Dalša wotwisnosć
Carsharing w Budyšinje zmóžnić
Najbóle diskutowana tema na wčerawšim posedźenju Budyskeje měšćanskeje rady běše zhromadny namjet SPD, Zelenych a Lěwicy, nowe městna za carsharing w Budyšinje zarjadować.
Budyšin (CS/SN). Budyska měšćanska rada je wčera na swojim posedźenju wyšeho měšćanostu Karstena Vogta społnomócniła, so wo zarjadowanje třoch carsharingowych městnow w Budyšinje postarać. Wotpowědnu próstwu za to běchu frakcije SPD, Zelenych a Lěwicy loni w decembrje předpołožili. Astrid Riechmann (SPD) argumentowaše za namjet a praji: „Je to wažny poskitk za swójby, kotrež sej swójske awto dowolić njemóža.“ Nimo toho je tež wažny za kóždeho, kotryž je mjenje hač 10 000 kilometrow wob lěto po puću. „Carsharing přisporja atraktiwiće města,“ wona wuzběhny a doda: „Wězo dyrbimy na to dźiwać, zo wuzwolena firma awta za přihódne płaćizny poskićuje.“ Zastupjer porjadoweho zarjada Matthias Almert praji: „Prawniske wuměnjenja za to mamy. Wobsteji-li zajim našich wobydlerjow, sym za to. Hladajo na kóšty su nam priwatne parkowanske městna z orientaciju a mamy tuž 200 eurow na lěto za přiměrjene.“
Krótkopowěsće (30.03.23)
Nowa społnomócnjena
Zhorjelc. Kati Struckowa je nowa hłownohamtska społnomócnjena za serbske naležnosće Zhorjelskeho wokrjesa. Wokrjesny sejmik je jej zastojnstwo na swojim posedźenju wčera dowěrił. Wuzwolena dźěła dotal jako projektowa managerka Domowiny za Slepjanski region. Kaž radźićelam wčera připowědźi, chce wona serbsku rěč we wokrjesu skrućić.
Mjezynarodnej přinoškaj SI
Praha/Lwiw. Wědomostnikaj Serbskeho instituta wobdźělitaj so na slědźenskimaj konferencomaj w Ukrainje resp. Čěskej. Dźensa je dr. Fabian Kaulfürst na zarjadowanju Instituta za slawistiku Lwiskeje uniwersity digitalny němsko-delnjoserbski słownik předstajił. Dr. Friedrich Pollack přednošuje jutře w Praskim Masarykowym instituće wo „institucionalizowanju serbskeho stawiznopisa w Němskej demokratiskej republice“.
Dwělomny křiž skóncowali
Znjezbožene lětadło atrakcija
Nowa sezona w Małowjelkowskim prazwěrjencu zahajena
Mały Wjelkow (CS/SN). Z nowymi atrakcijemi je Małowjelkowski prazwěrjenc spočatk tydźenja do noweje sezony startował. Ličba prazwěrjatow je so powjetšiła. Wot nazymy móžachu wopytowarjo wobkedźbować, kak dinosawrier na tradicionalne wašnje ze železa a betona nastawa. Nětko je metriacanthosaurus hotowy a wita ludźi ze šěroko rozdajenej klamu. Po skutkowanju Franca Grußa bě plastikar Thomas Stern dołhi čas prazwěrjata z kumštneje maćizny zhotowjał.
Na kreatiwne popołdnjo
Kulow. Dekoraciju z hliny zhotowić a připódla so w serbšćinje wukmanić móža zajimcy štwórtk, 30. měrca, w Kulowskim Jakubecowym wustawje. Wot 15 do 16.30 hodź. su tam wopytowarjo na serbske kreatiwne popołdnjo z Mariju Šołćic přeprošeni. Je to zarjadowanje Domowiny z towarstwom Zhromadnje za Kulow. Wobdźělenje płaći štyri eurow.
Při pomniku rjedźa
Pančicy-Kukow. Čłonojo Domowinskeje skupiny Pančicy-Kukow njech njezabudu na rjedźenje při pomniku Ćišinskeho w Lipju jutře, štwórtk, w 17 hodź. Wotpowědny grat njech sej prošu kóždy sam sobu přinjese.
Policija (29.03.23)
Pódla gratownje so paliło
Wojerecy. Kólnja je so předwčerawšim popołdnju na Rathenauwowej we Wojerecach paliła. Při tym jednaše so wo pódlanske twarjenje tamnišeje dobrowólneje wohnjoweje wobory. Wohnjowi wobornicy mějachu tuž jara krótki puć a płomjenja spěšnje podusychu. Přiwšěm nasta něhdźe 5 000 eurow škody. Dokelž njemóžachu wuzamknyć, zo jedna so wo zapalerstwo, dyrbješe sej fachowc po hašenju kólnju bliže wobhladać. Što mějachu wobornicy w pódlanskim twarjenju składowane, znate njeje.
Kelkož plincow, telko słónca
Njedawno bě w internaće Serbskeho gymnazija ruski wječor „Maslenica“. Tradicionalny ruski swjedźenski tydźeń předstaji nam asistentka za cuze rěče na gymnaziju Anastasia Artemova. „Maslenica“ pochadźa wot ruskeho słowa maslo, štož přełožene butra rěka. Jedna so potajkim wo butrowy tydźeń. Swjedźeń wotměwa so kóžde lěto kónc zymy. Wažnu rólu hraja na wšěch dnjach plincy, kotrež symbolizuja słónco. Při tym je wažne, wjele złoćanych plincow napjec a zjěsć. Kelkož plincow, telko słónčnych dnjow přichodne lěto změješ.
Nakupowansku njedźelu z kołbaskowymi wikami je minjenu njedźelu ...
Krótkopowěsće (29.03.23)
Start Olympiady serbskeje rĕče
Wodowe Hendrichecy. Serbske šulske towarstwo (SŠT) zahaji dźensa 55. Centralnu olympiadu serbskeje rĕče we Wodowych Hendrichecach. Lětsa wobdźěli so 63 šulerjow 6. lĕtnikow serbskich wyšich šulow, Budyskeho Serbskeho gymnazija, wyšeje šule w Slepom kaž tež 11 šulerjow 6. lĕtnika Choćebuskeho Delnjo-serbskeho gymnazija, zo bychu hač do pjatka swoje kmanosće w serbšćinje měrili.
Pjenjezy za sotrownju
Budyšin. Zwjazk a Sakska podpěrujetej z dohromady 445 000 eurami saněrowanje sotrownje Bratrowskeje unity w Małym Wjelkowje. Wo tym informowaše sakski minister za regionalne wuwiće Thomas Schmidt (CDU). Tuta w Sakskej poslednja hišće eksistowaca sotrownja słuša k najstaršim a najdrohotnišim swědkam Ochranowskeho twarstwa a ma tež nadregionalny wuznam.
Najrjeńše jejko dźěći a młodźiny
