Rakecy. Štóž rady pućuje a chcył pućowanske šćežki w regionje wobstajnje testować, móže so pola Towarstwa za wuwiće Hornjołužiskeje hole a hatow (OHTL) na šćežkarja/šćežkarku wukubłać dać. W tej funkciji móža zajimcy pućowanske šćežki kontrolować, polěpšenja namjetować a hladać, hač je wšitko w porjadku. Terminaj wukubłanja stej wot 22. do 24. apryla abo wot 13. do 15. meje w Budyskej młodowni. Zajimcy njech přizjewja so pola OHTL pod telefonowym čisłom 01523 8976414. Přizjewjenja za aprylski termin přijimuja hač do 31. měrca, za mejski hač do 30. apryla.

Wo komunalnej politice

Budyšin. Herberta Wehnerowy kubłanski skutk za komunalnu politiku přewjedźe zajutřišim, srjedu, wot 17 do 20.30 hodź. seminar „Fit za komunalnu politiku“ w rumnosćach Budyskeje žónskeje iniciatiwy na Kamjentnej 15. Mysleny je se­minar předewšěm za žony, kotrež chcedźa so w komunalnej politice angažować. Zajimče njech so telefonisce přizjewja, a to pod 0351 8040220.

Hamor (AK/SN). Do infrastruktury při Bjerwałdskim jězoru Hamorska gmejna dale inwestuje. Na zašłym posedźenju gmejnskeje rady přepodachu jeje čło­nojo nadawk za porjedźenje 1,2 kilometraj dołheho wotrězka kolesowanskeje šćežki wokoło jězora. Tak mjenowana topołowa aleja dyrbi so nuznje wutwarić a ponowić. Po njej móžeš lědma hišće jězdźić, na posedźenju radźićelow rěkaše.

Naprawa płaći něhdźe 320 000 eurow. Twarske dźěła maja so hišće do spo­čatka sezony zahajić. Financować chcedźa předewzaće ze swójskimi srědkami a ze spěchowanjom. Swójske pjenjezy we wobjimje 194 000 eurow bjeru z aktualneje inwesticiskeje pawšale kaž tež z teje zašłeju lět. Jako spěchowanje wužiwaja srědki, kotrež dóstanje komuna za wudźeržowanje swojich pućow wot Swobodneho stata Sakskeje.

Trjebin (CK/SN). Wo wužiwanju srědkow z komunalneje pawšale za skrućenje wjesneje kónčiny měješe Trjebinska gmejnska rada na swojim zašłym posedźenju rozsudźić. Prašenje bě, što ma so z dokładnje 57 769 eurami stać, kotrež njeběchu loni přetrjebali. Do toho bě so hižo techniski wuběrk z próstwu komunalneho twarskeho zawoda zaběrał. Jeho přistajeni chcyli za 1 200 eurow nastroj k wurězowanju štomow kupić, zo nje­bychu stajnje do jich wjerškow łazyć trjebali. Dokelž technika twarskeho zawoda mjeztym tež hižo najmłódša njeje, trjebaja nowy trawusyčak-traktor za 15 348 eurow. Dale wudadźa 1 748 eurow za porjedźenje bowlingoweje čary. Kaž wjesnjanosta Waldemar Locke (CDU) wopodstatni, su tam defekt zwěsćili, kiž ma so ze srědkami z komunalneje pawšale porjedźeć.

Nimo toho chcedźa kameru, wótře­rěčak a dalšu techniku za přewjedźenje widejowych konferencow za dohromady 1 982 eurow kupić. Trjebinska gmejna dotal tajke techniske móžnosće nima, štož je so w času koronapandemije jako wobćežne wopokazało. W tajkich padach dyrbjachu rumnosće Slepjanskeje gmejny wužiwać.

Wudawki za nowu drastu wohnjowych wobornikow wobzamknyli

Ralbicy (JK/SN). Njewšědna přezjednosć wobsteješe mjez radźićelemi gmejny Ralbi­cy-Róžant na jich zašłym posedźenju při rozsudźe wo nakupje noweje drasty­ za dobrowólnych wohnjowych wobornikow. Zarjadniski zwjazk Při Klóšterskej wodźe je nadawk k dodawanju wotpowědneje drasty wupisał. Dóšli su tři poskitki z rozdźělnym wuslědkom. Tohodla je so předsyda zarjadniskeho zwjazka Měrko Domaška z próstwu na firmy wobroćił, hač móhli dóstać model noweje drasty, wosebje kabaty. Jeničke přede­wzaće je na to reagowało a model jara naročneje kapy pósłało, kotruž Domaška na minjenym posedźenju delanskich radźićelow předstaji.