Šef zběharjow wahow wotstupi
Paducham awtow pomhali
Nawal turistow
Ćěkanc w čěskim jastwje
Na kole k bamžej
Bratislava (SŽ/K). Skupina 28 kolesowarjow-putnikow je tuchwilu po puću ze stolicy Słowakskeje do Roma. „Njesu bamžej poselstwo“, mjenuje dźenik SME zaměr jich wuprawy. Startowali su na přibližnje 1 300 kilometrow dołhu jězbu z Bratislavskeho hrodu, a swjate město wotmysla docpěć njedźelu 14. awgusta. Awdiencu pola bamža Franciskusa změja putnicy-kolesowarjo najskerje 17. awgusta. Jich poselstwo nastupa po spomnjenej nowinje Swjate lěto smilnosće a wopřijima tohorunja přeprošenje bamža do Słowakskeje.
Wobdźělnicy wuprawy w starobje 18 do 50 lět su wšitcy čłonojo křesćanskeho sportoweho hibanja Słowakski worjoł. Na předewzaće su so wotpowědnje přihotowali, a kóždy z nich je sej do toho 1 300 do 1 500 kilometrow natrenował. Nětkole absolwuja wšědnje něhdźe 130 kilometrow. Přewodźeni su wot dweju techniskeju wozow a jednoho telewizijneho. Minister za šulstwo Peter Plavčan bě kolesowacych putnikow rozžohnował ze słowami: „Wažu sej waše pućowanje. Wone přinošuje k přećelstwu a dorozumjenju mjez ludami.“
Kontroluja trójce wob dźeń
„Dorazne słowa a sylne gesty“
Pólska debatuje wo njedawnym wopyće bamža Franciskusa w Krakowje
Waršawa. Wopyt bamža Franciskusa na swětowym zetkanju młodźiny w Krakowje je tež po zakónčenju wulkozarjadowanja přeco hišće wažna tema w pólskich medijach. Při tym je widźomne, zo je wid na nje jara rozdźělny, předewšěm na stejišćo bamža k ćěkancam dla.
Zapósłanc strony Narodne hibanje Robert Winnicki njemóže so z nastajenjom bamža w prašenju migrantow scyła spřećelić, kaž sćelakej TVN24 rjekny. Móžny přichad muslimskich ćěkancow do kraja přirunowaše wón z nadběhom němskich wójskow na Pólsku 1939. Inwazija muslimow by pólski narod a nic naposledk katolsku cyrkej w jeju eksistency wohrozyła. „Dobry pastyr njesměł swoje wowcy k rězu wodźić“, Winnicki měni.
Politologa Marek Migalski je z wopytom bamža a ze zetkanjom młodźiny porno tomu jara spokojom. Wón sej w nowinje Rzeczpospolita chwali, zo je wšitko po planje wotběžało a zo njebě žanych terorowych nadpadow.
Wjele nowych firmow nastało
Miliony cigaretow sćazali
Ignoruja ćišć z Brüssela
Waršawa (dpa/SN). Pólske knježerstwo politiski ćišć z Brüssela ignoruje a swoju dwělomnu justicnu reformu dale zwoprawdźa. Prezident Andrzej Duda je noworjadowanje zakonja nastupajo wustawowe sudnistwo podpisał, kaž sobotu wječor z jeho kenclije rěkaše.
Reforma nabudźe dwaj tydźenjej po wozjewjenju w hamtskim zakonskim łopjenu płaćiwosć. Po słowach kritikarjow nowy zakoń dźěło wustawoweho sudnistwa lemi. Komisija Europskeje unije je z teje přičiny pruwowanske jednanje k zachowanju prawostatnosće w Pólskej zahajiła, žadajo sej změny. Na to bě knježerstwo zakoń předźěłało, při čimž wšak njeje namjety opozicije a kritiskich juristow zwjetša wobkedźbowała. Wicešef komisije EU Frans Timmermans je postupowanje Waršawskeho knježerstwa kritizował. Wone ma tři měsacy chwile, zakoń zaso změnić. Njedyrbjało-li so tole stać, chcedźa artikl 7 Europskich zrěčenjow nałožować. Tón předwidźi, čłonskemu krajej EU w poslednjej konsekwency prawo hłosowanja sćazać.
