Prawo delegowanja ma Domowina
Budyšin/Lipsk/Njebjelčicy (SN/at). Z nadawkom prezidijej, wutworić namakansku komisiju za wosobu, kotraž ma Serbow w nowej Rozhłosowej radźe MDR zastupować, je Zwjazkowe předsydstwo Domowiny minjenu sobotu trěbnu proceduru zahajiło. Zakład za to je list předsydki tuchwilneje rozhłosoweje rady prof. dr. Gabriele Schade třěšnemu zwjazkej z 1. junija, w kotrymž rěka: „Prošu zdźělće mi po móžnosći hač do kónca septembra 2021, koho Domowina do noweje rozhłosoweje rady sćele.“ Kaž nowinski rěčnik Domowiny Marcel Brauman zdźěli, je zwjazkowe předsydstwo prěni raz lětsa w januarje wuprajenu próstwu wo zapodaće kandidaturow na nětko wobkrućiło „a wo to prosyło, zo njech wšitcy zajimcy swoju kandidaturu hač do kónca awgusta přizjewja“.
Wulki kwěćel postrowow z politiki
Politikarjo su swoju wutrobu za Serbow wotkryli. Tajki móhł zaćišć wobdźělnikow njedawneje hłowneje zhromadźizny Domowiny w Slepom być. Zaćišć pak njezłožuje so jenož na postrowy z livestreama, kotrež je režija zarjadowanja na tři wulke płachty projicěrowała. Zhladujemy na někotre podate pozicije.
Z citatom Serbam přichileneho basnika Petera Huckaufa wo domizniskich začućach we Łužicy zahaji prezident zwjazkoweho sejma Wolfgang Schäuble (CDU) swoju postrownu adresu. „Waše dźěło ma wulku hódnotu – w mnohostronskej němskej towaršnosći a w mnohotnosći Europy dźe wo to, zrosćenu kulturnu bohatosć we wšěch jeje fasetach pokazać“, politikar dale piše a dźakuje so „wšitkim, kotřiž su we hłownym abo čestnym zastojnstwje w Domowinje aktiwni a pomhaja serbskej mjeńšinje hłós spožčić“.
Zajimy Serbow su w strukturnej změnje zakótwjene, „na to móžeće hordźi być“, strowješe społnomócnjeny zwjazkoweho knježerstwa za prašenja wusydlencow a narodne mjeńšiny prof. dr. Bernd Fabritius z wideja.
Myto Ćišinskeho Trudli a Janej Malinkec
Unikatny je wčerawši rozsud kuratorija Myta Ćišinskeho nastupajo spožčenje lětušeho Myta Ćišinskeho a Spěchowanskeho myta Ćišinskeho. Prěni raz wuznamjeni Załožba za serbski lud we woběmaj kategorijomaj mandźelskeju.
Budyšin (SN/at). Myto Ćišinskeho 2021 spožči Załožba za serbski lud Trudli Malinkowej a Janej Malinkej z Budyšina, kaž załožba dźensa wobkrući. Čłonojo kuratorija k spožčenju najwyšeho serbskeho wuznamjenjeja su wčera w Budyšinje wuradźowali. Woni wopodstatnichu swój rozsud z wusahowacej publicistiskej dźěławosću Malinkec mandźelskeju na polu serbskich kulturnych stawiznow a z jeju wosebitym angažementom we wědomostnym towarstwje Maćicy Serbskej, w Serbskim ewangelskim towarstwje kaž tež z jeju politisko-narodnym skutkowanjom.
Rozsud kandidować spontany był
Najprjedy raz na to słuchać, štož nowačkam w Zwjazkowym předsydstwje Domowiny sobu na puć dadźa. Jedyn z nich, młodych, je Krystof Grofa z Berlina. 25lětny bu jako zastupjer Serbskeho młodźinskeho towarstwa Pawk z.t. do najwyšeho organa narodneje organizacije mjez hłownymi zhromadźiznami wuzwoleny. Na konstituowacym posedźenju sćěhuje młody muž ze swójbnymi korjenjemi w Chasowje koncentrowany to, štož tamni přednošuja. Mimiku w jeho wobliču lědma pytnješ. Ale to móže tež z přichodnym powołanjom Krystofa zwisować. Wón na Berlinskej Swobodnej uniwersiće prawnistwo studuje. A prawiznikej njesměš hnydom z wobliča wotčitać móc, što sej runje mysli.
Rězbarjenje w Miłoćicach
So předstajili a prěnje tři rozsudy tworili
Jenož tydźeń po hłownej wólbnej zhromadźiznje w Slepom je so tam wuzwolene nowe Zwjazkowe předsydstwo Domowiny skonstituowało a prěnje, za dalše dźěło trěbne, rozsudy tworiło.
Budyšin (SN/at). Štóž nowe zastojnstwo nastupi, měł wědźeć kotre su tam wotběhi. Tomu słužeše prěni dźěl hybridnje přewjedźeneho prěnjeho posedźenja noweho zwjazkoweho předsydstwa minjenu sobotu. 15 čłonkow a čłonow bě na žurli Budyskeho Serbskeho domu, dźesaćo wobdźělichu so doma před wobrazowku na wuradźowanju. Kóžda a kóždy so skrótka předstaji a něšto wo temach přeradźi, kotrež ju resp. jeho w skutkowanju gremija jimaja. Kaž předsyda Domowiny Dawid Statnik rjekny, je zwjazkowe předsydstwo „gremij, kotryž jara na konsens dźěła. Dyrbimy rozsudy tworić, kotrež wjetšina sobu njese.“
Zaćišće wo „hłownej“ sej wuměnjeli
Njechorń (SN). Na prěnim prezencnym wuradźowanju předsydstwa Budyskeje župy „Jan Arnošt Smoler“ po dołhim času wčera w Njechornju je rěčnica župy Leńka Thomasowa Klawsa Petrenca z gremija rozžohnowała a so jemu za dołholětne sobudźěło dźakowała.
Hłownu zhromadźiznu Domowiny su wuhódnoćili. Štyrjo čłonojo gremija běchu w Slepom, dalši sćěhowachu podawk přez livestream. Woni měnjachu, zo dyrbjał časowy wotběh lěpje organizowany być a zo měli wjace wo kubłanju a cyłkownym kubłanskim koncepće rěčeć. Diskusijny čas w Slepom njemějachu za dosahacy, tu je za přichod trjeba tróšku wulkomyslnišo planować.
Leńka Thomasowa poda prěnje mysle nastupajo dorozumjenje župow „Jan Arnošt Smoler“, „Michał Hórnik“ a „Handrij Zejler“ k serbskim wjesnym muzejam. Telefonisce běchu sej zastupjerjo župow a wjesnych muzejow njedawno mysle wuměnjeli. W juliju z rozmołwu pokročuja. Komuna njemóže za muzeje sama zamołwita być. Koordinowaca wosoba je jako narěčenski partner za ludźi a za přewod a koncept zarjadnišćow trěbna.
Wuzwolene zwjazkowe předsydstwo
Na wólbach zwjazkoweho předsydstwa staj so 102 delegataj wobdźěliłoj. Tule ličby docpětych hłosow jednotliwcow:
Župa Delnja Łužica
Kito Ela (91), Gerald Schön (89), Maksimilian Hasacki (89), Franciska Albertowa (91), Wylem Janhoefer (88), Jenifer Dünnbierowa (74)
Župa „Jakub Lorenc-Zalěski“
Diana Maticowa (94)
Župa „Michał Hórnik“ Kamjenc
Diana Wowčerjowa (97), Marlis Młynkowa (83), Jan Clausen (80)
Župa „Jan Arnošt Smoler“ Budyšin
Beno Sćapan (85)
Župa „Handrij Zejler“ Wojerecy
Lubina Dučmanowa (92), Mila Libšowa (83)
Zwjazk serbskich studowacych/ Župa „Jan Skala“
Matej Mark (91)
Serbske šulske towarstwo
Alena Hiccyna (94)
Maćica Serbska
Wito Bejmak (91)
Towarstwo Cyrila a Metoda
Marja Michałkowa (82), Damian Dyrlich (83)
Serbski Sokoł
Milan Funka (88)
Zwjazk za serbski kulturny turizm
Franciska Grajcarekec (95)
Serbske młodźinske towarstwo Pawk
Chrystof Grofa (86)
Zwjazk serbskich spěwarskich towarstwow
Beno Bělk (92)
Zwjazk serbskich wuměłcow
Jan Bělk (88)
Zwjazk serbskich rjemjeslnikow a předewzaćelow
Bjarnat Cyž (84)
Spěchowanski kruh za serbsku ludowu kulturu
Měrćin Brycka (85)
Wobzamknjenja
20. hłowna zhromadźizna je slědowace wobzamknjenja schwaliła:
1. Domowina sćěhuje a podpěra koncept serbskeho šulskeho zwjazka. Serbski šulski zwjazk wopřijima městne šule přesahowace projekty mjez šulemi po cyłej Łužicy. Wone słuža spěchowanju nałožowanja serbskeje rěče a wuwiwanju noweho narodneho wědomja.
2. Hłowna zhromadźizna je sebi přezjedna, zo ranjenja, hanjenja a přisłodźenja, z kotrymiž zjednoćenstwo „Serbski sejm“ přećiwo Domowinje jedna, wuměnu a zhromadne prócowanja wo serbske zaměry znjemóžnjeja. Pod tajkimi wuměnjenjemi njewidźi Domowina žadyn zakład za dowěrliwe dźěło.
3. Domowina prócuje so hromadźe z Krajom Braniborskej wo wobstajny a běžny dialog k trěbnym krokam za wožiwjenje delnjoserbskeje rěče. (Tekst pod dypkom 3 bu delnjoserbsce zapodaty.)
K zwjazkej serbskich šulow snadź z kubłanskej awtonomiju
Z diskusije na 20. hłownej zhromadźiznje Domowiny w Slepom
Lěpši zazběh njemóhli sej organizatorojo 20. hłowneje zhromadźizny Domowiny přeć hač postrow Wolfganga Goldsteina, bywšeho wjelelětneho nawody wyšeje šule Slepo a tamnišeho wjesneho předstejićela. W mjenje wjesnjanosty Jörga Fundy (CDU) je wón delegatow witał, wuwědomjejo jim zdobom wažny podźěl Domowiny při nastaću Němsko-serbskeho šulskeho kompleksa, w kotrehož sportowni so schadźowachu.
