Swoju „hłownu“ online přewjedli
Čłonojo Drježdźanskeho towarstwa Stup dale su so na to dojednali, wšitke předwidźane zarjadowanja lětsa kaž tež klětu w januaru wobćeženja korony dla wotprajić: spěwanje na swj. Měrćina, pječenje poprjančkow w adwenće, koncert ze Serbskim muskim konsorcijom kaž tež ptači kwas.
Drježdźany (SN/MiR). Klětu nalěto nadźijeja so zaso na wosobinske zetkanja, mjez druhim na zhromadne nalětnje pućowanje. Swoju lětušu hłownu zhromadźiznu su wčera wječor online přewjedli. „Mam pospyt za přewšo poradźeny. Běše to prěni króć, zo smy tule wariantu mjezsobneje komunikacije nałožili“, předsydka towarstwa Jadwiga Pjacec rozprawja, „a mamy wotpohlad najpozdźišo w januaru so wospjet na te wašnje schadźować, njejsu-li hač do toho wobmjezowanja koronapandemije dla zběhnjene.“
Poručeja „hłownu“ wotměć
Budyšin (SN/at). Hłownje we wobłuku widejoweje konferency je so wčera prezidij Domowiny schadźował. Jenož předsyda Dawid Statnik, městopředsyda Marko Hančik a nawodnica RCW Beata Brězanowa běchu na wuradźowanju w Budyskim Serbskim domje. Gremij přestorči posedźenje zwjazkoweho předsydstwa nětčišeho połoženja koronapandemije dla wot 20. nowembra na pjatk, 11. decembra. Zdobom prezidij poruča hłownu zhromadźiznu na kóždy pad klětu 27. měrca w Slepom přewjesć, kaž z nowinskeje zdźělenki serbskeho třěšneho zwjazka wuchadźa. Je-li trjeba, měli ju w minimalnej wobsadce z něhdźe 50 delegatami na městnje, z móžnosću digitalneho sobudiskutowanja a z listowymi wólbami noweho wjednistwa Domowiny do toho, wotměć. Wo tym chcedźa so z čłonskimi towarstwami a ze zwjazkowym předsydstwom dorozumić.
Doskónčnje schwalili su wčera naćiskaj dźěłowych směrnicow 2021–2023 a hospodarskeho plana 2021 za dalšu diskusiju resp. za wobzamknjenje w zwjazkowym předsydstwje. Wo směrnicach rozsudźi hłowna zhromadźizna.
Na lisćinje Domowiny nastupił
Jeho prěnja lubosć bě přiroda. Tohodla je Juro Hanška ratarstwo studował. Hižo w młodych lětach angažowaše so wón w ródnych Janšojcach za hajenje delnjoserbskich nałožkow a je je wjele lět sobu organizował. Mjeztym bydli w Brjazynje, hdźež angažuje so w tamnišej Domowinskej skupinje, kotrejž bě tež dołhi čas předsydarił. Za jeho čestnohamtske prócowanja spožčichu jemu minjeny měsac w Budyskim Serbskim domje Čestne znamješko Domowiny.
Prěnja kantorka była
Dźěło z dźěćimi so jej přewšo lubi. Njezadźiwa tuž, zo je so Silvia Stephanowa na pěstowarku wukubłać dała. 1974 rodźena kubłarka hlada mjeztym wjacore lěta dźěći Witaj-skupiny w Čornym Chołmcu. Sylnje zasadźa so wona tam za zachowanje a hajenje serbskich, nabožnych a wjesnych tradicijow. Za jeje čestnohamtski angažement spožčichu jej spočatk měsaca Čestne znamješko Domowiny. Serbšćinu jej bohužel do kolebki połožili njejsu. Rěč pak bě a je jej nimoměry wažna. Jako dorosćena so tuž hišće raz za šulsku ławku sydny a serbsku rěč nawukny. Nětko wužiwa wona kóždu składnosć, zo by swoju mjeztym dobru serbšćinu dale wukmaniła a ju tohorunja młodej generaciji dale dała, rěka mjez druhim w hódnoćenju k mytowanju.
Bilanca trochu hinaša
Na Njepilic statoku lětsa žane zjawne zarjadowanja wjace njezměja
Rowno (JoS/SN). Za minjeny kónc tydźenja planowana kermuša na Rownjanskim Njepilic statoku bě za organizatorow dołho wulka nadźija, zo móža so swojim njeličomnym pomocnikam za jich aktiwne dźěło w běhu lěta dźakować. Potom pak dyrbješe so spěchowanske towarstwo z ćežkej wutrobu rozsudźić, woblubowany swjedźeń wěstotnych přičin dla wotprajić. A nic jenož to. Tež přazu lětsa žanu njezměja. „Z tym je naše lěto takrjec nimo“, předsyda towarstwa Manfred Nikel tónle rozsud komentuje.
Runa puć k serbskim zarjadowanjam
Časniki najwšelakorišeho razu a wulkosće jeho fascinuja. Tuž njezadźiwa, zo ma njeličomne doma, je předawa a tež reparuje. Je-li w Chrósćicach a wokolinje rěč wo „časnikarju“, móže jenož jedyn měnjeny być: Jürgen Njek. Jeho počesćichu spočatk měsaca za jeho wjelelětne mnohostronske čestnohamtske skutkowanje z Čestnym znamješkom Domowiny.
1947 w Dobrošicach rodźeny wotrosće Jürgen pola přirodneju staršeju Jurja Mencla a jeho mandźelskeje w Chrósćicach. Jurij Mencl bě časnikar a tak da so tež Jürgen w tymle rjemjesle wukubłać a je z lubosću a wjeselom wukonja. „Wot 1975, potajkim 45 lět, stara so wón čestnohamtsce wo časnik na wěži Chróšćanskeje cyrkwje, zmištruje trěbne reparatury a jón kóžde lěto wot zymskeho na lětni čas a nawopak přestaja“, rěka we wopodstatnjenju předsydstwa Kamjenskeje župy „Michał Hórnik“. Tež w nocy na wčerawšu njedźelu je tuž na wěžu zalězł a časnik wo hodźinu wróćo zwjertnył.
Pomha wědu wo drasće zachować
Jeje lubosć stej ručne dźěło a serbska narodna drasta, předewšěm ta Delnich Serbow. Wšako je so wona w Bórkowach narodźiła, tam wotrostła a je dźensa aktiwna čłonka tamnišeje Domowinskeje skupiny. Měnjena je Christa Dziumblina, kotraž tohorunja w Bórkowskim domizniskim a drastowym towarstwje dźěła. Za jeje angažement su ju lětsa z Čestnym znamješkom Domowiny wuznamjenili.
Čas žiwjenja je Christa Dziumblina z Bórkowami a tuž z Błótami zwjazana. Jeno za wukubłanje je domiznu wopušćiła a w Choćebuzu powołanje šwalče nawuknyła. Jako tajka je nimo dźěła jako hortnerka w Bórkowskej šuli dźěłała. „Wušiwała je wona stajnje rady. A tuž njezadźiwa, zo je mjez šulerkami a šulerjemi zajim zbudźiła, a zo chcychu woni bórze něšto serbskeho stworić. Zhromadnje z dźěćimi pytaše Christa tuž za starymi přikładami a originalnymi předłohami dźělow narodneje drasty. Tak nasta poněčim kružk wušiwanja drastowych dźělow“, rěka w hódnoćenju za počesćenje.
Poł lětstotka na dobro serbstwa
Dlěje hač poł lětstotka je wona čłonka Domowiny a je so we wjacorych jeje skupinach na dobro serbskeho ludu angažowała a to přeco hišće čini. Jako po politiskim přewróće w Lejnje Domowinska skupina dźěłać přesta, je so wona jako jenička tej w Pančicach-Kukowje přidružiła. Měnjena je Marka Cyžowa, kotruž počesći předsyda Domowiny Dawid Statnik njedawno z čestnym znamješkom.
Nimo skutkowanja w Domowinje, hdźež je wona wot 2017 čłonka zwjazkoweho předsydstwa a nawjeduje tam wuběrk za zjawnostne a lobbyjowe dźěło. Zdobom Lejnjanka w Towarstwje Cyrila a Metoda a w Maćicy Serbskej sobu skutkuje. Lěta 1964 je jako šulerka Małowjelkowskeje rozšěrjeneje wyšeje šule do Domowiny zastupiła a njepřestajnje za třěšny zwjazk skutkowała, mjez druhim jako čłonka předsydstwa Serbskeho pioněrskeho dźiwadła LND a jako čłonka přirady Domu za serbske ludowe wuměłstwo.
Nowa społnomócnjena za serbske naležnosće Budyskeho wokrjesa ...
„Optimizm najebać dosć poražkow njepowalny“
Předsyda Domowiny Dawid Statnik štyrnaće zasłužbnych Serbow za skutkowanje na dobro serbskeho ludu mytował
„Zawěsće je so kóždy z nas dźiwał, zo bu runje nětko za mytowanje wuzwoleny. Ćim zbožowniši so tež ja čuju.“ Tole zwurazni lawreat lětušeho Myta Domowiny Jurij Šołta hnydom na spočatku dźaknych słowow, kotrež wón w mjenje wšitkich mytowanych na wuznamjenjenskej swjatočnosći minjeny pjatk na žurli Budyskeho Serbskeho domu přednjese. Tam je předsyda Domowiny třoch zasłužbnych Serbow z Mytom Domowiny wuznamjenił, dalšeho młodostneho z Mytom Domowiny za dorost a cyłkownje dźesać wosobow z Hornjeje a Delnjeje Łužicy z Čestnym znamješkom třěšneho zwjazka za čestnohamtsce skutkowanje w serbskich towarstwach a zwjazkach na bazy.
Maćeršćiny so njehańbować
