Ma runostajenje za prawe
Solidnje hospodarili
Rozprawa k lońšemu hospodarskemu planej pozitiwnje překwapiła
Rakecy (JK/SN). K zahajenju minjeneho posedźenja Rakečanskeje gmejnskeje rady wupadaše tak, zo njebudźe gremij wobzamknjenjakmany, dokelž mnozy radźićeljo pobrachowachu. Na zbožo pak hišće jedyn ze zapozdźenjom přińdźe a tak móžachu swoje wobzamknjenja přewjesć. Te běchu trěbne, zo móhli nadawk za ponowjenje gmejnskich pućow přepodać.
Po tym zo bě gmejna Rakecy podłožki pjeć firmam připósłała, su štyri předewzaća poskitk zapodali. Nadawk přepodachu w gmejnje derje znatej firmje Kutter z Plaue. Wona ma nětko za 67 000 eurow tři komunalne dróhi ponowić, mjez druhim Lěsny puć w Rakecach.
Hospoda nětko lěpje wuhotowana
Kamjenc (BG/SN). W putniskej hospodźe při wuhladnej wěži na Kamjenskej Pastwinej horje su minjeny pjatk ponowjene sanitarne rumnosće přepodali. Zo móžachu tónle projekt zwoprawdźić, je hłownje zasłužba Kerstin Boden. Wona bě sama hižo po Jakubowym puću hač do Santiaga de Compostela putnikowała a wě, zo so při tym chětro poćiš. Tohodla su porjadne sanitarne wuměnjenja w putniskej hospodźe jara wažne. A runje to putnicy w Kamjencu w zašłosći časćišo porokowachu. Tohodla bě sej wona předewzała, to změnić.
Dokelž trjebachu za projekt něhdźe 15 000 eurow, zrodźi Kerstin Boden ideju, na njewšědne wašnje dary zběrać. Wona připowědźi, z dołhimi plećenymi šlebjerdami wuhladnu wěžu na Pastwinej horje zakryć, a namołwješe přećelow, znatych a zajimcow při tym pomhać. To měješe tajki wulkotny wothłós, zo sta so ideja loni z nadregionalnym podawkom. Ze wšěch kónčin Němskeje kaž tež z wukraja dochadźachu 20 króć 20 centimetrow wulke plećene lapki, kotrež su w Kamjencu do dołhich šlebjerdow zešili.
Tajke rjane hrajkanišćo kóžda wjes nima. Minjeny tydźeń ...
Krótkopowěsće (21.03.22)
Nowotny dale wjesnjanosta
Rakecy. Z 98,5 procentami wšěch hłosow bu Swen Nowotny wčera za Rakečanskeho wjesnjanostu wuzwoleny. Wot CDU namjetowany bě Nowotny jenički kandidat. Wolerjo pak mějachu składnosć, dalše mjeno na wólbny lisćik připisać, štož je jenož mało ludźi činiło. Před sydom lětami bě so Swen Nowotny prěni raz wo zastojnstwo wjesnjanosty w Rakecach prócował a so tehdy přećiwo třom dalšim kandidatam přesadźił.
Incidenca wyša hač 2 000
Budyšin. Přez kónc tydźenja je incidenca w Budyskim wokrjesu marku 2 000 překročiła. Dźensa podawa Roberta Kochowy institut hódnotu 2 082,8. Wokrjes informowaše dopołdnja wo 1 693 natyknjenjach z koronawirusom a wo dwěmaj smjertnymaj padomaj wot minjeneho pjatka. Wo 1 216 infekcijach rozprawješe wokrjes Zhorjelc minjeny pjatk, po RKI wučinja tam incidenca dźensa 1 609,6.
Sylnja wučbu informatiki
Policija (18.03.22)
Spěšnosć kontrolowali
Rakecy. Dlěje hač pjeć hodźin je policija předwčerawšim popołdnju a wječor spěšnosć na hłownej dróze w Rakecach kontrolowała. Do směra na Budyšin bě wot 600 jězdźidłow 28 přespěšnych. Rekord docpě pólski Opel z 82 km/h. Šofer dyrbi nětko měsac nóžkować a 260 eurow pokuty płaćić. Do napřećiwneho směra bě wuslědk moderatniši. Wot 660 měrjenych awtow bě pjeć přespěšnych, z toho tři we wobłuku pokuty. Najspěšniši z 71 km/h bě VW z Budyskim čisłom. Na wodźerja čakatej nětko dypk w Flensburgu a 115 eurow pokuty.
W zahrodnistwje kamelije wobdźiwać
Wokoło jězora ma zaso kołopuć nastać
Łaz (AK/SN). Gmejna Łaz w Budyskim wokrjesu prócuje so dale wo znowa natwar kołopuća wokoło Hórnikečanskeho jězora. To wuzběhny wjesnjanosta Thomas Leberecht (CDU) na zašłym posedźenju gmejnskeje rady. Jeje čłonojo zaběrachu so z financowanskim zrěčenjom z Łužiskej a srjedźoněmskej towaršnosću hórnistwoweho zarjadnistwa (LMBV).
Saněrowanja jězora dla je puć sylnje poćerpjeł. Nowy ma dospołnje asfaltowany a před korjenjemi škitany być. Podłu njeho su blida a ławki kaž tež wobswětlenje předwidźane. Planowanje płaći něhdźe 30 000 eurow. Z toho zapłaći Łazowska gmejna 15 procentow. Město Kulow wobdźěli so z tysac eurami, wšako słušeja jemu ležownosće na Mučowskim pobrjohu jězora.
Najwjetši dźěl financuja z fondsa za brunicowe saněrowanje. Po słowach wjesnjanosty koncentruja so najprjedy na zapadny dźěl jězora, přetož tón budźe najskerje jako prěni zaso přistupny. Wothłosować dyrbja to ze zarjadnistwom rěčnych zawěrow, dokelž wone přichodny kołopuć sobu wužiwa.
Šansa młodostnej so wobhonić
Budyšin/Berlin. Zapósłanča zwjazkoweho sejma Kathrin Michel (SPD) přeproša jednu młodostnu z Budyskeho wokrjesa w starobje 16 do 19 lět na wopyt zwjazkoweho sejma w Berlinje. Tak wobdźěli so wona na akciji Girls Day, ke kotrejž chce jeje frakcija dohromady 60 młodych holcow přeprosyć. Wone móža so wo politice a dźěle zapósłancow wobhonić. Termin je wot 27. do 28. apryla. Štóž ma zajim, njech napisa někotre linki wo swojej motiwaciji a njech přizjewi so hač do 21. měrca pod kathrin.michel.wk@bundestag.de.
Poskićeja wosebite wodźenja
Kamjenc. W Kamjenskim Muzeju zapadneje Łužicy powjedźe geologa Jens Czoßek njedźelu, 20. měrca, trójce po wosebitej wustajeńcy wo krydowej dobje před 90 milionami lět w Sakskej. W 11 a 14 hodź. budźetej to 45 mjeńšin trajacej wodźeni, w 15.15 hodź. dalše połdrahodźinske. Wobdźělenje płaći jeničce normalny zastup. Wobkedźbować maja wopytowarjo prawidło 3G. Wšitcy su wutrobnje přeprošeni.
Wotewrje nowy wobchod
Palenje chodojtow zaso zmóžnić
Radwor (SN/MkWj). Ukrainscy wójnscy ćěkancy běchu předwčerawšim, srjedu, tež tema na posedźenju Radworskeje gmejnskeje rady. Kaž wjesnjanostka Madeleine Rentsch wo tym informowaše, je mjeztym něhdźe 700 ćěkancow w Budyskim wokrjesu dojěło. Krizowy stab krajnoradneho zarjada dźěła koordinuje. Tež gmejna je konto zarjadowała, na kotrež móža wobydlerjo pjenježne dary přepokazać. Radźićeljo zhonichu, zo stej dwě swójbje w gmejnje ćěkancow přiwzałoj, stajnje po pjeć wosobach.
Za planowany wutwar parkowanišća při Radworskim kěrchowje su wupisanja za twarske dźěła rozesłane. Spočatk julija chcedźa po planje dźěłać započeć a kónc awgusta hotowi być. Nowu štwórć jednoswójbnych domow za wjacezaměrowej halu „Slavia“ nastupajo chcedźa na posedźenju w meji rozsudźić.
