Rěčny kurs chcedźa wožiwić
Towarstwo Njepilic dwór pyta dorost, zo móhło so womłodźić
Rowno (AK/SN). 3 900 wopytowarjow su loni na Rownjanskim Njepilic statoku witali. „To bě tójšto wjace hač lěto do toho“, podšmórny předsyda towarstwa Njepilic dwór Manfred Nikel na hłownej zhromadźiznje minjeny pjatk. W běhu lěta přewjedźechu 83 zarjadowanjow a 27 wodźenjow. Kaž Nikel rjekny, bě to dotal najintensiwniše lěto towarstwa.
„Bohužel njeje so nam poradźiło serbskorěčny kurs wožiwić. Tónle nadawk pak z wočow njezhubimy“, praji předsyda, přetož statok je přez serbšćinu žiwy. Dalši nuzny nadawk je za dorostom pytać, zo móhli towarstwo womłodźić. Tuchwilu přisłuša jemu 41 čłonow, kotřiž wukonjachu loni cyłkownje 7 000 dźěłowych hodźin na statoku.
Žadaja sej wuwzaćne rjadowanje
Židźino (SN/JaW). Hnydom dwěmaj aktualnymaj temomaj je so Zwjazkowe předsydstwo Domowiny minjeny pjatk na Židźinskej starej šuli wěnowało. Byrnjež wjetšina čłonow chorosće dla zamołwjena była – jenož 12 z cyłkownje 28 čłonow bě přitomnych – a zwjazkowe předsydstwo wobzamknjenjakmane njebyło, su wuradźowanje přewjedli.
Jasnje wupraji so gremij nastupajo wutworjenje rjadownjow 5. lětnika na serbskich wyšich šulach. Jan Nuk bě temu namjetował. Wšako bě w minjenych měsacach tójšto wo tym słyšeć, zo móhło so stać, zo dyrbi Ralbičanska šula dźěći wotpokazać. Tohodla sej zwjazkowe předsydstwo zasadnje žada, kóždemu dźěsću zmóžnić tam do šule chodźić, hdźež staj je staršej přizjewiłoj. Kaž předsyda Domowiny Dawid Statnik zwurazni, je zaměr „w Ralbicach kaž druhdźe w Serbach škitać socialne rumy šulerjow“. Domowina sej tuž žada, wuwzaćnje zarjadować dalšu rjadownju w přichodnym 5. lětniku Ralbičanskeje wyšeje šule, štož bě jasny signal gremija zjawnosći. Zdobom přilubichu staršim pomoc. „Smy jim na wšitkich stejnišćach poboku, hdyž podpěru trjebaja“, Statnik podšmórny.
Dźěło bilancowali
Budyšin (LTh/SN). „Měšćanska Domowinska skupina 3 je jedna z najaktiwnišich skupin Budyskeje župy „Jan Arnošt Smoler‘.“ To rjekny čłonka župneho předsydstwa Leńka Thomasowa na hłownej zhromadźiznje skupiny předwčerawšim w Budyskim hosćencu „Lusatia“ a dźakowaše so zdobom wjelelětnemu předsydźe cyłka Měrćinej Wornarjej za swěrne a spušćomne dźěło. W swojej rozprawje bilancowaše wón pilne a wobšěrne dźěło skupiny 3.
Tež za lěto 2020 su sej skupinarjo tójšto předewzali. Na přikład chcedźa sej ródnu wjes bywšeho čłona Jurja Krawže Žuricy zbližić a sej dźěło tam bydlaceho rězbarja spřistupnić. Dale wobhladaja sej wobrazowy přednošk čłona Hinca Cuški wo wšitkich sydom festiwalach serbskeje kultury. Nimo toho wobdźěla so na centralnych zarjadowanjach Budyskeje župy a třěšneho zwjazka, mjez druhim na dnju wotewrjenych duri w Domje Měrćina Nowaka-Njechorńskeho.
Dwurěčnosć je naš kapital
Kowar: Łužica je wjele wjac hač jenož trochu Braniborskeje a Sakskeje
Budyšin (SN/JaW). Domowina chce „serbski kapital“ wjacerěčnosće jako „klučowu kompetencu“ w zakładnym wusměrjenju Łužicy zakótwić. To zdźěli wčera nowinski rěčnik třěšneho zwjazka Marcel Brauman. Pozadk prócowanja je wočakowany zakoń wo sylnjenju struktury. Z nim chcedźa nimo naprawow Zwjazka w hódnoće něhdźe 26 miliardow eurow tohorunja wodźene naprawy w zamołwitosći krajow k nałoženju něhdźe 14 miliardow eurow zwoprawdźić. Łužiskemu rewěrej chcedźa lětnje 200 milionow eurow z toho přewostajić. Zakład ma być wuwićowa strategija, kotruž Hospodarski region Łužica (WiL) z přichodowej dźěłarničku Łužica zdźěłuje. Na dźěłarničce wobdźělena je tohorunja Domowina jako čłon jeje wodźenskeho wuběrka.
Planuja hižo za dalšu, jubilejnu inscenaciju
Konjecy/Šunow (SN/bn). Lajska dźiwadłowa skupina Šunow-Konjecy je swoju inscenaciju „Ludźo, njedźiwajće so“ 16. februara w Lejnje posledni raz předstajiła. Cyłkownje su produkciju dźesać króć ducy po Hornjej Łužicy pokazali a dohromady wjace hač 1 000 wopytowarjow zličili. „To je drje trochu mjenje přihladowarjow, hač smy w minjenych lětach přiwabili, wotpowěduje pak někak našemu přerězkej. Poskitk zarjadowanjow we Łužicy je rozrostł, štož je powšitkownje mjenje publikuma wuskutkowało. Přiwšěm smy spokojom a wjeselimy so jara, zo je so nam poradźiło přihladowarstwo přeswědčić. Wothłós bě wšudźe, hdźež smy hrali, jara dobry“, bilancuje předsyda lajskeje skupiny Daniel Wjenk.
Wjeselo w maćeršćinje
Skutkowanje motiwatora dobre płody žněje
Malešecy (kl/SN). Motiwator w Malešanskej kónčinje wukonja płódne dźěło. To zwurazni regionalna rěčnica Domowiny za Budysku župu Katja Liznarjec. Malešansku Domowinsku skupinu móžachu samo womłodźić. Pjeć nowych čłonow je předsyda tamnišeje Domowinskeje skupiny Klaws Petrenc na wčerawšej hłownej zhromadźiznje w Malešecach witał.
Womłodźenje ma Petrenc předewšěm za wuslědk aktiwitow minjenych měsacow. Ze skutkowanjom motiwatora Luciana Kaulfürsta je so poradźiło syć wutworić, ludźi hromadu wjesć a jich znowa za serbske naležnosće zajimować. Nimo kinoweho wječora za dźěći, kofeja a bjesady za seniorow mějachu tež nazymski koncert na programje. Dalši konkretny wuslědk z prócowanja w zańdźenych měsacach je, zo přewozmje Załožba za serbski lud nazymski koncert do swojeho rjadu nazymskich koncertow a wuhotuje w nowembrje znowa tajki w Malešanskim hosćencu „Wódny muž“.
Pilna pčołka na polu slědźenja a medijow
Wjacore knihi je wona wo swojich slědźenjach wudała a slědźi dale za historiskimi nowosćemi a tym, štož je w Serbach skerje mjenje znate. Rěč je wo Trudli Malinkowej, kotraž swjeći dźensa w Budyšinje pjećašěsćdźesaćiny.
21. februara 1955 narodźi so wona Grofic swójbje w Chasowje. Po šulskim wukubłanju – 1973 bě wona na Serbskej rozšěrjenej wyšej šuli maturu złožiła – da so najprjedy na nakładnisku knihikupču wukubłać. Hakle po tym nastupi na Lipšćanskej uniwersiće studij zubneje mediciny a skutkowaše po jeho wuspěšnym zakónčenju jako zubna lěkarka w sprjewinym měsće.
