Bjez jězbneje dowolnosće po puću był

Budyšin. Na Budyskej Sukelnskej je policija wutoru popołdnju 32lětneho šofera wosoboweho awta zadźeržała. Při přepruwowanju jeho datow zastojnikaj zwěsćištaj, zo bě muž bjez jězbneje dowolnosće po puću. Zdobom běše wón drogi brał a měješe w awće po zdaću kradnjene wěcy. Mjez druhim běchu to hišće ori­ginalnje zapakowane parne rjedźaki a prochsrěbaki. Nastroje policija sćaza, dowjeze wodźerja awta k wotedaću kreje a wozjewi jeho pozdatneho padustwa dla. Policija pad přepytuje.

Přećeljo škota, „serbscy seniorojo-škotowarjo“ su sej njedawno ze swojimi mandźelskimi, partnerami a přećelemi po tradiciji wulećeli, a to z Budyskim předewzaćom Lassak. Při najrjeńšim słónčnym wjedrje wotkrychu sej woni Błóta a Kraj šokolody Felicitas w Lěšćach (Hornow). Tójšto wědy nasrěbachu so na třihodźinskim čołmikowanju po błótowskich groblach. Na to su jim praliny a kofej w manufakturje Felicitas zesłodźeli. Zdobom zhonichu tam wo produkciji šokolody a pralinow. Při tym so jim wuswětli, zo chłóšćenje začuće zboža posrědkuje. W historiskim hosćencu „Oppott“, pomjenowanym po něhdyšej grobli, w błótowskej idylce Lědy, zesłodźa sobujěducym wobjed. Wječerjeli su wšitcy zhromadnje na dompuću w serbskim hosćencu „Dubrjenske bahno“. W małej wsy njedaloko Kulowa spodobny dźeń škotowarjow wuklinča. Měrćin Nowak

Hamor (AK/SN). Oficialna kupanska sezona w Bjerwałdskim jězoru je zakónčena. Na minjenym posedźenju Hamorskeje gmejnskeje rady wjesnjanosta Achim Junker (CDU) rjekny: „Minjenu sezonu su tysacy hosći z kraja a wukraja wólno­časne zarjadnišća w našej gmejnje wo­pytali.“ Wón dźakowaše so předewšěm čestnohamtskim zamołwitym, mjez druhim za porjad a wěstotu, wohnjowym wobornikam kaž tež čłonam Němskeho čerwjeneho křiža, staracym so wo wěstotu w a při wodźe. Sportowe čołmy mjeztym do zymskeho składu woža.

W krajinowej wuměłskej twórbje „Wucho“ su lětsa wosom wulkich zarjadowanjow wotměli. Tak běchu hosćo na přikład tež na poskićenja Łužiskeho festiwala a akademije Europskeho chóra Zhorjelc přišli. „Za dźiwadło pod hołym njebjom ze 270 městnami pytamy trajnje spušćomneho wo hospodarjerja, kiž poskići wopytowarjam a wobydlerjam atraktiwny a wobstajny program a zdobom gastronomiske zastaranje zawěsći“, wjesnjanosta Junker rjekny.

Minjenu njedźelu swjećeše wohnjowa wobora w Rachlowje pod Čornobohom w Kubšiskej gmejnje 100. róčnicu wobstaća. W lěće 1921 załožichu ratarjo a rjemjeslnicy woboru, zo bychu žně a chěže zhromadnje škitali. Nimo wobory běše tež šula wjesne srjedźišćo za serbskich a němskich wobydlerjow Rachlowa. Zo bychu serbskorěčny charakter tež w přichodźe zdźerželi, je nawoda Rachlowskich wohnjowych wobornikow Jens Lehmann (na jewišću naprawo) ideju zrodźił, dwurěčne ­pućowanske tafle nastajić. Foto: Olaf Reichert