Dlěje hač poł lětstotka w słužbje za serbski lud
W Kanecach swjeći dźensa Trudla Kuringowa wosomdźesaćiny. Njeličomne lětdźesatki je 28. januara 1940 do serbskeje swójby narodźena hižo ze serbskim třěšnym zwjazkom Domowinu zwjazana.
Po šuli we Wotrowje a w susodnych Pančicach kaž tež po wopyće wyšeje šule w Budyšinje nawukny wona najprjedy powołanje tekstilneje chemikarki a wukonješe po wukubłanju swoje powołanje w Limbachu-Oberfrohnje. Žadosć, so z wučerku stać pak běše tak sylna, zo so po dwěmaj lětomaj do Łužicy wróći, zo by na Budyskim Pedagogiskim instituće serbšćinu a němčinu studowała. Wot 1968 do 1991 běše wona wučerka w Pančicach-Kukowje. W mjezyčasu złoži dalokostudij za chemiju. Dalši puć wjedźeše ju hač do lěta 2000 na Budyski Serbski gymnazij.
Morawa wosrjedź Hórkow
Spěwny wječor zarjadowarjam kaž wopytowarjam wulke dožiwjenje był
Hórki (SN/BŠe). Poprawom leži kónčina Morawa na juhu Čěskeje něhdźe 480 kilometrow (pjeć hodźinow) wot Hórkow zdalena. Minjenu sobotu pak bě wona dožiwjomna wosrjedź Łužicy, a to na Smolic statoku w Hórkach. Čłonstwo za integraciju ludoweje akordeonoweje kultury (ČILAK) bě sej mjenujcy swój són wo wosebitym spěwnym wječoru z čěskej cymbalowej hudźbu dźakowano sakskemu spěchowanskemu fondsej „Čiń sobu!“ zwoprawdźiło. Přeprosyło je sej ćěleso Cimbálová muzika Stupava z Dolnich Bojanovic, kotrež spěwaše a hudźeše na cymbalu, huslach, kontrabasu a klarineće. A dokelž je mjez Serbami nadosć lubowarjow morawskich štučkow, njespěwachu jeno Češa, ale tež wopytowarjo sobotneho wječora. Nimo toho zanošowachu woni z wulkej zahoritosću zhromadnje znate serbske pěsnje, a to na wjacorych swójskich instrumentach, štož wulkotnu naladu dale a bóle přisporješe.
Zo móžeće terminy lěpje planować
Nowe Slepjanske spěwarske
Slepo (AK/SN). Towarstwo Kólesko rozestaja so dale zaměrnje ze zachowanjom a hajenjom slepjanšćiny. Za to steja tež ewangelske spěwarske „Něnter comy Boga chwalić“. „Je to přinošk k sylnjenju korjenjow a serbskeje identity. Zdobom móžemy z nimi tradiciju jutrowneho spěwanja dale wjesć“, podšmórny fararka Jadwiga Malinkowa na sobotnym předstajenju spěwarskich w Slepom.
Z Drježdźan dotal žana wotmołwa
Kak dale ze Serbskim superintendentom a kak dale z wosadnym dźěłom? Na wobě prašeni pytachu na hłownej zhromadźiznje Serbskeho wosadneho zwjazka (SWZ) sobotu na Budyskej Michałskej farje za wotmołwami.
Budyšin (SN/at). Nastupajo naslědnika Jana Malinka jako Serbskeho superintendenta je so SWZ z listom přez Budyskeho superintendenta Tilmanna Poppa na krajnocyrkwinski zarjad Ewangelsko-lutherskeje krajneje cyrkwje Sakskeje wobroćił. Na te wašnje je zaručene, zo je tež Popp wo serbskej personalnej předstawje informowany. Za zastojnstwo namjetowachu Hodźijskeho fararja Christopha Rummela.
Prezenca a prewencija wažnej
Wojerowske župne předsydstwo sej wobydlerskeho policista přeprosyło
Wojerecy (JK/SN). Wot lońšeho junija je 42lětny André Kober ze Sernjan wobydlerski policist we Wojerecach. Do toho bě hač do lěta 2015 na Kamjenskim policajskim rewěrje słužbu wukonjał. Jako loni we Wojerecach dalšeho wobydlerskeho policista pytachu, wón dołho njewahaše a so wo městno požada. Nětko stara so wo porjad a wěstotu wosebje w Hórnikecach a Ćisku, ale je runje tak we Wojerecach po puću. Při tym tójšto dožiwja a za swoju słužbu wjele nazhonjenjow zběra. Wo tych je so wčera wječor z čłonami předsydstwa župy „Handrij Zejler“ w Domowinskim domje rozmołwjał.
Prěni w diplomatiskej słužbje skutkowacy Serb był
Na dnju swojich 94. narodnin zemrě wučer, aktiwist Domowinskeho dźěła a prěni po wójnje w diplomatiskej słužbje skutkowacy Serb Měrćin Kaltšmit. Narodźił bě so wón 22. decembra 1925 jako syn dźěłaćerja do jednoreje swójby w Brězynce. Staršej měještaj třoch hólcow na puć do žiwjenja přihotować. Měrćin nawukny powołanje techniskeho rysowarja.
Dalše biografiske daty rěča wo njewšědnym žiwjenju: 1943 dyrbješe młody muž do němskeho wójska, lěto pozdźišo zawlečechu jeho jako wójnskeho jateho do ameriskeje jatby, do Texasa. Jako zrały muž wopyta połsta lět pozdźišo trójce wony zwjazkowy stat USA. A njebě tam jenož na slědach rubjeneje młodosće, ale tež na slědach swojich prjedownikow-wupućowarjow. Jako jaty bě tam jendźelšćinu nawuknył, štož so pozdźišo doma jako wulka duchowna dobrota wopokaza.
Wažne žórło za slědźenje
Němski přełožk Arnošta Mukoweje „Statistiki łužiskich Serbow“ steješe njedawno w srjedźišću zajimaweho wječora we Łazowskim Domje Zejlerja a Smolerja. Přełožer a wudawaćel Robert Lorenc je tam knihu wjace hač třiceći wopytowarjam předstajił.
Łaz (AK/SN). Za slědźenje wo serbskich stawiznach ma Mukowa „Statistika łužiskich Serbow“ wulki wuznam. To wuwědomichu sej wobdźělnicy čitanskeho wječora, jako rozłoži jim Robert Lorenc statistiku, kotruž bě přełožił. „Wažne je, zo maja wšitcy zajimcy, kotřiž tu bydla, přistup k serbskej wědźe. Tale kniha měła dźěl teje wědy być“, rjekny Robert Lorenc na naprašowanje předsydy Towarstwa za hajenje regionalneje kultury srjedźneje Łužicy Wernera Bejmy, čehodla je knihu wudał. Wona móhła při pytanju za serbskimi korjenjemi pozbudźeć a nastupajo mjena wsow a swójbow wažne pokiwy dawać. Chronisća a domizniscy slědźerjo móža z njej runje tak dźěłać kaž studenća a šulerjo.
Někotři samo dowol brali
Swinjorězanje na Rownjanskim Njepilic statoku je jedyn z wažnych terminow tamnišeho spěchowanskeho towarstwa Njepilic dwór. Mnozy ludźo na tónle dźeń runjewon čakaja.
Rowno (JoS/SN). Nawal zajimcow na swinjorězanje minjenu sobotu w Rownom bě znowa wulki, a prěni kupcy su so hižo dołho do předanje nastupili. To swědči wo dobrym mjenje Njepilic statoka a wo słódnych wudźěłkach, kotrež tam zhotowjeja.
Jako běchu so ludźo z nakupjenymi dobrotami zaso domoj podali abo sej na městnje to abo tamne słodźeć dali, ležeše za čłonami spěchowanskeho towarstwa tydźeń połny dźěła, kotryž často dlěje hač wosom hodźin wob dźeń traješe. Za wosebje zwjeselace předsyda Rownjanskeho towarstwa Manfred Nikel ma, zo někotři čłonojo samo dźěl swojeho lětneho dowola wopruja, zo móhli při přihotach na swinjorězanje pomhać.
