Hdyž zwěrjenc wotuća
Wojerecy. Njewšědny dohlad za kulisy Wojerowskeho zwěrjenca dóstanu zajimcy njedźelu, 23. apryla, we 8 hodź. Při wosebitym wodźenju pod hesłom „Hdyž zwěrjenc wotuća“ móža so wopytowarjo w zažnej hodźinje na wosebite wašnje po šěsć hektarow wulkim arealu rozhladować. Silke Kühn přeradźi, što so w zwěrjencu normalnje stawa, prjedy hač prěni wopytowarjo přińdu, kotre zwěrjata jako prěnje picu dóstanu a kotre z nich start do noweho dnja prawidłownje zaspja.
Seniorojo škotuja
Radwor. Přichodny škotowy turněr serbskich seniorow wotměje so wutoru, 25. apryla, w Radworskim hosćencu Meja. Kaž hłowny organizator Měrćin Nowak zdźěli, su nowačkojo stajnje witani. Započatk budźe w 14 hodź. Dalše zetkanje serbskich kartyplacarjow budźe kónc meje w „Karstenowej piwowej stwičce“ w Pančicach-Kukowje.
Z kolesom putnikować
Policija (21.04.23)
Awto policije znjezbožiło
Budyšin. Wobchadne njezbožo, na kotrymž bě policajske awto wobdźělene, je so předwčerawšim w Budyšinje stało. Na Stieberowej chcyše šofer Škody nalěwo na Liebknechtowu wotbočić, dyrbješe pak napřećiwneho wobchada dla čakać. Jako bě to móžno šofer nalěwo wotboči. To pak wodźer policajskeho awta po wšěm zdaću wobkedźbował njeje, tak zo wobě jězdźidle do so zrazyštej. Při tym nasta něhdźe 4 000 eurow škody. Njezbožo wobdźěłali su policisća z přiwołaneho policajskeho awta.
Hospodarski plan schwalili
Zakłady za přichodne wulke předewzaće Worklečanskeje gmejny połožili
Worklecy (JK/SN). Sobu jako jedna z prěnich gmejnskich radow zarjadniskeho zwjazka „Při Klóšterskej wodźe“ je Worklečanska na swojim wčerawšim posedźenju wobzamknyła wustawki za lětuši hospodarski plan. Wjesnjanosta Clemens Poldrack (njestronjan) wupraji radźićelam za konstruktiwne dźěło w přihotach wulki dźak, wšako je to prěni hospodarski plan w jeho zastojnstwje. Tež hdyž runje pozitiwny wuslědk njepokaza, móže so gmejna wusměrić na planowane winowatostne nadawki. Tež wšitke trěbne dźěła w gmejnje hodźa so zmištrować. Tučasnje dobry staw likwidnych srědkow kaž tež přidatne dochody pola přemysłoweho dawka, kotrež dóstachu na přikład wot Pěskečanskeje firmy Ziegler, zaručeja, zo móže gmejna snano klětu zahajić konkretne kroki za přetwar Worklečanskeje zakładneje a srjedźneje šule. Komornica Michaela Markowa hišće raz bytostne pozicije plana předstaji a wopodstatni wuslědk na kóncu lěta, wobkrućejo jón z tuchwilu dobrym stawom financnych srědkow gmejny.
Srědki za „Kopřiwu“ zběraja sami
Radwor (SN/MkWj). Njewšědny komunalny projekt předstajili su na posedźenju gmejnskeje rady předwčerawšim, srjedu, w Radworju. Tam mějachu ponowjenje wjesneho zetkawanišća „Kopřiwa“ w Boranecach na dnjowym porjedźe. Jedna so wo bywšu garažu za pryskawy wohnjoweje wobory, kaž ju na wsach tu a tam hišće nadeńdźeš. Wutwar zetkawanišća běchu w zwisku z projektom „Witalne wjesne srjedźišća“ namjetowali a nadźijeja so wotpowědnych spěchowanskich srědkow. Trěbny swójski podźěl pak nochcedźa z gmejnskich srědkow brać, ale jeničce z pjenježnymi darami zwoprawdźić. W gmejnje zasydlene předewzaća su zwólniwe, trěbne srědki znosyć. Tež wobydlerjo chcedźa k poradźenju projekta přinošować, gmejnski zarjad zdźěli. „Tajke něšto w Radworju hišće njemějachmy“, zastupowacy wjesnjanosta Pětr Kliman rjekny, kiž srjedowne posedźenje nawjedowaše, zastupujo wjesnjanostku Madeleine Rentsch. Hladajo na cyłkownu twarsku sumu 45 000 eurow to rěka, zo maja Borančenjo za swoju „Kopřiwu“ dobrych 11 000 eurow zezběrać.
Zahroda zaso přeprošuje
Pančicy-Kukow (SN/MWj). Zahroda zežiwjenskeho a zeloweho centruma Křesćansko-socialneho kubłanskeho skutka (CSB) w klóštrje Marijinej hwězdźe w Pančicach-Kukowje zahaji swoju sezonu njedźelu, 23. apryla, wot 14 hodź. Wo kulturny program postara so Worklečanska kapała „5 an der Feier“ a wuměłča Feelina ze swojimi zakuzłacymi móžnosćemi sobu činjenja.
Kaž w nowinskim zdźělenju CSB dale rěka, čakaja na hosći zahrodowe a nalětnje wiki z mnohimi regionalnymi a kulinariskimi poskitkami. Tež klóšterski wobchod budźe tón dźeń popołdnju wočinjeny. Po zwučenym wašnju sadźa k zahajenju sezony štom lěta w susodnym Lipju. 2023 je to brěza. Sadźeć budźetaj ju abatisa klóštra Gabriela Hesse a jednaćel CSB Peter Neunert.
Dny łužiskeje jězoriny přeprošuja jutře a njedźelu k wodźenjam ...
Čaporowe wiki na nowym městnje
Krótkopowěsće (21.04.23)
Myto za Slepjansku wosadu
Radebeul. Slepjanska wosada je dóstała „Sakske myto za přichod“. Hižo srjedu přepoda so w Radebeulu wot sakskeho ministra za wobswět, Wolframa Günthera, pjenježne myto we wysokosći 5 000 eurow. Přičina počesćenja je wuběrny angažement Slepjanskeje wosady. Tak su cisterny za dešćowu wodu natwarili a tež solarna naprawa na třěše fary je nastała.
Rokotak z druhim albumom
Budyšin. „Hornjołužiski indie-spěwytwórc“ Rokotak, kaž so Milan Grojlich sam mjenuje, wozjewi dźensa swój druhi album „Punkt und Komma“. Produkcija je online na znatych platformach přistupna kaž tež jako CD na předań a wopřijima dohromady dwanaće spěwow. Stilistisce „nawjaza nowostka konsekwentnje na před lětomaj wušły debit ‚Riech an Blumen‘, chabłacy mjez žanromaj šanson a americana“.
Sylna marka Němskeje z Budyšina
