Chrósćicy (SN/MG). Stotki ludźi w publikumje a dźesatki na jewišću – předwčerawšim skrótši zarjadowanje „Serbske bands a fans“ lubowarjam serbskeje hudźby dołhe dny mjez lětomaj. Wot 20 hodź. hač do zaheho ranja zaklinčachu z boksow Chróšćanskeje wjacezaměroweje hale „Jednota“ znate serbske pěsnje. Wobliča na jewišću běchu znate, tak zapiskachu na přikład skupinje Holaski a Con-takt. Stajnje zaso wuhladachu zahorići w publikumje tež tych abo tamnych njepřipowědźenych hosći na jewišću. Tak zaspěwachu jako překwapjenka na přikład Lózy hólcy, István Kobjela, Měrćin Weclich­ abo tež Špitankec Handrij a Andreja. Po hodźiny dołhim programje wjedźeše swěru Jakub Wowčer. Prěni raz bě tež ludźom zwonka „Jednoty“ móžno koncertej sćěhować. Team studija Lucije wokoło Michała Cyža bě so mjenujcy wo live­stream postarał. Tutón je sej hač do redakciskeho kónca tutoho wudaća Serbskich Nowin hižo něhdźe 2 800 ludźi wobhladało. Widejo je dale na platformje Youtube přistupny.

Sakski kurwjerchowski mechanikar a blidar Handrij Zahrodnik narodźi so pa­toržicu lěta 1654 w Chwaćicach jako syn ratarskeho najenka a wotrosće w Hornjej Hórce. W Budyšinje nawukny po­wołanje blidarja a poda so wot lěta 1673 na dwanaćelětne rjemjeslniske pućo­wanje po Němskej, Awstriskej a Italskej, přiwšěm sej tójšto kmanosćow při to­čenju škleńcow, zhotowjenju intarsijow, w twarstwje kaž tež astronomije, ­geome­- trije a při twarje mechaniskich nastrojow přiswoji. 1685 wróći so do Sakskeje a dwě lěće po tym bu swojich wobšěrnych kmanosćow wědy dla w Drježdźanach jako kurwjerchowski dwórski blidar přistajeny. Wón bu wot lěta 1694 hač do smjerće 2. małeho róžka 1727 ­pola kurwjercha Awgusta Sylne­ho z mode­lowym mištrom a dwórskim mecha­nikarjom.

Lětuše Hornjoserbske słowo lěta předewšěm w młodźinje woblubowane

Budyšin (SN/bn). „Kadla“ je Hornjoserbske słowo lěta 2024 (HSSL). Stary wuraz z dohromady dźesać w Soblexxu jewjacymi so woznamami nałožuje so dźensa z němym „d“ předewšěm w rěči młodostnych jako pendant k němskemu „Alter“. Hesło přesadźi so ze 17,7 procentami přećiwo nowotwórbje „přesłapjenka“ (17 proc.), kotraž bu ze stron čitarstwa jako „słowo, kotrež wopisuje situaciju, w kotrejž so ći tak prawje zecnje a wostrózbnjace začuće, hdyž njejsy docyła spokojom“ namjetowane. Na třećim městnje slěduje dalši neologizm, mjenujcy „paypalować“ (14,3 proc.). Tónle werb wotwodźuje so z drje najznaćišeho posłužowarja za digitalne zapłaćenje a hodźi so mjeztym skupinje družinowych zapřijećow přirjadować. Towaršnostno-politisce lětsa dominowace hesła resp. kombinacije „wólbne superlěto“, „ćernjowkowa koalicija“ a „legalizacija“ wopokazachu so wobsadźiwši z dwójce 0,7 a jónu 2,7 proc. troje městna na kóncu tabulki jako poměrnje njepopularne wobroty.

Hodowna kriminalka Serbskich Nowin 2024, napisał Měrćin Wjenk

Je to woprawdźe wón? Njemóže přeco hišće wěrić, što tu čini. Zo sej to načini. Wón waha. Hišće móže so zawróćić. Ale potom by dźěło cyłeho lěta po­darmo było. Zdychnje a wočini wrótka. Po krótkim šćerkowym puću dźe k zachodej. W škleńcy chěžinych durjow so něchtó špiheluje. Ma to być wón, ale wón so sam wjace njespóznawa. Cuzy na njeho wudźěra. „Zmuž so, čiń to“, jemu hłós we wuchu přirěčuje. Začini woči a stłóči na klinkačk.