwarjo wulki dźěl projektowych kóštow předfinancować, dźěła załožbowy zarjad tuchwilu na tym, wuwzaćne rjadowanje wupłaćenja do spěchowanskeje směrnicy zapřijeć. Přiměrjenu spěchowansku směrnicu chce załožbowa rada na swojim mejskim posedźenju schwalić. Załožbowa rada ma tam runje tak směrnicu spěchowanskeho programa „Serbska rěč a kultura w strukturnej změnje“ za projekty w Sakskej přiměrić a posledni termin zapodaća próstwow na 31. julij změnić. Projektowi nošerjo měli so tohodla ze zapodaćom próstwow wo strukturne srědki Sakskeje hižo na nowym terminje orientować.
Krótkopowěsće (05.04.23)
Milan Hrabal swoje basnje čitał
Drježdźany. Basnik Milan Hrabal z Varnsdorfa bě hósć čitanskeho rjadu „Literarne alfabety“ wčera w Drježdźanskim Měšćanskim muzeju. Wón přednjese před něhdźe 40 připosłucharjemi, mjez nimi wjacori Serbja, mnohe swoje basnje. Basnikaj Patrick Beck a Benedikt Dyrlich je němsce a zdźěla tež serbsce recitowaštaj. W zasadnje dwurěčnej – serbsce a němsce – bjesadźe po čitanju so Hrabal wo swojim tworjenju wupraji.
Z awdijoturu po Bórkowach
Bórkowy. Z „Awdijoturu Bórkowski duch časa“ móža sej hosćo błótowsku wjes wotkrywać. „Na pjeć wšelakich stacijach budźe šmóratko z powědarjom stawizničkow – bjezpłatne a w kóždym času“, rozprawja Jessica Ziebe, nawodnica wěcneho wobłuka turizm w hamće Bórkowy/Błóta. Woni zanurja so do swěta bajow a tradicijow, do stawiznow regiona z jeho wosebitosćemi.
Čěski prezident zaso w senaće
Policija (04.04.23)
Z awtom ćěkał
Wojerecy. Na zwjazkowej dróze B 97 chcyše policija předwčerawšim wječor BMW, kiž bě z Njedźichowa do Wojerec po puću, kontrolować. Šofer pak wotpowědne signale ignorowaše. Wón stupi na płun a zastojnicy smalachu za nim. We Wojerowskim starym měsće woni jeho najprjedy z wočow zhubichu, pozdźišo pak prózdne awto na Drježdźanskej dróze namakachu. Bórze na to lepichu zastojnicy tež šofera, kiž bě so za žiwym płotom schował. Kaž so wukopa, měješe wón wšu přičinu, před policistami ćěkać. 36lětny bě konop a kokain brał. Nimo toho namakachu pola njeho wjetše mnóstwo wopojnych srědkow, wjacore šmóratka a plastowe titki z drogami. Namakane wěcy policisća runje tak sćazachu kaž BMW. 36lětny změje so nětko hnydom wjacorych deliktow dla zamołwić, mjez druhim ilegalneho awtoweho wubědźowanja dla.
Hotuja so na jubilej
Chrósćicy. Wosada swjateju japoštołow Symana a Judy a Chróšćanska gmejna přeprošujetej na zahajenje countdowna składnostnje 800. róčnicy prěnjeho naspomnjenja wsow Chrósćic a Prawoćic jutře, srjedu, w 10 hodź. na farski dwór. Z małym programom pěstowarskich a šulskich dźěći chcedźa tam 800 dnjow trajacy countdown hač k swjedźenskemu tydźenjej w lěće 2025 zahajić. Wšitcy zajimcy su wutrobnje witani.
Za campus so přizjewić
Radwor. Staršiska iniciatiwa Radwor wuhotuje po jutrach jutrowny campus w rumnosćach za hosćencom „Meja“. 11. a 12. apryla steji grafikowe wobdźěłanje za grawury z laserom za dźěći wot dwanaće lět na programje. Nawod dweju skupinow změje dr. Andrej Měrćink. 13. apryla posrědkuja zakłady šića, a pod nawodom Diany Mejnoweje šija prěnje wudźěłki. 14. apryla móža sej zajimcy pod jeje nawodom stejak za knihu abo šmóratko šić. Dalše informacije podawa a přizjewjenja přijimuje Diana Mejnowa pod telefonowym čisłom 035935 219862.
Poskićuja dalekubłanje
Zachowuja kulturne tradicije
W Nowej Łuce wiki serbskich jutrownych jejkow wotměli
Nowa Łuka (JoS/SN). Na 30. srjedźołužiske wiki jutrownych jejkow su minjeny kónc tydźenja do Noweje Łuki přeprosyli. Čłonojo Towarstwa k hajenju regionalneje kultury srjedźneje Łužicy pak njeběchu sej ani wěsći, hač ličba scyła trjechi, přetož korony dla su wiki jónu wupadnyli a jónu wotměchu so wone w mjeńšej formje. Na kóždy pad su to najstarše tajke wiki regiona, wobkrući superintendent na wuměnku Friedhart Vogel, kiž bě towarstwo 1992 sobu załožił. Wulku ličbu wopytowarjow dokładna ličba najskerje scyła njezajimowaše. Woni so wjeselachu, zo móžachu sej někotrežkuli wuměłsce debjene jejko kupić.
Ćěło so wučisći
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (17).
W měšćanskim lěsu štomiki sadźeli
Jawornik (CS/SN). Najebać njepřijomne wjedro a přemokane lěsne puće je so minjenu sobotu něhdźe 80 Budyšanow, mjez nimi mnozy měšćanscy radźićeljo, na 26. dnju měšćanskeho lěsa wobdźěliło. Woni zetkachu so na parkowanišću mjez Jawornikom (Jauernick) a Dažinkom (Kleindehsa). Tam jich financny měšćanosta dr. Robert Böhmer witaše a jich tež hnydom z aprylskim žortom překwapi. Wón mjenujcy rjekny, zo měli nětko k tamnemu kóncej měšćanskeho lěsa, na Lubin (Dromberg) pućować, štož by 17 kilometrow daloko było. Na kóncu trjebachu wobdźělnicy dohromady jenož dobre tři kilometry nóžkować. Po puću dóstachu zajimawe dohlady do aktualneho połoženja měšćanskeho lěsa.
Na městnje dožiwichu, kak tak mjenowany harvester dźěła. Jón demonstrowaše firma Braniborski lěsny serwis, kotraž wot lěta 2019 tež w Budyšinje a wokolinje skutkuje. Mnozy chcychu widźeć, kak šofer tajku mašinu posłužuje. Z njej hodźi so wulke mnóstwo drjewa w krótkim času žnjeć. To je runje potom wažne, hdyž dyrbi drjewo skórnika dla spěšnje z lěsa. Zajimcy sobotu tohorunja dožiwichu, zo harvester w lěsu hłuboke slědy zawostaja.
Nimale 50 młódšich a staršich wobydlerjow Miłoćic je minjenu ...
Wědu wo Serbach zbližiła
Krótkopowěsće (04.04.23)
Syričan wjesnjanosta
Ostelsheim. W šwabskim Ostelsheimje su wobydlerjo 29lětneho Ryyana Alshebla za hłowu swojeje gmejny wuzwolili. 2015 dyrbješe wón ze Syriskeje ćeknyć, nětko doby wón wólby ze 55,41 procentami wšěch wotedatych hłosow. Z tym zamó so wón přećiwo dwěmaj kandidatomaj přesadźić. Po swojim dobyću žněješe přewšo pozitiwny wothłós, ale tež někotre njelubozne komentary.
CDU podpěra hatarjow
Drježdźany. CDU w sakskim krajnym sejmje chce hatarjow w swobodnym staće bóle podpěrać. Hižo lěta bědźa so woni z přirodnymi njepřećelemi kaž bobrami abo wudrami, kiž wulku škodu načinja. Wčera je strona pozicisku papjeru předstajiła, w kotrejž su naprawy wopisane, kak móhli družiny zwěrjatow škitać.
Woheń na Vlčej horje
