Móžeće so hišće na čas před lětomaj dopomnić? Tehdy smy tež w Serbskich Nowinach dyrbjeli jedne zarjadowanje po druhim wotprajić, dokelž so wone korony dla njewotměchu. Dźensa je połoženje runje nawopačne. Po tym zo je najwjetši dźěl wobmjezowanjow zběhnjeny, smědźa so dźiwadłowe předstajenja runje tak wotměć kaž swjedźenje a wiki. Po jutrach je tak a tak čas, zo zjawne žiwjene zaso wožiwi. Ale telko přeprošenjow na zjawne terminy kaž nětko hnydom měli njejsmy. A ludźo so runjewon za tym žedźa, móc sej něšto wobhladać a sej něhdźe dojěć, kaž smy to jutrowničku wočiwidnje nazhonili. Hnydom po jutrach nětko dalše zarjadowanja čakaja, kaž přirodowe wiki w Stróži, wodźenje po Smochčanskim parku, zabawne popołdnjo w Ptačecach, zahajenje sezony w klóšterskej zahrodźe w Pančicach-Kukowje a wubědźowanje motorskich we Wětrowje. Ja so jenož nadźijam, zo njetrjebamy hišće raz časy kaž před lětomaj dožiwić. Marian Wjeńka

Towarstwo do župy přiwzali

Chrósćicy. Předsydstwo Domowinskeje župy „Michał Hórnik“ Kamjenc je Spěchowanske towarstwo Serbskeje wyšeje šule „Michał Hórnik“ Worklecy na swojim posedźenju wčera w Chrósćicach do župy přiwzało. Wo tym informowaše tamniša regionalna rěčnica Domowiny Katharina Jurkowa. Hakle loni je čłonstwo župy wo młodźinskej klubaj Konjecy-Šunow a Pančicy-Kukow rozrostło.

Po jutrach wjace natyknjenjow

Budyšin. Po jutrach ličby zwěsćenych natyknjenjow z koronawirusom w Hornjej Łužicy zaso přiběraja. Roberta Kochowy institut mjenowaše dźensa za Budyski wokrjes w běhu 24 hodźin 845 infekcijow a štyri smjertne pady. Aktualna incidenca tu je 449,6. Wokrjes Zhorjelc rozprawješe wčera wo 632 natyknjenjach, mjez nimi je 75 dźěći. Incidenca po RKI je tam dźensa 328,1.

Ekoratarjam premije wupłaća

Po přerěznej starobje wobydlerjow młoda gmejna Ralbicy-Róžant steji na solidnych nohach

Samo na sebi móhł wón lětsa woswjećić jubilej a snano tomu tak budźe, jeli so wobydlerjo gmejny Ralbicy-Róžant 12. junija za njeho a dalšu dobu z nim wupraja. Wšako je Hubertus Ryćer zastojnstwo wjesnjanosty delanskeje gmejny wot 1990 do 1994 (tehdy bě Róžant hišće samostatna gmejna) a wot lěta 2001 hač donětka tři wólbne doby wukonjał, štož wučinja 25 lět. Přihotowany na to wón je a ma tež wulki lóšt, swoje zastojnstwo dale wukonjeć.

K tomu pohonjeja jeho dotalne wuspěchi, kotrež je sej dyrbjał zdźěla zhromadnje z gmejnskej radu wšelakeje zestawy wuwojować. Ale skónčnje bě to wšo na dobro gmejny a wobydlerjow. Tych a jich wašnja wšak hižo ze štyrjoch lět jako hłownohamtski a 21 lět čestnohamtski wjesnjanosta znaje.

Kompromisy tworić dyrbjał

Njeswačidło (JK/SN). Korona je w Njeswačanskim gmejnskim zarjedźe zawiniła stop zarjadniskeho dźěła. Nimo wjesnjanosty Gerda Schustera (CDU) stej tež nawodnica financneho zarjada a nawodnica twarskeho wotrjada schorjenej. Někotre dalše sobudźěłaćerki su runje tak schorjene abo maja karanteny dla doma wostać. Tež rěčne hodźiny minjeny tydźeń přewjesć njemóžachu. Wo tym informowaše zastupowacy wjesnjanosta Norbert Braun (rjemjesło a přemysło) na zašłym posedźenju gmejnskeje rady, kotrež bě mjenowanych přičin a přewidneho dnjoweho porjada dla poměrnje krótke.