14. małeho róžka 1855 narodźi so narodny prócowar Handrij Króna do serbskeje burskeje swójby w Bukecach. Wón přewza pozdźišo kubło staršeju a bě jara wědomy a angažowany narodny prócowar w zapadnym dźělu tehdyšeho Lubijskeho wokrjesa. 1876 wutwori wón Serbske towarstwo w Bukecach, kotrež měješe wjace hač sto sobustawow. Dale wěnowaše so jara prašenjam hospodarstwa w towarstwje a załoži we wosadnej wsy lutowarnju a wupožčowarnju za ratarjow. Zdobom skutkowaše 34 lět jako předsyda jeje dohladowarstwa. Hišće dlěje bě aktiwny předsyda serbskeho towarstwa. Jako tajki zasadźowaše so jara za serbsku wučbu w šulach. Po boku Arnošta Barta-Brězynčanskeho a Jana Awgusta Zoby angažowaše so w protestnym hibanju sakskich Serbow wot lěta 1910 do 1912. Z nim wustupowachu přećiwo germanizowacym naprawam Budyskeho šulskeho radźićela Bacha a za serbsku wučbu w šulach. Jako wjeršk organizowaše Serbski zjězd Domowiny 15. smažnika 1926 w Bukecach. Na nim wobdźěli so 37 serbskich towarstwow ze cyłeje Łužicy z 4 000 wobdźělnikami. 21. nalětnika 1937 zemrě Handrij Króna w ródnych Bukecach. Manfred Laduš

Druhi tydźeń zymskich prózdnin so pomału nachila, Madlenka Cyžec z Kozarc (naprawo) kaž tež Viktoria Žurec z Radworja tutón tydźeń w Ludowym nakładnistwje Domowina přebywatej. Tam wěnowaštej so wažnemu nadawkej: digitalnemu archiwowanju mnohich starych fotow archiwa Serbskich Nowin. Zo byštej tutón nadawk wuspěšnje zmištrowałoj, dyrbještej dokładnje dźěłać. Wšako ma so kóždy jednotliwy wobraz korektnje do tabulkoweho programa zapisać. Za to je połna koncentracija jara wažna. Šulerce zmóžnjatej z tym wobchowanje dopomnjenkow a spřistupnjenje stawiznow swojeho regiona přichodnym generacijam. Foto: Vanessa Žurec

Prapremjera filma wo wobchadźe, wjeselu a wědomosći na njebju

Budyšin (SN/bn). „Nad třěchami Budyšina“ rěka film, kotryž staj režiseraj-producentaj Florian Buk a Florian Kamenz wčera w Budyskim Kamjentnym domje prapremjernje předstajiłoj. Něhdźe třištwórćhodźinska produkcija je prěni wobšěrny přinošk platformy New World Studios, kotruž běštaj Buk a Kamenz loni w septembrje jako „rum, w kotrymž fantazija mjezy nima“, załožiłoj. Hłowny zaměr je zmóžnić jězbu po wjelorakim swěće krótkofilmow, šěrić po principje do-it-yourself zwoprawdźene wudźěłki a powědać stawizny po nowym wašnju. Nowy pask wotpowěduje tejle maksimje, kombinujo elementy dokumentarneho a hrajneho filma. Fiktiwny podźěl twori takrjec ramikowe jednanje a zwjazuje jednotliwe jakne reportaže, wotbłyšćowace „wurězki wšeho, štož so nad hłowami Budyšanow wotměwa. Zakładnu ideju za naju mjeztym štwórty zhromadny projekt zrodźichmoj před něhdźe poł lětom sedźo a bachtajo na třěše domu při Budyskej Bohatej.

Budyšin (bry/SN). Wo wjesnych stawi­znach a pěskowo-hlinowej jamje přednošowaštaj wčera na žurli Budyskeje měšćanskeje biblioteki čłonaj organizaciskeje skupiny za jubilej Měrkowa. Wudobywanišćo pomjenuja we wobchadnej rěči jako pěskowu myjernju (Sandwäsche). Něhdźe 30 přisłucharjow bě z Měrkowskeje a Lutobčanskeje wokoliny přichwatało, ale tež zajimowani abo přiwuzni Budyšenjo. Tak měješe wječor zdźěla swójbny charakter.