Zajimcam klětu dalše poskitki towarstwa Škit
Hrubjelčicy (scu/SN). Na prěnju hłownu zhromadźiznu jako zapisane towarstwo zetkachu so čłonojo Škit z.t. póndźelu do patoržicy w Hrubjelčicach. Předsyda towarstwa Robert Krawc je pozitiwnje na dźěławosć cyłka w lěće 2019 zhladował. Serbskorěčne podawki w Budyšinje organizować a přewjesć steješe wosebje w srjedźišću. Tak wotměchu serbski kulturny wječork na Byrgarskej zahrodźe Serbskeho ludoweho ansambla składnostnje staroměšćanskeho festiwala. Dale wuhotowachu poslednju staciju bičwolejbuloweje tury Radija Satkule w Sprjewinej kupjeli. Finalny turněr w Miłoćicach dobychu čłonojo wolejbuloweho wotrjada Škita po 2016 druhi raz. Škit wobhospodarješe zahrodu w starym měsće, kotruž chcedźa šulerjam we wobłuku cyłodnjowskeho poskitka wotewrić a jim serbske pomjenowanja rostlinow zbližić. W decembrje jimaše towarstwo mnohich ludźi ze serbsko-němskim adwentnym spěwanjom na hłownym torhošću. Čłonojo parowachu serbske poskitki na Wjacławskich wikach, tuž chcedźa nětko kóždolětnje na zhromadne spěwanje přeprosyć.
Gratulacija z třomi ćežišćemi
Budyšin (SN/at). Serbski třěšny zwjazk chce noweho knježerstwoweho społnomócnjeneho za naležnosće Serbow w Braniborskej, statneho sekretara Tobiasa Dünowa (SPD), podpěrać, kaž z gratulaciskeho spisa předsydy Domowiny Dawida Statnika wuchadźa. Wón Dünowa zdobom přeproša, serbske zarjadnišća we Łužicy wopytać a so z nimi a jich akterami zeznajomić.
Tři aktualne wužadanja formuluje Statnik za zhromadne dźěło z nowym społnomócnjenym a z Braniborskej. Wuchadźišćo za to, rosćacy wobjim nadawkow na polu rěčneho spěchowanja tež zmištrować, je dołhodobny a spušćomny financny zakład. „Koaliciske zrěčenje z předwidźanym zwyšenjom přiražkow Załožbje za serbski lud běži do praweho směra“, rěka w zdźělence Domowiny. W zwisku ze strukturnej změnu „skići so z našeho wida historiska šansa, z regionalnej kulturno-rěčnej nadhódnotu přidatnje identitu tworjacu perspektiwu za region wutworić“. Třeći dypk měri so na to, polěpšić wuměnjenja w kubłanskim wobłuku, štož mjenuje Statnik „wažnu potrěbnosć Serbow“.
Župa z nowymi mjezwočemi
Nowa Wjeska (ddy/SN). Předsydstwo župy „Jan Skala“ – Zwjazka serbskich studowacych je so sobotu w Nowej Wjesce zešło, zo by na aktiwity w nachilacym so lěće zhladowało a wažny rozsud na čole swojeho cyłka rozjimało. W srjedźišću steješe přichod zwjazka.
Dotalny župan Damian Dyrlich, kiž mjeztym jako wučer dźěła, je swoje nadawki młódšimaj přepodał. Wotnětka starataj so Fabian Hejduška a Matej Mark zhromadnje wo naležnosće župana. Změniło je so tež nawodnistwo studentskeho chóra. Symana Hejdušku naslědujetaj Michał Donat a Thea Čórlichec, kotrajž mataj nětko zamołwitosć za tele ćěleso. Dyrlich kaž Hejduška chcetaj swojich naslědnikow podpěrać a wjeselitaj so, zo je přichod z nowymi mjezwočemi w serbskim studentskim skutkowanju zaručeny. Studenća wuhódnoćichu tež lětušu schadźowanku. Tak móžachu zwěsćić, zo běše wona hižo wjele lěpje organizowana hač loni. Mjeńše njedostatki zamołwitym zapodadźa. Runje tak chcedźa so dale wo połne dźěłowe městno koordinatora za młodźinu pola Domowiny prócować.
Zamołwitosće sej dale wědomi
Smjerdźaca (aha/SN). Gabriel Krawc wostanje předsyda Smjerdźečanskeje rejwanskeje skupiny. Wjac hač 60 přitomnych čłonow je jemu na pjatkownej tradicionalnej adwentničce, kotraž bě zdobom hłowna a wólbna zhromadźizna, w Smjerdźečanskim kulturnym domje dowěru wuprajiło. Jeho zastupjer je Stefan Cuška, protokolantka a chronikarka je Antonija Wałdźina, zastojnstwo pokładnika wukonja Beno Jurk.
Hórčenjo rjane dohodowne dožiwjenje měli
Hórki (KJu/SN). Hižo štwórty króć bě Hórčanske wjesne towarstwo „Při skale“ wjesnjanow a hosći zbliska a zdaloka, wosebje swójby, na wčerawše adwentne wiki při a do gratownje wohnjoweje wobory witało. Wjac hač 150 ludźi přichwata a dožiwi rjane dohodowne popołdnjo w zhromadnosći. Dźěći zwjeselichu so nad wopytom rumpodicha. Kóždy z holcow a hólcow měješe składnosć, jemu baseń abo spěw přednjesć. Wopytowarjo zhromadnje tohorunja někotre hodowne pěsnje zaspěwachu. Po tym su dujerjo wokoło Hórčana Jurja Hejduški wšitkich zawjeselili.
Imiša w Hodźiju wopominali
Serbski sejm lěto skutkuje
Slepo (SN/at). W Slepom bě so Serbski sejm loni w nowembrje skonstituował, tam wotmě so minjenu sobotu tež jeho poslednje wuradźowanje prěnjeho dospołneho dźěłoweho lěta. Slepjanski wjesnjanosta Reinhard Bork (njestronjan) zhladowaše w swojich witanskich słowach zdobom na prócowanja, posrědkować dźěćom a młodostnym serbšćinu. Tak rozprawješe wo bytostnym wobjimje přez gmejnsku mjezu derje přiwzateho serbskorěčneho kubłanja na zakładźe projekta Witaj a koncepcije 2plus. K tomu přinošuje čestnohamtski a gmejnski angažement za šulerski transport, kotryž statna strona dosahajcy njezawěsća.
Kaž Serbski sejm w nowinskej zdźělence informuje, zhonichu přitomni dale wo žiwych serbskich towarstwowych aktiwitach w gmejnje. Na nje je wjesnjanosta Bork jara hordy.
„Jedne lěto Serbski sejm a přichod“ rěka hesło informaciskeho zarjadowanja štwórtk, 6. februara 2020, w Njebjelčicach. Zajimcy móža so tam wo skutkowanju sejma wobhonić a so k tomu wuprajić. Podobne zarjadowanje přihotuja za Delnju Łužicu, termin hišće wozjewja.
Hotuja so na cymbalowy wječor
Chrósćicy (SN/JaW). Čłonstwo za integraciju ludoweje akordeonoweje kultury (ČILAK) prócuje so hižo dlěši čas, přewjesć spěwny wječork z čěskimi hosćimi, a to z cymbalku z Morawy. Dźakowano Sakskemu fondsej „Čiń sobu!“, hdźež su młodostni cyłka próstwu wo spěchowanje swojeho předewzaća zapodali a přizwolenje spěchowanskich pjenjez za njón tež dóstali, budźe tajki wječor prawje bórze zwoprawdźeny, připowědźi čłon ČILAKow Syman Pöpel. Kaž wón zdźěli, su sej čłonojo skupiny hižo chětro hłójčku łamali a sej koncept zdźěłali, zo bychu sej són wo takrjec mjezynarodnym serbsko-čěskim spěwnym a hudźbnym wječorku spjelnili.
Z towarstwom wusko zwjazany
Rěčiš-li wo skutkowanju Kulturneho towarstwa Ćisk, je mjeno Hans Groba z nim wusko zwjazane. Wón bě 1997 jedyn ze załožerjow a předsydowaše cyłkej wot 2008 hač do lětušeho. „Spočatnje běchmy sedmjo. Dźensa ma naše towarstwo 90 čłonow“, wjeseli so angažowany Ćišćan nad wjesnjanami a runje tak nad sobustawami ze susodnych Wojerec. „Móhło nas samo 130 čłonow być, njeby-li so rejwanska skupina lěta 2008 zesamostatniła.“ Kulturnu wjesnu zhromadnosć spěchować je program, kaž hižo z mjena towarstwa wuchadźa. „Ćisk běše jónu serbska wjes. Hajimy tuž tradicionalnu kulturu, staramy so tuž wo to, serbsku kulturu zachować. Rěč chcemy runje tak sobu zapřijeć kaž modernu kulturu“, formuluje Groba narok na dźěławosć cyłka, kotryž so nětko z młodej předsydku na přichodne wužadanja měri.
