Wuměłstwowa kniha wušła
Drježdźany (SN). Spočatk julija je wušła zběrka „AUS DEM WORT“ z originalnymi rysowankami molerki Gerdy Lepke w křidowym ćišću a z 13 prěni raz wozjewjenymi basnjemi Róže Domašcyneje. Je to z ruku wjazana a ćišćana kniha. Jeje wotměry su 44 x 32 x 1 cm. Nakład wopřijima 20 čisłowanych eksemplarow – kóždy wot wuměłče a basnicy signowany. Je to štwórta wuměłstwowa kniha blisko Drježdźan bydlaceje molerki. Do toho bě wona hižo publikaciju hromadźe z awtoromaj Richardom Pietraßom a Ingom Schulzom wuhotowała.
W čisle II/2017 (čo. 84) literarneho časopisa „Ostragehege“, kotryž dwójce wob lěto w Drježdźanach wuchadźa, je zapřijate krótkopowědančko Jurja Chěžki „Rubježnik“ w němskorěčnym přełožku Róže Domašcyneje. Nimo toho su tam štyri teksty basnicy wozjewjene a recensija Petera Gehrischa wo zběrce Milana Hrabala „Eine schimmernde Wabe Glimmer“, dale tež recensija Patricka Wildena wo zběrce Róže Domašcyneje „Die dörfer unter wasser sind in deinem kopf beredt“.
Hosćo z Wendlanda we Łužicy přebywali
Budyšin/Chrósćicy (ML/SN). Wodźacy čłonojo Wendlandskeho přećelskeho a dźěłoweho kruha Lüchow-Dannenberg, kotřiž wudźeržuja dlěje hač 25 lět zwisk z Domowinu, přebywachu za čas XII. mjezynarodneho folklorneho festiwala we Łužicy. Woni chcedźa w blišim času swój kruh do towarstwa za zachowanje a spěchowanje tradicijow Hannoverskeho Wendlanda přetworić a Domowinje jako asociěrowany čłon přistupić.
Hosćo z wuchodneje Delnjeje Sakskeje dožiwichu mjez druhim programy w Hochozy, hdźež je so jim jara spodobało. Přewodźeni wot referenta Domowiny Wernera Sroki wopytachu woni tež Wochozy, tamnišu ewangelsku cyrkej z wopomnišćom za fararja Bogumiła Šwjelu kaž tež park błudźenkow. W Budyšinje su sej tež Serbski muzej wobhladali. Měrćin Brycka wodźeše jich po wustajeńcach. Wulke dožiwjenje hosćom bě sobotu wječor na Chróšćanskich statokach. Tam poskićene programy serbskich a wukrajnych ludowych wuměłcow jich wulce zahorichu. Wopyt Krabatoweho młyna w Čornym Chołmcu a čołmikowanje po Błótach jich přebytk we Łužicy skulojći.
Serbscy aktiwisća defensiwniši
Njedawno wotmě so mjezynarodne zetkanje Syće młodych akademikarjow- sorabistow w Budyskim Serbskim instituće. 21 referentow je tam wo swojich slědźenjach rozprawjało. Někotrych w małym serialu předstajimy.
Serbšćinu je młoda kulturna wědomostnica dr. Nicole Dołowy-Rybińska z Waršawy w Parisu nawuknyła. Hižo w doktorskim dźěle zaběraše so wona z tym, kak Serbja, Kašubojo a Bretonojo swoju rěč sylnja, kak spytaja ju rozšěrić a wožiwić. W swojej habilitaciji, kotraž je lětsa jako kniha w Pólskej wušła, je so Nicole Dołowy-Rybińska na młodych aktiwistow koncentrowała – hornjoserbskich, bretonskich, kašubskich a waliziskich. „Chcych wědźeć, kak a čehodla so woni za swoju rěč zasadźeja.“ Za to je dohromady sto rozmołwow wjedła a bě wězo tež wjacore razy we Łužicy.
Wo wuskutkach reformacije
Muzejownicy so zetkali
Knižka za dźěći
Wustajeńca z wobšěrnym serbskim podźělom
Pod hesłom „Na pytanju“ su sobotu w Biskopičanskej galeriji Carla Lohsy zajim zbudźacu wustajeńcu z twórbami grafikarja, typografa a molerja Joachima Bethmanna swjatočnje wotewrěli.
Biskopicy (AW/SN). Po wokřewjacym hudźbnym přewodźe gitaristow Michaela Othe a Inga Bochmanna a witanju čestnohamtskeho naměstnika Biskopičanskeho wyšeho měšćanosty Hansa-Jürgena Stöbera porěča mandźelska w lěće 2001 zemrěteho wuměłca Monika Bethmann k wjace hač połsta přitomnym wo jeho žiwjenju a skutkowanju.
Wo wažnej lisćinje, tradiciji a lóšće hromadźe swjećić
Chrósćicy (SN/CoR). Pod hesłom „Hdźež duša schow swój ma“ dožiwi publikum na XII. mjezynarodnym folklornym festiwalu „Łužica 2017“ tež druhi nakład imaterielnemu kulturnemu herbstwu wěnowaneho programa. Lochka bě atmosfera sobotu popołdnju na Koklic statoku, jako zahajištaj Tomasz Nawka a Steffen Kostorž na serbskich dudach hudźbne koło, kotrež madźarska skupina z Rumunskeje Szarkaláb na to z rejemi rozšěri. Tež cyłk Zespół Góralski Zornica z Pólskeje je rejujo přeswědčił – wosebje mužojo, kotřiž wědźachu swojej noze derje jako instrument zasadźeć. Tuž tež wulce njemyleše, zo jenički 2015 do lisćiny imaterielneho kulturneho herbstwa čłowjestwa přewzaty element kultury Tatrow – štyrihłósne dudy „koza tatrzańska“ – sobu njemějachu. Za to předstaji L’ubomír Tatarka lěta 2008 a 2015 zapisane fujaru a słowakske dudy. 13lětna spěwarka jeho skupiny Renáta Plevjaková wobkuzła publikum ze swojim krasnym hłosom.
