Festiwal na dobro wšěch
Budyske turistiske towarstwo organizuje lětsa šesty raz staroměšćanski festiwal Woda – Wuměłstwo – Swětło. Kónc awgusta wuhotuje dohromady něhdźe 450 sobuskutkowacych wotměnjawy program na 30 hrajnišćach w najstaršej štwórći sprjewineho města.
Village People w cyrkwi a hórske zynki na Pichowje
Budyšin/Wjelećin (SN/bn). Koncert „Swjedźenska hudźba z wěže“ tworješe wospjet tradicionalne zakónčenje Łužiskeho hudźbneho lěća. Dešća dla njezahudźichu Budyscy wěžowi hercy a skupina Eight for Brass wčera z wěže radnicy a na Hłownym torhošću, ale krótkodobnje we hłownym wołtarnišću a na emporje cyrkwje swj. Pětra. Dujerjam poboku bě hóstny bubnar Patrick Neumann, moderaciju wukonješe Kristina Nerád. Najprjedy so wotměnjejo a potom zhromadnje předstajichu hudźbnicy mjez druhim kompozicije Johanna Christopha Pezela a Dimitrija Šostakowiča kaž tež medleyjej hitow skupinow Comedian Harmoinists a The Beatles. Sylneho přikleska něhdźe 80 wopytowarjow dla zahra so přidawk „Dicso lives“. Měšeńca z drje najznaćišich titulow Glorije Gaynor, Bee Gees a Village People žněješe hišće sylniši aplaws.
Nowa doba Słowjanskeho hrodźišća móže so zahajić
Wětošow/Raduš (SN/at). Słowjanske hrodźišćo w Radušu ma swojemu mjenu w přichodźe zaso bóle wotpowědować. We wobłuku Mjezynarodneje twarskeje přehladki (IBA) Wjercha Pücklerowy kraj 2000–2010 natwarjeny objekt wobhospodari wot wčerawšeho załožba Slavonic Europe z Brüssela. Jeje prezident David Chmelík a Wětowšowski měšćanosta Bengt Kanzler (njestronjan) staj wčera na zjawnym zarjadowanju, na kotrymž wobdźělichu so tež Serbja z Hornjeje Łužicy, na dworje Słowjanskeho hrodźišća wužiwanske zrěčenje podpisałoj. Kaž stej wobě stronje Serbskim Nowinam wobkrućiłoj, ma so nětko płaćiwy dokument na herbskotwarske zrěčenje kwalifikować. Za to su komunalnoprawniske pruwowanja trěbne, kotrež pak hišće traja. Wo dźěło na městnje stara so wobhospodarjenska towaršnosć Słowjanske hrodźišćo ptzwr.
Trajaca zasłužba za serbsku identitu
Njedźelu, 11. žnjenca, zemrě w Budyšinje na zaprajenje wutroby w starobje 95 lět knjeni prof. dr. phil. habil. Lucija Hajnec. Wona bě prěnja serbska literarna stawiznarka, zdobom uniwersitna docentka, wudawaćelka a recensentka.
Pjeć pišćelow předstajił
„Kokoty“ lětsa z mnohimi diskusijemi
Choćebuz (HA/SN). W Delnjej Łužicy je so čas serbskich woblubowanych žnjowych nałožkow zahajił. „Kokoty“ su tu, kotrež wot 27. julija hač do 14. septembra na 22 wsach swjeća. Při tym kokota łapaja abo zabiwaja. Wjeršk budźe zarjadowanje superkokot 28. septembra w Dešnje. Tam wojuja wjesni prěni „kralojo“ kokota wo čestny titl super-krala.
Lětsa su prěnje zarjadowanja bohužel z njerjanymi diskusijemi zwjazane byli. Towarstwo za škit zwěrjatow PETA běše hižo loni skóržbu zapodało, dokelž so po jich měnjenju mortwy kokot hišće čwěluje. A to je přećiwo zakonjam. Wosebje weterinarny zarjad we wokrjesu Dubja-Błóta je na to skočił a nochcyše młodźinje w Běłej Gorje (Byhleguhre) dowolić kokota po starej tradiciji łapać.
Tójšto diskusijow je so wo tym wjedło. Nic jenož w Běłej Gorje, ale w cyłej Delnjej Łužicy, a protesty su přiběrali. Skónčnje dyrbjachu swjedźeń dowolić, z prawym honačom, ale z mnohimi přidatnymi wuměnjenjemi. Tak su kokota do toho zmjerznyć dyrbjeli!
Młodźinje rjap skrućił
Serbski centrum bě wjeršk jězby z busom wuměłstwa
Slepo (CS/SN). Mjeztym dźesaty raz bě kónc tydźenja bus wuměłstwa po Hornjej Łužicy po puću, tónkróć w regionje wokoło Běłeje Wody. Akcija měri so na zajimcow wuměłstwa, kotřiž chcedźa sej wuměłske městnosće wotkryć.
Bus startowaše při sociokulturnym centrumje Telux w Běłej Wodźe. Za mnohich Budyskich zajimcow bě wot sprjewineho města bliskowobchadny zwisk do Běłeje Wody přihotowany. W měsće móžachu sej ludźo škleńčany muzej wobhladać. Wěcywustojny wodźer rozłoži stawizny města Běłeje Wody, kotrež rozeznawa so wot tamnych městow w Hornjej Łužicy, wšako je so hakle industrializacije w 19. lětstotku dla wot wjeski na město wuwiło. W Mužakowje wotkrychu sej sobujěducy Herrmannsku kupjel, kotraž loni swoje 200lětne wobstaće woswjeći. W Kromoli pak wobdźiwachu ludźo park a knježi dom. W Slepom je wuměłc Thomas Schwarz zajimcow na wopyt w swojim ateljeju přeprosył. Tam nastanu mjez druhim drjewjane skulptury.
Zhusćeny portret serbskeje Židowki
Dóńt Hany Šěrcec bě spisowaćelej Jurjej Kochej z předłohu jeho literarneho debita. Něhdźe 50 lět po prěnim wozjewjenju nowele je so znowa stawiznje „serbskeje Židowki“ wěnował.
Słowjanske hrodźišćo bórze z nowej wobhospodarku
Wětošow/Brüssel (SN/at). Załožba Slavonic Europe z Brüssela přewozmje wobhospodarjenje Słowjanskeho hrodźišća w Radušu. To wuchadźa z nowinskeje zdźělenki załožby. Informaciju je našej nowinje Bengt Kanzler, měšćanosta Wětošowa, wobkrućił. Štwórtk, 15. awgusta, chcetaj wón a David Chmelík wužiwanske a najenske zrěčenje we Wětošowje podpisać.
Hišće na posedźenju Wětošowskeje zhromadźizny měšćanskich wotpósłancow kónc meje rěkaše, zo su dalše rozmołwy trěbne. Komuna pak steješe pod ćišćom, wšako by jeje podpěra financnych přičin dla kónc lěta wuběžała. Nimo toho chcyše David Chmelík angažement załožby Slavonic Europe w lěću zahajić, kaž je wón to Serbskim Nowinam dźensa wobkrućił.
