„Jenički Serb w polarnej kónčinje“ był
Mały Wjelkow (CK/SN). Pytajo za jendźelskim polarnym slědźerjom Franklinom bě Jan Awgust Měrćink do Arktiki přišoł. Štož z Hrodźišća pochadźacy Serb tam dožiwi, wo tym rozprawještaj Mechthild a Wolfgang Opel minjeny pjatk na žurli Małowjelkowskeje sotrownje. Berlinjanaj běštaj 1993 w telewizijnej dokumentaciji wo sewjerozapadnej pasaži na mjeno Měrćinka storčiłoj. Jako lěta 2010 powostanki „Investigator“ namakachu, łódź, z kotrejž bě Měrćink w Arktice był, so wonaj znowa z temu zaběraštaj. Zhromadnje podaštaj so do Labradora a 2012 do Arktiki. Pozdźišo knihi wo tym wozjewještaj.
Předstaja Serbow w Kašubskej
Pod hesłom „Serbja – Mały lud – Bohata kultura“ předstaji Budyski Serbski muzej w Zapadokašubskim muzeju w Bytowje wot přichodneho pjatka wopytowarjam serbski swět.
Knjez domu hosći postrowił
Chór Łužyca na Worcynskim hrodźe koncertował
Worcyn (CRM/SN). Jedne z najwoblubowanišich zetkanišćow Serbow a Serbowkow wuchodnje Budyšina je Worcynski hród. Po politiskim přewróće bě Alfred hrabja ze Solms-Sonnewalde historiski twar swojich potomnikow, w kotrymž běše hišće dźěćatstwo přežiwił, restawrować dał.
Tuchwilu přebywa hrabja, přez lětdźesatki ze swójbnymi w Nižozemskej bydlacy, zaso w swojej starej domiznje. Minjeny pjatk wječor wuži wón składnosć, lubych serbskich hosći, wopytowarjow z wokolnych wsow a wosebje delnjoserbski chór Łužyca wosobinsce witać. Něštožkuli serbskeho zwosta jemu z młodych lět w pomjatku, štož wědźeše mjeztym pola agilneje wučerki Róže Pinkawineje wukmanić. Njeběše to jeno přećelna a wutrobna gesta, ale zdobom wulka překwapjenka wšitkim přitomnym.
Awtorojo chcedźa tež dalekubłanja
W Budyšinje nowe mólby nastali
Stajny pokład
Nowa serbska ćišćernja wutworjena
Před 70 lětami, 6. junija 1947, podpisa 14 Serbow załožensku lisćinu noweje serbskeje ćišćernje po rozbiću fašizma. Přede- wzaće z mjenom Domowina – ćišćernja a nakładnistwo, drustwo zwr, započa 1. julija 1947 w rumnosćach něhdyšeje Donnerhakec ćišćernje Před Šulerskimi wrotami 21 w Budyšinje dźěłać. Hižo něšto dnjow pozdźišo, 6. julija 1947, wuńdźe tam Nowa doba spočatnje jako tydźenik. Serbske ćišćerske wudźěłki běchu přewšo požadane, tuž přewzachu lěto pozdźišo rumnosće bywšeje ćišćernje A. Müller na Hornčerskej 41 a 1951 rumnosće bywšeho „Bautzener Tageblatt“ na Drjewowych wikach 21–23. Lěta 1952 přenjesechu woni Serbja swoje firmowe podźěle Domowinje, Zwjazkej Łužiskich Serbow. Ze załoženjom Ludoweho nakładnistwa Domowina 1. julija 1958 buštej ćišćernja a nakładnistwo dźělenej.
Zwučuja nowy rejwanski projekt
Prěni raz awkcija pod hesłom
Zhorjelc (SN/CoR). Hornjołužiska załožba za wuměłstwo a kulturu přeprošuje na mjeztym 9. wuměłsku awkciju. 12. awgusta maja zajimcy we Wuchodosakskej wuměłstwowej hali Połčnicy znowa šansu, twórby regionalnych a tež nadregionalnych wuměłcow na přesadźowanju kupić.
Lětsa su awkciju kaž tež k tomu słušacu wustajeńcu prěni raz pod wosebite hesło stajili. K temje „Postawa a krajina“ su so wuměłcy z regiona poprawom hač do 22. meje z twórbu požadać móhli. Na jich próstwu pak su termin hač do 10. junija podlěšili. Předaja-li twórbu, dóstanje wuměłc 50 procentow wuzbytka, druha połojca ma skutkowanju 2009 załoženeje załožby za wuměłstwo a kulturu słužić. Wona ma pomhać, wuměłstwowe herbstwo Hornjeje Łužicy za přichodnym generacijam wobchować a muzeje a zběrki w tymle zmysle podpěrać.
Myto Ćišinskeho Jurej Mětškej
Budyšin (SN/CoR). Myto Ćišinskeho 2017 spožči so serbskemu komponistej Jurej Mětškej za jeho wusahowace kompozitoriske tworjenje a slědźerske dźěło we wobłuku serbskeje hudźby, kaž Załožba za serbski lud zdźěli. Tole rozsudźi kuratorij k spožčenju myta na swojim wčerawšim zetkanju.
Juro Mětsk (lětnik 1954), syn serbskeho wědomostnika a publicista Frida Mětška studowaše na Berlinskej wysokej šuli za hudźbu „Hanns Eisler“. Wot 1986 skutkuje Budyšan jako samostatny komponist. Wosebje na polu tak mjenowaneje noweje hudźby je Juro Mětšk znaty.
Za spěchowanske myto k Mytu Ćišinskeho 2017 bu namjetowana 41lětna spisowaćelka Lubina Hajduk-Veljkovićowa (rodźena Šěnec) za jeje wusahowacy přinošk k wuwiću moderneje serbskeje literatury a načasnych rěčnokubłanskich srědkow. Dźensa w Lipsku swobodnje skutokowaca je rodźena Budyšanka.
Wobě myće přepoda sakski ministerski prezident Stanisław Tilich 21. oktobra w Pančicach-Kukowje.
