Nazymski koncert dorosta
Přećiwk mjez logiskim myslenjom a začućemi rysowała
Kamjenc (SN/MG). Zo přińdźe lětuša lawreatka sakskeho literarneho myta Angele Krauß do Kamjenca, bě wčera mnohim zajimcam přičiny dosć, so do něhdyšeje klóšterskeje a serbskeje cyrkwje swjateje Hany podać. W ramiku nětko jědnateje Kamjenskeje narěče skići Krauß wčera wječor dohlad do swěta swojich mysli. Organizowało bě zarjadowanje dźěłowe městno za recepciju Lessinga w Kamjencu.
Zo su Kamjenske narěče towaršnostnje wuznamne zarjadowanja, na to pokaza hižo wyši měšćanosta Roland Dantz (Swobodni wolerjo), w swojich powitanskich słowach. Před dokładnje dźesać lětami, 11. septembra 2014, bě mjenujcy tež njedawno zemrěty aktiwist za byrgarske prawa w NDR Friedrich Schorlemmer tu porěčał. Hladajo na narěč Krauß wón praji, zo budźe wona „překwapjeć“. Nimo toho zwurazni wón, zo su narěče „za politisku krajinu wažny format“, wšako ma tu kóždy móžnosć swoje měnjenje zwuraznić.
We wobłuku koncertneho rjadu „Nadźija“ towarstwa Patrons of Art ...
Poskićuja kursy starych rjemjesłow
Program po wšej Łužicy
Domowina organizuje druhe lěto pisany rjad nazymskich koncertow
Budyšin (SN/MG). Za mnohe Serbowki a mnohich Serbow słušeja nazymske koncerty do pancateho ćmoweho časa runje tak, kaž wosušk k hodam. Druhi raz wuhotuje wone nazymske wjerški lětsa Domowina, po tym zo bě něhdyša organizatorka – Załožba za Serbski lud – zamołwitosć před ... lětami wotedała. Zamołwita projektowa managerka ze stron Domowiny je nětko Katrin Młynkowa. Na naprašowanje našeho wječornika wona zdźěli, zo „so lětsa na zwučenym formaće ničo njezměni“.
To rěka, zo přewjedu so tež lětsa zaso koncerty we wšěch župach Domowiny. Dwanaće jich dohromady budźe. Nalěto mějachu tež hižo dwaj, Młynkowa powěda. „Poprawom mějachmy jenož dźesać koncertow planowanych, ale dokelž bě zajim tak wulki, mamy nětko dwaj wjace.“ Wulki zajim mějachu wosebje kulturne ćělesa, kotrež wuhotuja koncerty w Malešecach, Bukecach, Radworju, Njebjelčicach, Hórkach, Pančicach, Dešnje, Złym Komorowje, Hochozy, Łazu, Ćisku a Salowje.
Tafla nastork za dalše slědźenje
Nabožne njeměry so na serbsku ludnosć wuskutkowali
Budyšin (CS/SN). Ludźo zawěsće z toho wuchadźeja, zo su nabožne rozestajenja wokoło Bukec a wokolinje we 18. a 19. lětstotku skerje njewuznamna tema. Tola stawiznarka dr. Lubina Malinkowa je wčera w Budyskim archiwowym zwjazku přednošowała a dopokazała, zo tomu scyła tak njeje. Serbja w tutej wosadźe mjenujcy nabožnu swojoraznosć wuwichu a k nonkonformizmej chilachu. Potajkim orientowachu so woni na struktury, zwonka wot cyrkwje připóznatych, štož hłuboko sahacy proces modernizowanja serbstwa wuwabi.
Friedrich Schorlemmer
Wón słušeše k najraznišim kritikarjam režima NDR. Nazymu 1989 bě jedna z najprominentnišich wosobinow měrniweje rewolucije. 80lětny Wittenbergski teologa Friedrich Schorlemmer je minjenu njedźelu zemrěł. Zwjazkowy prezident Frank-Walter Steimeier je Schorlemmera jako zmužiteho wojowarja za swobodu a demokratiju, muža słowa, swědomja a wěry wuzběhnył.
Znajmjeńša dwójce je so Schorlemmer do stawiznow zapisał. Na masowej demonstraciji 4. nowembra 1989 na Berlinskim Alexanderowym naměsće namołwješe ludźi, so namocy wzdać. Lěta do toho, 24. septembra 1983, bě na ewangelskim cyrkwinskim zjězdźe NDR we Wittenbergu mječ na radlicu kował. Tehdy bě Schorlemmer prědar w Lutherowym měsće a sobuorganizator akcije. Hesło „Mječe na radlicy“, wot mócnarjow NDR zacpěte, bě wodźacy motiw křesćansce wobwliwowaneho měroweho hibanja NDR. Schorlemmer narodźi so 16. meje 1944 we Wittenbergu. W NDR njesmědźeše maturować, studowaše pak přiwšěm teologiju. Ze swojim měrniwym spjećowanjom a protestom bě stajnje we wizěrje statneje wěstoty NDR.
Hudźbny móst mjez Čěskej a Łužicu
Ekumeniski dźakny koncert
Budyšin (CRM/SN). We wobłuku Dnja wotewrjeneho pomnika je ewangelska wosada swj. Pětra w Budyšinje předwčerawšim na wurjadny dźakny koncert přeprosyła. Před měsacami dźě bu jasne, zo žada sej hawarija na Eulowych byrglach, dotwarjenych w lěće 1910, dokładnu restawraciju tak mjenowaneho pišćeloweho hrajneho blida (kompleks manualow, pedalow a registrowych ručicow – přispomnjenje redakcije). Pišćeletwarski mišter Dirk Eule, jednaćel zawoda Hermann Eule, rozłoži zajimcam z pomocu projicěrowanych wobrazow wobjim fachowych naprawow, kotrež su trjeba, wažny dźěl „wulkeho a komplikowaneho instrumenta dospołnje wutwarić, wšón proch někotrych lětdźesatkow wotstronić, reparować, trěbne techniske změny přewjesć a skónčnje projekt z dobrym swědomjom zaso přepodać“. Farar Christian Tiede pak njedźakowaše so jenož na tradicije bohatej Budyskej firmje, kiž słuša k najwjetšim swojeho razu w Němskej, ale tež wosebje pomnikoškitej kaž tež dalšim sponsoram, kiž wobšěrnu restawraciju financielnje zmóžnichu.
