Peter Čačko z Bratislavy rozprawja za Serbske Nowiny

Politiske zemjerženje, načinjene Europje wot rozsuda britiskich wolerjow, zo ma jich kraj EU wopušćić, našimaj načolnymaj politikarjomaj wulce měr njebjerje. Hłowa Słowakskeje Andrej Kiska drje wobžaruje, zo je k tomu dóšło, ale nadźija so, zo to zwostate zhromadźenstwo bóle hromadźe skowa. Premier Robert Fico strózbje konstatuje: „Brexit njeje tragedija, ale realita.“

Wěste přiwšěm je, zo wona realita njewostanje bjez wuskutkow na Słowaksku. Tangěruje ju hłownje w dwěmaj naležnosćomaj, kotrejž zwuraznja nowina SME z naležnej próstwu: Wostajće nam dźěło a Jaguar. Jónu dźe wo to, zo we Wulkej Britaniskej wjac hač 80 000 słowakskich ludźi dźěła. Z kajkimi komplikacijemi dyrbja woni ličić? Wostanu jich dźěłowe dowolnosće płaćiwe? Změni so snano něšto nastupajo jich přebytk na kupje resp. pućowanje? Tamne prekerne prašenje rěka: Wohrozy-li brexit předwidźane inwesticije Wulkeje Britaniskeje w Słowakskej? Wot nich dźě wotwisuje, hač hodźi so w nowej wulkej awtomobilowni Jaguar Land Rover dale produkować.

Bratislava (SŽ/K). Słowakska stolica je sobotu hnydom dwě demonstraciji dožiwiła. Prěnju bě ekstremna prawicarska Ludová strana Naše Slovensko (L’SNS) organizowała. Njedźiwajcy mócneho bubnowanja wšak zamó jeničce něhdźe 1 000 přiwisnikow za swój pochod přiwabić, tójšto­ mjenje hač wočakowane. Hdyž ćehnjechu­ prawicarjo-radikalnicy wot hłowneho dwórnišća na Naměsto swobody, škerjedźachu z cyłeje šije hanjace parole­ přećiwo USA a němskej kanclerce Angeli Merkel abo wołachu „Słowakska Słowakam“. Tónkróć pak su antifašistiske mocy na městnje dopokazać chcyli, zo njesłuša stolica ekstremistam. Tak zhromadźi so na jich naležnu namołwu wjace hač 2 000 ludźi, mjez nimi něhdyša premierka Iveta Radičová a wyši měšćanosta Bratislavy Ivo Nesrovnal. Na čole ćaha z Naměsta słowakskeho zběžka ke Kollárowemu naměstu zwuraznjachu plakaty z přešmórnjenym hokatym křižom zmyslenosć wobdźělnikow. Předsyda L’SNS Marian Kotleba připowědźi mjeztym peticiju­ za wustup Słowakskeje z EU.

Berlin (dpa/SN). Němscy a pólscy šulerjo změja po lětnich prózdninach w nowym šulskim lěće 2016/2017 zhromadnu wučbnicu w předmjeće stawizny. Prěni zwjazk „Europa – Naše stawizny“ staj wčera zwjazkowy wonkowny minister Frank-Walter Steinmeier (SPD) a jeho hamtski kolega Witold Waszczykowski šulerjam jedneje Berlinskeje wyšeje šule předstajiłoj. Paralelnje k tomu wotměchu so w kanclerskim zarjedźe němsko-pólske knježerstwowe konsultacije.

256 stron wopřijaca wučbnica za sekundarny schodźenk I ma we woběmaj krajomaj identiski wobsah, jenož po rěči je rozdźělna, zdźěli konferenca kultu­sowych ministrow 16 zwjazkowych krajow. Prěni zwjazk knihi zaběra so wobsahowje z dobu europskich pra- a zažnych stawi­znow hač do srjedźowěka. Planowane su hišće dalše tři zwjazki, kotrež měli stawizny hač do dźensnišeho časa wobje­dnawać.

Kaž Frank-Walter Steinmeier zwura­zni, ma wučbnica pomhać zhromadny němsko-pólski wid na stawizny wuwić.

Trutnov (ČŽ/K). 3 700 eurow resp. 100 000 krónow je seniorej z Trutnovskich kónčin hódno było, online nadeńć partnerku. W měrcu bě 71lětny w interneće nawěšk čitał: „Dobry wječor! Sym na serioznym poćahu zajimowana. Rady warju a sportuju. Budu zbožowna, jeli mi wotmołwiš. Ruslanka.“ A dowědźo so, zo za wotpósłarku tči 29lětna Ruslana Balykina z Nižneho Nowgoroda, wón nablaku na njón zreagowa. Dwě njedźeli su mejlki potom tam a sem chodźili. Z nich je senior sćěhował, zo je młoda žona inteligentna a k tomu šikwana, kaž dachu sobu pósłane fota spóznać. Jako jemu Ruslanka napisa, zo by „smjerć rady jeho wosobinsce zeznała a tež jeho kraj, zo pak bohužel nima trěbnych pjenjez za lětanku“, njeje so ani wokomik komdźił přepokazać jej za tiket a dalše wudawki 3 700 eurow. Njedóstawši wšak kwitowanje ani dźaka a nadobo tež hižo žane mejlki, jemu zeschadźa, zo drje je wobšudźerce na lěpk šoł. Trutnovska policija jemu to wobkrući. Jeje kriminalisća nětko pad přepytuja. Ruskich kolegow do wuswětlenja sobu zapřijimajo a wobroćichu so woni zdobom na Interpol.