Udo Wićaz a Stephan Meyer wuzwolenaj
We wokrjesomaj Budyšin a Zhorjelc, w Rudnohórskim, Vogtlandskim a Zwickauskim wokrjesu je CDU zastojnstwo krajneho rady we wčerawšich rozsudnych wólbach zakitowała. We wokrjesu srjedźna Sakska je kandidat-jednotliwc Dirk Neubauer dominancu sakskich křesćanskich demokratow přełamał a najlěpši wuslědk docpěł.
Budyšin/Kamjenc/Zhorjelc (SN/at). Napjatosć knježeše na wólbnej party CDU w Budyskim hosćencu Residence, doniž njebě w 20.30 hodź. wolóžene wyskanje wudyriło. Jich kandidat, dotalny 1. přirjadnik Udo Wićaz je druhi wólbny přechod z 43,5 proc. hišće jasniši hač před dwěmaj njedźelomaj dobył. Najebać słabe wólbne wobdźělenje jenož 36,7 proc. je wón jako jenički wot štyrjoch požadarjow procentualnje hłosy přidobył. Kandidat CDU je w 55 ze 57 komunow wólby dobył.
Krótkopowěsće (04.07.22)
Dietze zastojnstwo złožiła
Berlin. Nawodnica wobwoda dźěłarnistwa IG metal za Braniborsku, Saksku a Berlin Birgit Dietze je swoje zastojnistwo k 1. julijej złožiła. Hakle 1. oktobra 2020 je wona nadawki přewzała. Přičina za wupowědźenje su wšelake wosobinske naležnosće a druha powołanska perspektiwa. Koordinaciju wobwoda je nětko Stephan Vetter přewzał.
Z wyšim měšćanostu rěčeli
Wojerecy. Prezenca serbskeje rěče w šulach města, spěchowanje motiwacije za wuknjacych přez přiličenje za maturu (2. cuza rěč) kaž tež lěpšiny a móžnosće za wutworjenje samopostajowaceje korporacije serbskeho ludu stejachu minjeny pjatk w srjedźišću rozmołwy Wojerowskeho wyšeho měšćanosta Torstena Rubana-Zeha (SPD) z čłonami Serbskeho sejma Anetu Zahrodnikowej, Hagenom Domašku a Měrćinom Krawcom.
Šćěpiwa efektiwne
We wsy zhromadnosć polěpšić
Lěto staru ideju w Serbskich Pazlicach nětko zwoprawdźili
Serbske Pazlicy (SN/MWj). W serbskich gmejnach rostu wjesne towarstwa kaž hriby ze zemje. Předwčerawšim su tajke we Worklecach załožili (SN rozprawjachu) a hižo minjeny tydźeń w Serbskich Pazlicach. Tam je z nimale 30 přitomnych wjace hač 20 wosobow towarstwu přistupiło. „Chcemy w Serbskich Pazlicach wjesnu zhromadnosć polěpšić a wšelake projekty zwoprawdźić. Za to je towarstwo najkmańši puć“, praji nowy předsyda Měrko Domaška. Po jeho słowach je ideja hižo lěto stara. Nastorčili su ju mjez druhim gmejnskej radźićelej Claudia Liznarjowa a Frank Domš, ale tež wjacori wjesnjenjo, kiž su hižo před lětami eksistowacemu wjesnemu towarstwu přisłušeli.
Policija (01.07.22)
Tykanc podhladny był
Njedźichow. Po tym zo běštej alkohol piłoj a tykanc jědłoj, dyrbještej so předwčerawšim 18lětnej holcy z Njedźichowa strowotniskich problemow dla do chorownje dowjezć dać. Policisća mějachu podhlad a na městnje slědźachu, hač bě snano něchtó wopojne jědy do tykanca měšał. A woprawdźe namakachu woni slědy konopje a zawěsćichu tohorunja zbytki tykanca. Tón nětko w laborje dale přepytuja.
Radźićeljo z wuwićom njespokojom
Budyšin (CS/SN). W njepřitomnosći wyšeho měšćanosty Alexandera Ahrensa (SPD), kiž bě swójbnych přičin dla zadźěwany, zwuraznichu wjacori čłonojo Budyskeje měšćanskeje rady předwčerawšim na swojim posedźenju njespokojnosć wo tym, kak je so město Budyšin w zašłych lětach wuwiło. Hladajo na infrastrukturu pobrachuja perspektiwy, skoržeše Jörg Drews z wobydlerskeho zwjazka. Město dyrbjało swoju poziciju znowa namakać. Po wólbach wyšeho měšćanosty, při kotrychž bu Ahrens wotwoleny a Karsten Vogt, kiž bě jako hósć přitomny, wuzwoleny, je wěsty wakuum nastał. Tónle wakuum pak hižo dlěje wobsteji, měnješe Sieghard Albert (AfD). „Njeběchmy kmani, porjadny regionalny wuwićowy koncept wobzamknyć.“ Město Budyšin daloko za Zhorjelcom hinka.
W Radworju nětko turistiske parkowanišćo při tamnišim kěrchowje ...
Krótkopowěsće (01.07.22)
Wo 450. jubileju
Njeswačidło. Wo 450lětnych stawiznach Lišeje Hory přednošowaše před wjace hač 30 zajimcami štwórtk wječor, mjez nimi bě połojca Serbow, Manfred Laduš. 1572 bu mała wjes jako Liššehor prěni króć we wopismje naspomnjene. Liša Hora měješe jenož pjeć statokow a nihdy wjace hač 30 wobydlerjow, dźensa su tam jenož hišće třo wjesnjenjo žiwi.
W jězorje so njekupać
Budyšin. Hladajo na razantne wuwiće módrych algow w Budyskim spjatym jězorje dla wotradźa strowotniski zarjad wokrjesa so we wodźiznje kupać. We wobłuku wobstajnych přepytowanjow zwěsćichu fachowcy mokricy, kotrež móža chorosće zawinować. Tohorunja njeje woda hižo přewidna, ale mutna.
Z nowej předsydku
Česći sej slědźenje serbskeho pčołarja
Hłowny wukon pčołkow njeleži w produkciji mjedu, ale w popróšenju kćenjow
Ze swojeje „ranch“, kotraž leži trochu na hórce, ma Günter Sodan krasny pohlad na Budyšink. Z wjesku w Malešanskej gmejnje jeho wosebity poćah zwjazuje, a to w dwojim nastupanju: Jako bywši wjesnjanosta Malešanskeje gmejny postara so Günter Sodan wo to, zo bu najwuznamniši syn Budyšinka, Serb Hadam Bohuchwał Šěrach, na wosebite wašnje počesćeny. Po tym zo běchu lěta 2001 bywše składźišćo tamnišeho ryćerkubła na wjesny kulturny centrum přetworili, da komuna na namjet swojeho tehdyšeho wjesnjanosty na nim wopomnjensku taflu připrawić, kotraž bu 4. meje 2002 – potajkim nimale před 20 lětami – poswjećena. Šěrach njebě sej we 18. lětstotku jenož jako spisar serbskich wučbnicow a wědomostnych spisow mjeno stworił, ale zdoby sej samo mjezynarodne mjeno jako pčołar a slědźer. Wón wozjewjowaše knihi a dalše wědomostne spisy wo pčołarstwu a załoži w lěće 1768 w Budyšinku prěnju pčołarsku šulu. A to je druha runina, na kotrejž so Günter Sodan z Budyšinkom a wulkim synom tejele wsy zwjazany čuje.
Policija (30.06.22)
Njeznaći muža wobšudźili
Delni Wujězd. Muž je so předwčerawšim w Delnim Wujězdźe z woporom wobšudnikow stał. 64lětny dósta přez WhatsApp powěsć, zo ma jeho syn nowe šmóratko. Zo by je wužiwać móhł, pak trjeba nimale 2 000 eurow. Tule sumu sej wón nětko wot nana wuprosy. Delnjowujězdźan pjenjezy na nižozemske konto přepokaza. Bórze na to muž wot swojeho woprawdźiteho syna zhoni, zo jednaše so wo wobšudnistwo.
Přetwar nawsy nastorčeny
Chróšćanska gmejnska rada wjacore twarske nadawki přepodała
Chrósćicy (JK/SN). Pjenjezy z lońšeho myta we wubědźowanju SIMUL+ su w gmejnje Chrósćicy mjez druhim tež předwidźane byli, wobnowić a znowa rjadować nawjes před něhdyšim gmejnskim zarjadom a areal podłu Cyrkwinskeje hory. Nětko nabudźe tutón naročny projekt gmejny konkretne kontury. Na wčerawšim posedźenju gmejnskeje rady přepodachu nadawki z losow 1 a 2 we wobjimje nimale 385 000 eurow Rakečanskej firmje Martin Stolle, kotraž bě ze štyrjoch firmow hospodarsce najlěpši poskitk wotedała. Do wobzamknjenja gmejnskeje rady poda inženjer Peter Linke z Drježdźanskeho planowanskeho běrowa CommunalConcept, kotryž bě za gmejnu projekt noworjadowanja wuwił, přehlad wo poskitkach jednotliwych firmow. Rozdźěle njeběchu přewulke a tak njebě lochko, rozsudźić, wšako su wšitke štyri firmy znate a připóznate. Po tuchwilnych planach móhli so twarske dźěła za tři tydźenje zahajić. Planowar a gmejna ličitaj z tym, zo projekt něhdźe poł lěta traje.
