Předsydstwo dale womłodźene

štwórtk, 07. meje 2015 spisane wot:

Kozarcy (jh/SN). Milan Funka je nowy starosta Serbskeho Sokoła, třěšneho zwjazka serbskich sportowčow a sportowcow. Budyšan přewza wčera na hłownej a wólbnej zhromadźiznje w Ko­zar­cach zastojnstwo wot Miłočana Achima Kowarja. Wón bě 22 lět čłon před­sydstwa Serbskeho Sokoła a wjacore lěta jeho staro­sta.

Nowy zastupjer Milana Funki je Tomaš Šołta z Róžanta. 37lětny naslěduje Chróšćana Jana Macku. Kowar kaž tež Macka njeběštaj za zastojnstwo w předsydstwje hižo kandidowałoj, dokelž bě načasu zamołwitosć młódšim čłonam přewostajić. Po wólbach w lěće 2011, jako přepodaštaj Pětr Šołta-Hórčanski a Mikławš Krawc funkciju jednaćela Tomašej Suchemu a rěčnika Janej Hrjeho­rjej, běchu wčerawše wólby dalša kročel we womło­dźenskim procesu třěšneho zwjazka. Nowemu předsydstwu přisłu­šeja wot wčerawšeho starosta Milan Funka, městostarosta Tomaš Šołta, jednaćel Tomaš­ Suchy, pokładnica Gabi Šołćina a rěčnik Jan Hrjehor. Józefa Šwona powołachu jako čłona bjez funkcije do předsydstwa. Wólby běchu jednohłósne.

10. meje 1945 třěšny zwjazk serbskich towarstwow w Chrósćicach wozrodźili

Lětsa je tomu 70 lět, zo bu Domowina – Zwjazk Łužiskich Serbow – po za­kazu přez nacionalsocialistow w Chrósćicach znowa załožena. Zapo­čatki jeje wozrodźenja pak sahaja do časa, jako we Łužicy hišće Druha swětowa wójna howrješe. To zetkawaše so horstka Serbow, zo by­ znowazałoženje narodneje organizacije přihotowała.

Zakaz serbskeho žiwjenja

ZSW literarne styki do Katowic wožiwił

srjeda, 29. apryla 2015 spisane wot:

Budyšin (AW/SN). Nowa społnomócnjena za serbske naležnosće Budyskeho wokrjesa Regina Krawcowa je so wčera předsydstwu Zwjazka serbskich wuměłcow předstajiła. „Chcu so zeznajomić z dźěławosću serbskich institucijow a towarstwow, zo bych w swojim nowym skutkowanju přehlad měła a wotpowědnje tež reagować móhła“, woni zwurazni. Předsydstwo zwjazka wuměłcow wupřa jej wuspěch w skutkowanje na dobro zhromadnosće Serbow a Němcow w Budyskim wokrjesu.

Přiwzało je předsydstwo ZSW wčera próstwu zhromadneho kandidata Lěwicy, SPD a wobydlerskeho zwjazka za wólby Budyskeho wyšeho měšćanosty Alexandera Ahrensa wo rozmołwu. Tak chcedźa jeho a wšěch dalšich zajimcow kónc meje na zjawny forum do wile Buchheim na Budyskej Hrodowskej přeprosyć.

Zo bychu pčołki pilnje lětali

wutora, 28. apryla 2015 spisane wot:

Chrósćicy (SN/JK). Zhromadźizna Serbskeje pčólnicy motmě so minjeny pjatk w Chróšćanskim Krawčikec hosćencu. Předsyda Jan Wjesela bě z wobdźělenjom jara spokojom, hladajo tež na wobsah wječora. Serbscy pčołarjo běchu přez zymu škody­ poćerpjeli, z wulkeho dźěla varoa­-roztoča dla. Skótny lěkar dr. Frithjof Koithan je nětko wo chorosćach a škód­nikach pola pčołkow přednošował, roz­jimujo škitne naprawy a profylaksu. W přichodnych tydźenjach chce potrjechenych pčołarjow wopytać a so z nimi na městnje wo naprawach dorozumić.

Jan Wjesela witaše do towarstwa nowych čłonow, Handrija Brězana z Prawoćic Pětra Brězana ze Smječkec a Pětra Ćemjera z Worklec. Jich zajim za pčołarstwo dopokazuje, zo je Serbska pčólnica žiwe towarstwo z narodnym a ekologiskim zaměro­m. Wokomiknje su „sobudźěła­ćerki“ serbskich pčołarjow na sadowych kćenjach, rěpiku a robinijach po puću. Naslědnje­ budu to lipy a łučne kwěty. Někotři­ pčołarjo podadźa so ze swojimi pčołkami nazymu tež do hole, hdźež steja wrj­ós a dalše holanske rostliny.

Benediktej Dyrlichej zbožo přeli

wutora, 21. apryla 2015 spisane wot:
Wjelelětny šefredaktor Serbskich Nowin, basnik Benedikt Dyrlich, přija dźensa w Budyšinje k 65ćinam zbožopřeća mnohich serbskich a němskich gratulantow. Mjez nimi běchu předsyda Domowiny Dawid Statnik (naprawo), bywši kolegojo z redak­cije, z Němsko-Serbskeho ludoweho dźiwadła, ze Sakskeho krajneho sejma kaž tež zastupjerjo serbskich institucijow. Za čas swojeho šefredaktorstwa je jubilar naš wječornik politisce a wobsahowje profilował. Foto: SN/Maćij Bulank

Župje přistupili

štwórtk, 16. apryla 2015 spisane wot:

Chrósćicy (SN/JaW). Předsydstwo Kamjenskeje župy „Michał Hórnik“ je wčera nowe towarstwo přiwzało, lětsa załožene Hórčanske wjesne towarstwo Při skale. Kaž regionalna rěčnica Kamjen­skeje župy Katharina Jurkowa na naprašowanje zdźěli, ma towarstwo tuchwilu něhdźe 20 čłonow. „Domowinska sku­pina we wsy je wus­nyła, tak zrodźichmy mysl, wjesne towarstwo załožić a dźě­ławosć skupiny dale wjesć“, Katharina Jurkowa rozłoži.

Tuchwilu je młody cyłk, tež z třomi młodostnymi w předsydstwje, hišće we wu­tworjenskej fazy. Prěnje zarjado­wanje pak je z filmowym wječorkom w měrcu hižo přewjedło. „Na njón bě wjac hač 40 ludźi přišło, štož zwjesela“, praji Jur­kowa, kotraž je sobu w předsyd­stwje towarstwa. Pod nawodom předsydki Marlies Młynkoweje hotuja so hižo na dalše zarjadowanje 28. apryla. W 19.30 hodź. přednošuje w Młynkec hosćencu zubna lěkarka Leńka Andersowa wo přebytku w Mongolskej. Kamjenskej župje přistupiło je towarstwo, dokelž ma ze zachowanjom serbskosće samsny zaměr. Zdobom nadźija so pomocy župy.

Lisćina kandidatow dospołna

wutora, 14. apryla 2015 spisane wot:

Choćebuz (HA/SN). Lisćina kandidatow za wólby Rady za serbske naležnosće Braniborskeje 31. meje je dospołna. Kaž wólbny wuběrk wčera wozjewi, nastupi tuž cyłkownje wosom kandidatow.

Nowi kandidaća su wučerjej Delnjoserbskeho gymnazija Choćebuz Torsten Mak a Angela Šurmanowa, kotrejuž je drastowe towarstwo Pśěza ze Žylowa namjetowało, a wjelelětny čłon a předsyda sejmika wokrjesa Sprjewja-Nysa a čłon tamnišeho serbskeho wuběrka dr. Michał Hajdan, namjetowany wot spěchowanskeho towarstwa Serbska tkalčernja Drjowk.

Hižo minjeny štwórtk nominowaše župne předsydstwo swojich kandidatow, kotrychž běchu Domowinske skupiny, přisłušace župje Delnja Łužica, a zapisane delnjoserbske towarstwa a zjednoćenstwa namjetowali (SN rozprawjachu).

Wólbny wuběrk zdobom zdźěli, zo je so dotal něhdźe 600 Serbow ze wšeje Braniborskeje zapisać dało do wólbneho registra, kotryž je trěbny za listowe wólby. Hač do 24. meje je za to hišće chwile. Wuběrk liči z tym, zo so nětko, hdyž su kan­didaća jasni a znaći, dalši wolerjo na wólbach wobdźěla.

Choćebuz (HA/SN). W Domowinskich skupinach a gremijach župy Delnja Łužica běchu minjene tydźenje pjeć kandi­da­tow za nowu Radu za serbske nalež­no­sće Braniborskeje namjetowali. Župne předsydstwo je jich na wčerawšim posedźenju w Choćebuzu wobkrućiło. Do toho so woni předstajichu a podachu ćežišća dźěła, budu-li wuzwoleni. Su to zastupowacy jednaćel Domowiny Marcus Kóńcaŕ, społnomócnjeny za serbske prašenja wokrjesa Dubja-Błóta Dieter Freihof, čłon prezidija Zwjazkoweho předsydstwa Domowiny William Janhoefer, regionalna rěčnica Domowiny Uta Henšelowa a młodźinski koordinator Helmut Matik.

13. apryla zakónči so wažna etapa w přihotach wólbow noweje braniborskeje serbskeje rady, kotrež budu 31. meje. Kóždy w Kraju Braniborskej bydlacy Serb móže sobu wolić. Hač do póndźele móža w susodnym kraju zapisane serbske towarstwa a zjednoćenstwa kandi­datow namjetować a mjena wólbnemu wuběrkej zapodać.

Předsydstwo skonstituowane

štwórtk, 09. apryla 2015 spisane wot:

Hłownej zhromadźiznje stej nimo. Nastork­ župneje „hłowneje“ w Budy­šinje tworješe zakład wobzamknjenja na „hłownej“ w Haslowje tydźenjej po tym­. Nětko słuša wša kedźbnosć zaso nadawkam župneho dźěłoweho plana.

Budyšin (kl/SN). Nowe předsydstwo župy „Jan Arnošt Smoler“ je so na swojim wčerawšim posedźenju w Budyskim Serbskim domje skonstituowało. Gremijej přisłuša sydom wosobow.

Na prěnim wuradźowanju w nowej zesta­wje wuhódnoćichu swoju župnu hłownu w Budyšinje kaž tež hłownu zhromadźiznu Domowiny w Haslowje. Wot Budyskeje župy iniciěrowanemu wobzamknjenju za pawšalne spěchowanje župow běštej so Kamjenska a Wojerowska přizamknyłoj. Zhromadne stejišćo su tak na hłownej zhromadźiznje třěšneho zwjazka přednjesli, a delegaća je wobzamknychu. Žadanje wo pawšalne spěchowanje župow po­srědkowachu po tym čłonam rady Załožby za serbski lud.

Angažowana rěčna asistentka chóra

srjeda, 08. apryla 2015 spisane wot:

Jako delegatka Towarstwa k spěchowanju serbskeho kulturneho centruma w Berlinje je so Katrin Urbanscyna na njedawnej hłownej zhromadźiznje Domowiny wobdźěliła. Tónle mandat je 55lětna Berlinjanka rady sćěhowała, přetož angažement za serbsku kulturu jeje žiwjenje mjeztym bytostnje postaja. Prawidłownje wobdźěla so wona tež za Serbskim blidom w stolicy Němskeje, jako Delnjoserbowka. Powołanje wučerki za jendźelšćinu, němčinu a předstajace hraće njesmě absolwentka Choćebuskeje Serbskeje rozšěrjeneje wyšeje šule, dźensnišeho Delnjoserbskeho gymnazija, a bywša wukonowa sportowča strowotnych přičin dla bohužel hižo wukonjeć.

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND