Bórze tež w jendźelskej rěči
Njebjelčicy (SN). Serbski sejm chce mjezynarodne zaznawanje serbskeho ludu jako awtochtonu etniju ze samostatnymi prawami skrućeć. Tohodla ma internetna prezentacija bórze tež w jendźelskej rěči přistupna być. Wo tym informuje cyłk po swojim minjenu sobotu online přewjedźenym prěnim posedźenju lěta 2022. Sejmarki a sejmarjo su zdobom wutworjenje mjezynarodnje wobsadźeneje wědomostneje přirady připowědźili, za kotruž móžachu po swójskich słowach „hižo wulce wuznamnych kandidatow“ zdobyć.
Spočatk noweho lěta je sejm z rezoluciju za měr, dowěru a zhromadnosć w našej towaršnosći poziciju zabrał, zo by znamjo přećiwo polarizaciji, wotpohladnemu pačenju a difuznym stracham sadźił, kaž w nowinskej zdźělence rěka. Wobsahowe nadrobnosće woneje rezolucije pak njejsu mjenowane.
We wotstupje Marka Sucheho jako předsydy serbskeje rady Sakskeje widźi sejm wobkrućenje nuzneje potrjeby politiskich reformow a ma gremij w jeho tuchwilnym konstrukće za „strukturelnje politisce bjezzubny“.
Serbsku mytologiju sej za temu póstnic wuzwolili
Lipsk (SN/JBo). Studenća Lipšćanskeje Sorabije hotuja so na wuhotowanje kóždolětneho póstniskeho programa. Tón budźe so koronapandemije dla, kaž hižo loni, 12. februara w digitalnej formje wotměć.
Na jolce změja překwapjenki
Nuknica (SN/MWj). Wjacore překwapjenki čakaja na wopytowarjow lětušeho jolka-swjedźenja 15. januara. Tón njewotměje so na zwučene wašnje w Nuknicy, ale wirtuelnje pod adresu . Tam změja přihotowanu wirtuelnu žurlu, na kotruž změja zajimcy z maksimalnje 300 ličakami přistup, zdźěli techniski nawoda Michał Cyž. Jednotliwe přinoški wusyłaja z Nukničanskeje baraki. Započatk budźe po Chróšćanskich wječornych kemšach. Štóž ma rjanu ideju, móže program wot doma ze skečom, spěwom abo podobnym wobohaćić. W běhu programa a po nim zahudźi kapała live-hudźbu. Jedyn z wjerškow budźe wjeta, w kotrejž serbscy wohnjowi wobornicy wažnu rólu hraja. Woni měli sej tón wječor swobodny dźeržeć.
Swinjorězanje lětsa tohorunja budźe. Wudźěłki budu sej zajimcy pola pjekarjow w Róžeńće, Chrósćicach a Worklecach skazać móc. Za to změja tam dobropisy přihotowane, kotrež hodźa so hač do štwórtka, 13. januara, kupić, infor- mowaše Michał „Černo“ Brězan z organizaciskeho teama. Sobotu dopołdnja přihotowane pakćiki pjekarnjam rozdźěla, a kupcy móža sej je tam wotewzać.
Kubłanje je ćežišćo skutkowanja
Nowojasčanka Monika Cyžowa wě, wo čim rěči, hdyž wo tym powěda, zo zhromadnosć paruje. A při tym njemysli jeničce na wobmjezowane zetkanja ze swójbnymi.
Nowa Jaseńca (SN/MiR). Přećelske styki z přiwuznymi a znatymi běchu před lětomaj a loni rědke. Jako předsydka Zwjazka serbskich rjemjeslnikow a předewzaćelow (ZSRP) dyrbješe Monika Cyžowa tójšto planowanych zetkanjow, zarjadowanjow a ekskursijow wotprajić. „Naše zarjadowanja njejsu ženje jenož zabawa. Chcemy našim čłonam tež wědu posrědkować a jich tak dale kubłać“, wona wuswětla. Tak su loni w awgusće pućowali. Za cil běchu sej wubrali Čornobóh. W Rachlowje zaběrachu so ze serbskim přirodowědnikom Korlu Bohuwěrom Šěcu. W Markersdorfje wopytachu muzej. W juniju su do Wochožanskeho parka błudźenkow a wokoło Bjerwałdskeho jězora kolesowali. W Klětnjanskej cyrkwi wotkrychu sej drohoćinki a wosebitosće.
Čińće dale tak!
„Njeńdźe wo hołdowanje rjekam“
Swoje dobre přeća k hodam a do noweho lěta 2022, kotrež steja lětsa druhi raz pod wliwom koronapandemije, zwjazuje předsyda Domowiny Dawid Statnik ze sadu „mamy sami w horšći, hač hišće pjata žołma přińdźe abo hač so bórze normalita wróći“. Postrow jako widejo namakaće pod .
Budyšin (SN/at). „Prěnje słowa maćerne serbske běchu, lubozne, nihdy njezacpěju je, serbsce rěču žiwe dny.“ Hrónčko Feliksa Hajny njepyši jenož hodowny postrow Domowiny w dźensnišim wudaću Serbskich Nowin, jeho słowa mamy do našeho časa přenjesć, podšmórnje předsyda Domowiny Dawid Statnik w swojich myslach k hodam. „Pytnjemy, zo sej dale a wjac staršich we Łužicy, kotřiž hižo abo hišće sami serbsce njerěča, za swoje dźěćo korjenje w serbskej identiće regiona přeje.“
Serbskosć jara podpěruje
Rakečance Uće Sykorinej je předsyda Domowiny Dawid Statnik spočatk oktobra w Budyskim Serbskim domje runja dalšich dźewjeć zasłužbnym Serbam za skutkowanje na dobro serbskeho ludu Čestne znamješko Domowiny spožčił.
Nadźija wostawa
Na jednej runinje mjez sobu wobchadźeć
Budyšin (SN/at). Marko Kowar, wot lěta 2017 jednaćel Domowiny, je so dźensa w Budyskim Serbskim domje ze zwjazkarjemi, kotřiž běchu jeho 35lětne skutkowanje mjez druhim w tehdyšim Domje za serbske ludowe wuměłstwo a pozdźišo w zarjedźe Domowiny přewodźeli, kaž tež ze sobudźěłaćerjemi zarjada na wuměnk rozžohnował. Z nim wotstupi čłowjek z prěnjeho rjadu serbskeje politiki, kiž je we łužiskej zjawnosći tójšto zahibał. Sam wšak tak rady w srjedźišću – tež medijoweho zajima – stał njeje. Sy-li pak so jako žurnalist so z nim rozmołwjał, sy jara dokładne informacije dóstał.
Studenća w małym kruhu adwentničku swjećili
Lipsk (SN/JBo). Po tym zo dyrbjachu čłonojo studentskeho towarstwa Sorabija w Lipsku loni swoju adwentničku digitalnje swjećić, móžachu so lětsa zaso, byrnjež jenož w mjeńšim kruhu, w towarstwowej rumnosći studentskeho domu „Centrifuze“ zetkać. Předsydstwo do toho prawidło 2G jako wuměnjenje za wopyt wčerawšeho wječora postajiło. Nimo toho móžachu studenća tež wot doma adwentničku internetnje sobu dožiwić.
