Spěwajo ducy do Słowakskeje
Kraków (SN/MiR). Skupina łužiskich Serbow je so dźensa w nocy do Východneje na Mjezynarodny folklorny festiwal Východná 2023 podała. Po puću do Słowakskeje su woni rano po Pólskej ducy, w Krakowje pozastali. Při wodźenju po měsće su sej Stare naměsto wohladali a so na sławnym Wawelu rozhladowali.
Mjez nimale 40 sobupućowacymi su so młodźi mužojo, po wjetšinje čłonojo skupiny Čłonstwo za integraciju ludoweje akordeonoweje kultury (ČILAK), ze swojimi instrumentami a hłosami wo dobru naladu postarali. Tuž běše nócny měr w busu chětro krótki. Wšako su młodostni štučku po štučce zakantorili a tak k sobu spěwanju pohnuwali. A to njedachu sej ludźo w busu dwójce kazać. Wšojedne hač dźesaćlětny šuler abo rentnar, kóždy je sobu spěwał, hdyž zaklinčachu serbske, čěske abo słowakske ludowe spěwy. Runje tak derje pak wědźachu woni młode hłosy podpěrać, hdyž tute spěwy Lózych hólcow, JANKAHANKI, Holaskow a druhich serbskich bandow a kapałow zakantorichu. Dźensa wječor pak budu wšitcy zhromadnje we Východnej sobu spěwać a rejować.
Z festiwalnej přiłohu
Mamy zaso festiwalne lěto. Po njezwučenej štyrilětnej přestawce koronapandemije dla su wšitcy, kiž so za folkloru, spěwy, reje a tradicije z druhich krajow horja, na Mjezynarodny folklorny festiwal „Łužica“ w Budyšinje, delnjołužiskej Hochozy a wězo w Chrósćicach wutrobnje přeprošeni. Wo hłownych akterach zhoniće wjace we festiwalnej přiłoze Serbskich Nowin, nastatej w zhromadnym dźěle z Domowinu. Pozadk bě, sobu na wobswět myslić a njeprodukować dwaj podobnej wudźěłkaj.
Festiwalna přiłoha je dźensnišemu wudaću Serbskich Nowin připołožena. Wona ma tónkróć zdobom raz kónctydźenskeje přiłohi.
Čitajće w nowym rozhledźe (30.06.23)
Dwójne wudaće serbskeho kulturneho časopisa sčasom do wulkich prózdnin předleži.
Tute lěćne 64stronske wudaće Rozhlada wěnuje so přewažnje serbskej literaturje. W nim namakaju čitarjo tójšto nowych powědančkow a basnjow w hornjo- a delnjoserbšćinje. Nimo literatury zastupjene su wšelake zajimawostki kaž serbske spěwarske z Texasa (napisała Trudla Malinkowa), serija archeologi Michaela Meyera wo paralelach delnjoserbskeho kokota z podobnymi nałožkami w druhich europskich krajach (Španiska, Belgiska a Pólska) a mjez druhim pola Baskow.
Serbscy chowancy Krajnostawskeho wučerskeho seminara w Budyšinje 1817–1837 je tema dalšeho přinoška Evelyn Fiebigeroweje. Wo poměrnje aktualnej temje w Maćicy serbskej (dorost) podawa swój wid Hartmut Leipner. K rekonstruowanju delnjoserbskeje drasty pólskeje Delnjeje Łužicy z wokoliny Žemrja (pl. Lubsko, ně. Sommerfeld) powěda Agnieszka Łachowska w rozmołwje z Justynu Michniuk. Agnieszka Łachowska pochadźa ze Žemrja a tuta zwjazanosć z pólskej Delnjej Łužicu je ju pohnuła, intensiwnišo wo drastach slědźić.
Spektakularne efekty, makaberny humor
Lěćne dźiwadło lětsa čorna musicalowa komedija z klasiskim konfliktom
„The Addams Family“ rěka inscenacija Němsko-Serbskeho ludoweho dźiwadła, kotruž tuchwilu we wobłuku 27. Budyskeho dźiwadłoweho lěća jako spektakl pod hołym njebjom na dworje Hrodu sprjewineho města pokazaja. Hra je z pjera Marshalla Brickmana a Ricka Eliceho a złožuje so na cartoony Charlesa Addamsa z 1930tych lět. W Němskej naby swójba z telewizijnej seriju z 1960tych lět a předewšěm spočatk 1990tych lět z prominentnje wobsadźenymaj kinowymaj produkcijomaj Barryja Sonnenfelda takrjec kultowy status. Najnowše sfilmowanje pokazaja wot lońšeho jako wjacedźělnu adapciju na platformje Netflix. Wšitke mjenowane cineastiske wobdźěłanja kaž tež originalne rysowanki drje su inscenaciji w Budyšinje kmótřili, hdźež předstaja „The Addams Family“ w němskim přełožku Anje Hauptmann jako musicalowu komediju z hudźbu a spěwami Andrewa Lippy. W srjedźišću jednanja steji (jenička) dźowka wšemu makabernemu přewšo přichileneje swójby Addams, kotraž je so do młodeho pachoła zalubowała.
Žiwe serbske nałožki prezentowali
Serbski ludowy ansambl hotuje so na Smochčanski hudźbny swjedźeń. ...
Hódny prezent k jubilejej
Młoda serbska generacija počesći starodawny klóšter „Marijina Hwězda“
Hdyž 1. serbska kulturna brigada koncertuje, njetrjeba so nichtó starosćić, zo budźe wothłós snadź snadnuški. Tak běše Boži dom tež derje pjelnjeny, jako wustupi gymnazialny chór pod swojim wjelelětnym, přewšo zasłužbnym dirigentom Friedemannom Böhme, kiž so kónc šulskeho lěta 2022/2023 z tymle zastojnstwom rozžohnuje, sobotu, 17. smažnika, w cyrkwi klóštra Marijina Hwězda w Pančicach-Kukowje. A po koncerće běše na klóšterskim dworje hišće wjele chwalobneho słyšeć. Tak jewjachu so na přikład měnjenja kaž „Tak wulkotnje brigadu hišće ženje dožiwili njejsmy“ a „To bě najskerje najrjeńši a najbóle hnujacy chórowy koncert, kotryž sym hdy wopytała.“
Jubilej bjez wohnjostroja
Lětuše 10. Krabatowe swjedźenske hry zbudźa nadźiju na dalše wjerški
Wojerecy (JK/SN). Kónčne proby za lětuše jubilejne 10. Krabatowe hry w Čornym Chołmcu běža na połnych turach. Tež hdyž z probami w planje njejsu, budźe premjera w přichodnym tydźenju dypkowna. To potwjerdźištaj hłownaj zamołwitaj swjedźenskich hrow, Peter a Alexander Siebecke, na nowinarskej rozmołwje wčera we Wojerowskim Kieschnickec awtowym domje.
Pisany program za wjace pisanosće w měsće
Budyšin (SN/bn). Pod hesłom „Bonucować w Budyšinje“ wuhotuje syć dohromady 26 lokalnych a regionalnych towarstwow, iniciatiwow a zjednoćenstwow wot 6. do 9. julija mjeztym třeći raz kulturny festiwal w sprjewinym měsće. Mjez wobdźělnikami su na přikład projekt BDŠN.RCKS, towarstwa Dźěłań dźeń, Kulturny běrow Sakska a Bautzen rollt, iniciatiwa Zazelenjerjo města, socio-dźiwadłowy centrum Thespis kaž tež bara Sundowner. Zaměr zarjadowanja je, „dynamiku a pohib do města přinjesć, wobydlerjow do rozmołwy wjesć, zhromadnosć sylnić a so wo trochu wjace pisanosće w Budyšinje postarać“, kaž koordinatorka festiwala Lisa Wendler we wobłuku nowinarskeje rozmołwy předwčerawšim w Kamjentnym domje rozłoži. Festiwal měri so předewšěm na młodźinu, je pak tohorunja „přeprošenje wšitkim, kotřiž so młodźi čuja, kotřiž su nowym napřećo wotewrjeni kaž tež ludźom, kotřiž chcedźa so z młodźinskej kulturu zeznajomić.“
Terminy sej dorěčeć IV
Mjezynarodna konferenca mjeńšinowych dźiwadłow, zetkanje młodych akademikarjow-sorabistow, kolokwij wo módroćišću, „Pólskej nocy“ pod hołym njebjom, festiwalej Miktival a Rock’n Wagon – na wuměłstwu a wjace zajimowani maja so přichodny kónc tydźenja zaso raz rozsudźić, kotry wjeršk je jim najwažniši. Po-dobnje wupada za dwě njedźeli. Folklorny festiwal Łužica, kulturny festiwal „Bouncować w Budyšinje“ abo snano tola wulka wernisaža „vorOrt“ w galeriji Budissin a na Budyskim Hrodźe? Dosć bohaty poskitk wo tym swědči, zo stej město a region wšo druhe hač chudej na kulturu. Wospjet pak je po wšěm zdaću mjezsobna koordinacija zwrěšćiła, wospjet bu tu a tam poskitk kooperacije ignorowany.
Konkurenca wožiwja gšeft, kaž so praji. To pak zdobom woznamjenja, zo hrozy strach monopolizacije na škodu wotměny a wjelorakosće – štož njesměło w zajimje ani zarjadowarjow ani potencielneho publikuma być. Bosćan Nawka
