Łužiska a srjedźoněmska towaršnosć hórnistwoweho zarjadnistwa (LMBV) přilubi na posedźenju gmejnskeje rady we Łazu: Lětuša turistiska sezona ­na južnym pobrjohu Slěborneho jězora je móžna.

Łaz (AK/SN). Karsten Handro, wotrjadnik projektoweho managementa wuchodna Sakska a Marko Walter, projektowy manager LMBV, informowaštaj zhromadnje na poslednim posedźenju gmejnskeje ­rady spočatk měrca we Łazu wo postupach saněrowanskich dźěłow kołowo­koło Slěborneho jězora. Wonaj zdźělištaj, zo wostanje po planach zhusćenje při­brjohow a spódka wot lětušeho oktobra hač do apryla 2025 hłowny dźěłowy nadawk LMBV. „Konkretnje rěka to: Za sezonu 2024 na južnym přibrjohu jězora ku­panje hišće móžne njebudźe. Za tu­ristisku sezonu 2025 pak chcemy jón do­społnje saněrowany přepodać,“ wuwjedźe Karsten Handro. Po naprašowanju Falka Nowotnika – wobhospodarja Łazowskeho campingoweho parka –, hač změja turisća lětsa hišće generelny přistup k tutomu přibrjohej, zdźěli Marko Walter: „LMBV planuje, do 6. apryla za­raćenski płót při južnym brjoze Slěborneho jězora wróćo twarić.“

Zhorjelc (AK/SN). Zhorjelski wokrjes prócuje so dale wo to, chorownje w Žitawje, Habrachćicach (Eberswalde) a Běłej Wodźe zachować. Tole podšmórny krajny rada wokrjesa dr. Stephan Meyer minjeny pjatk w Zhorjelcu. „We wokrjesnym zarjadnistwje smy nětko projektowy management zarjadowali. Tam zaběraja so fachowcy intensiwnje z třomi mjenowanymi domami“, krajny rada wujasni.

Stephan Meyer je so na słužbnym wuradźowanju šefowych lěkarjow wobdźělił. Tohorunja je so wón ze zawodnej radu koncerna schadźował. „Cyłkownje dojednachmy so na to, zo je nuznje trěbne jednać“, Meyer wobkrući.

Na zańdźenym posedźenju w Zhorjelcu loni 14. decembra, je wokrjesny sejmik zasadnje rozsudźił, chorownje zachować. Tři domy maja nošne struktury w přichodźe zawěsćić. W Žitawje měł stacionarny centrum klinikuma Hornjołužiske hory swoje słužby poskićeć. Porno tomu ma so w Habrachćicach porodna stacija zachować. A w Běłej Wodźe koncentruja so na integrowany strowotniski centrum.

Wojerecy (SN/at). 29 šulerjow 3. wukubłanskeho lěta medicinskeje powołanskeje fachoweje šule Klinikuma Łužiska jězorina Wojerecy přewozmje wot 18. měrca zamołwitosć za derjeměće pacientow a bjezporočne wotběhi na stacijomaj dermatologija a chirurgija. Z tym přihotuja so młodźi ludźo na praktiski eksamen a zdobom dožiwjeja přichodny wšědny powołanski dźeń cyle blisko.

Zastarowanje pacientow chirurgije a dermatologije je přewšo kompleksne, klinikum zdźěli. Dokelž su nadawki tam dosć wšelake, hodźitej so wonej staciji za přihot na eksamen wosebje derje. Šulerjam poboku su nazhonići fachowi hladarjo, lěkarjo a terapeuća, kiž na stacijomaj dźěłaja. Hač do 5. apryla maja šulerki a šulerjo šansu, cyłotne zastaranje pacientow a organizaciju stacije zaručić. Ze samostatnym dźěłom přiběratej wěstota a sebjewědomje za praktiske pruwowanje.

We wobłuku přihotowanskeho tydźenja tworja wot soboty wuměnjenja za samostatne dźěło. Loni hižo su započeli swoju wědu nastupajo hladanje, změnu wobwjaza a dokumentaciju pohłubšić.

Budyšin (SN/bš). Na akciski dźeń F.E.S.T., kotryž su žony za žony organizowali, přeprosychu minjenu sobotu tři žony, kotrež su w Budyskej kulturnej scenje angažowane. Marie Melzer je hudźbnica, Franciska Herz sobuorganizatorka Bu­dyskeho festiwala Miktival a Lisa Wendler dźěła w Budyskim Kamjentnym domje­.

F.E.S.T. steješe pod hesłom: feministisce, sprawnje, samo zhotowjene a za rejowanje. Běše to prěni dźeń tajkeho razu, kotryž so na žony měrješe a so tež wot tutych wuhotowa. „Mamy zaćišć, kulturu w Budyskej kónčinje dominuja mužojo“, tak jedna z organizatorkow, Marie Melzer. „Tež žony zamóža na přikład wšelakore hudźbne stile posłužować“, zdźěli Melzer. Tohodla su sej na tutón dźeń tež jenož žónske wuměłče přeprosyli. Wužichu nimo toho móžnosć, so mjez sobu zeznać. Zaměr akciskeho dnja bě, něšto noweho za kulturu, ale tež za Budysku towaršnosć stworić.